മുംബൈ/അയോധ്യ: ബോളിവുഡ് താരം ആമിർ ഖാന്റെ (Aamir khan) മൂന്നാം വിവാഹത്തിന് പിന്നാലെയുണ്ടായ രാഷ്ട്രീയ വിവാദങ്ങൾക്കിടയിൽ താരത്തിന് നേരെ പരസ്യമായ വധഭീഷണി. അയോധ്യയിലെ തപസ്വി ഛാവണി പീഠാധീശ്വർ ജഗദ്ഗുരു പരമഹംസ് ആചാര്യയാണ് ആമിർ ഖാനെ വധിക്കുന്നവർക്ക് അഞ്ച് കോടി രൂപ പ്രതിഫലം പ്രഖ്യാപിച്ചത്. ഈ മാസം ആദ്യവാരം മുംബൈയിലെ പാലി ഹില്ലിലുള്ള വസതിയിൽ വെച്ച് നടന്ന ലളിതമായ രജിസ്റ്റർ വിവാഹത്തിലൂടെയാണ് ആമിർ ഖാനും ഗൗരി സ്പ്രാട്ടും വിവാഹിതരായത്. അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത ചടങ്ങിൽ പ്രത്യേക മതപരമായ ആചാരങ്ങളോ ചടങ്ങുകളോ ഉണ്ടായിരുന്നില്ല.
ആമിർ ഖാന്റെ വിവാഹ വാർത്ത പുറത്തുവന്നതിന് പിന്നാലെ കടുത്ത വിമർശനങ്ങളുമായി ചില ഹിന്ദുത്വ സംഘടനകളും രാഷ്ട്രീയ നേതാക്കളും രംഗത്തെത്തിയിരുന്നു. മഹാരാഷ്ട്രയിലെ ബി.ജെ.പി നേതാവും മന്ത്രിയുമായ നിതേഷ് റാണെ ആമിർ ഖാനെ ‘ലവ് ജിഹാദിന്റെ ബ്രാൻഡ് അംബാസഡർ’ എന്ന് വിശേഷിപ്പിച്ചിരുന്നു. നിതേഷ് റാണെയുടെ പരാമർശങ്ങളെ പൂർണ്ണമായി പിന്തുണച്ചുകൊണ്ടാണ് അയോധ്യയിലെ പരമഹംസ് ആചാര്യ ഇപ്പോൾ ക്രൂരമായ വധഭീഷണി മുഴക്കിയിരിക്കുന്നത്. ആമിർ ഖാൻ മൂന്ന് തവണ വിവാഹം കഴിച്ചെന്നും മൂന്നും ഹിന്ദു സ്ത്രീകളെയാണെന്നുമുള്ളത് യാഥാർത്ഥ്യമാണെന്ന് വാർത്താ ഏജൻസിയോട് പ്രതികരിച്ച അദ്ദേഹം, ലവ് ജിഹാദ് പ്രോത്സാഹിപ്പിക്കുന്ന ഇത്തരം ആളുകളോട് ഉടൻ പ്രതികരിക്കണമെന്നും ഇവർ സമൂഹത്തിൽ ഭിന്നതയുണ്ടാക്കുകയാണെന്നും ആരോപിച്ചു.
ആമിർ ഖാനെ കൊലപ്പെടുത്തുന്നയാൾക്ക് പ്രഖ്യാപിച്ച അഞ്ച് കോടി രൂപയുടെ പ്രതിഫലത്തുക അയാളുടെ കുടുംബത്തിന് സുരക്ഷിതമായി കൈമാറുമെന്നും, കുറ്റകൃത്യം ചെയ്യുന്നയാൾക്കെതിരെ വരുന്ന എല്ലാ നിയമനടപടികളുടെയും കോടതി ചെലവുകൾ താൻ തന്നെ നേരിട്ട് വഹിക്കുമെന്നും പരമഹംസ് ആചാര്യ അവകാശപ്പെട്ടു.
വിവാഹ വാർത്ത പുറത്തുവന്നതുമുതൽ മഹാരാഷ്ട്രയിൽ ബജ്രംഗ് ദൾ ഉൾപ്പെടെയുള്ള സംഘടനകൾ ആമിർ ഖാനെതിരെ പരസ്യ പ്രതിഷേധവുമായി രംഗത്തുണ്ട്. എന്നാൽ രണ്ട് മുതിർന്ന വ്യക്തികൾ നിയമപരമായി (Special Marriage Act) പരസ്പര സമ്മതത്തോടെ ചെയ്ത രജിസ്റ്റർ വിവാഹത്തെ ഇത്തരത്തിൽ വർഗ്ഗീയവത്കരിക്കുന്നതിനെതിരെ രാജ്യത്തെ നിയമവിദഗ്ദ്ധരും മനുഷ്യാവകാശ പ്രവർത്തകരും ശക്തമായി രംഗത്തുവന്നിട്ടുണ്ട്. ഒരു ഇന്ത്യൻ പൗരന് ഭരണഘടന ഉറപ്പുനൽകുന്ന ജീവിക്കാനുള്ള അവകാശത്തിനും വ്യക്തിസ്വാതന്ത്ര്യത്തിനും നേരെയുള്ള നഗ്നമായ വെല്ലുവിളിയാണ് ഈ കൊലവിളിയെന്നും, പരസ്യമായി വധഭീഷണി മുഴക്കിയ മതനേതാവിനെതിരെ യു.എ.പി.എ (UAPA) ഉൾപ്പെടെയുള്ള കടുത്ത വകുപ്പുകൾ ചുമത്തി ജാമ്യമില്ലാ കേസെടുത്ത് അറസ്റ്റ് ചെയ്യണമെന്നും അവർ ആവശ്യപ്പെടുന്നു.
Story Summary: Ayodhya-based religious leader Jagadguru Paramhans Acharya of Tapaswi Chhawani has announced a ₹5 crore bounty on Bollywood star Aamir Khan’s life following his marriage to Gauri Spratt under the Special Marriage Act. Paramhans backed Maharashtra Minister Nitesh Rane’s “love jihad” remarks against Aamir Khan and offered to cover the legal expenses of anyone who executes the attack. Legal experts and activists have strongly condemned the open death threat as a severe violation of constitutional rights and demanded strict action.
