ഉത്തർപ്രദേശിലെ മഹാരാജ്ഗഞ്ച് ജില്ലയിൽ നേപ്പാൾ അതിർത്തി കടക്കാൻ ശ്രമിച്ച 36-കാരനായ അമേരിക്കൻ പൗരനെ സശസ്ത്ര സീമാ ബൽ അറസ്റ്റ് ചെയ്തു. ജോർദാൻ ബ്രൗൺ എന്ന് സ്വയം പരിചയപ്പെടുത്തിയ ഇയാൾ കാലിഫോർണിയ സ്വദേശിയാണെന്നാണ് അവകാശപ്പെടുന്നത് (American Citizen Arrested). സോനൗളി പോലീസ് സ്റ്റേഷൻ പരിധിയിലെ അതിർത്തിയിൽ വെച്ച് ഞായറാഴ്ചയാണ് ഇയാളെ പിടികൂടിയത്. രേഖകളൊന്നുമില്ലാതെ അതിർത്തി കടക്കാൻ ശ്രമിച്ച ഇയാളെ പോലീസിന് കൈമാറി.
തായ്ലൻഡിൽ വെച്ച് പാസ്പോർട്ട് നഷ്ടപ്പെട്ടുവെന്നും മുൻ യുഎസ് നാവിക ഉദ്യോഗസ്ഥനാണെന്നും ഇയാൾ പോലീസിനോട് പറഞ്ഞു. തുടർന്ന് കടൽമാർഗം ശ്രീലങ്കയിലെത്തുകയും 2025 നവംബർ 2-ന് ഇന്ത്യയിലെത്തുകയും ചെയ്തു. കഴിഞ്ഞ ഏഴുമാസമായി ഗോവയിലാണ് ഇയാൾ താമസിച്ചിരുന്നത്. ഗോവയിൽ നിന്ന് ബംഗളൂരുവിലെത്തി, അവിടെനിന്നാണ് നേപ്പാൾ അതിർത്തിയായ സോനൗളിയിൽ എത്തിയത്. ഇയാളുടെ പക്കൽ നിന്ന് 31,460 രൂപയും രണ്ട് മൊബൈൽ ഫോണുകളും പിടിച്ചെടുത്തെങ്കിലും പാസ്പോർട്ടോ വിസയോ കണ്ടെത്താനായില്ല.
ഇയാളുടെ അവകാശവാദങ്ങൾ പോലീസ് പരിശോധിച്ചുവരികയാണ്. മതിയായ രേഖകളില്ലാതെ ഇന്ത്യയിൽ പ്രവേശിച്ചതിനും അതിർത്തി കടക്കാൻ ശ്രമിച്ചതിനും ഇമിഗ്രേഷൻ ആൻഡ് ഫോറിനേഴ്സ് ആക്ട് പ്രകാരം ഇയാൾക്കെതിരെ സോനൗളി പോലീസ് കേസെടുത്തു. ഇയാളെ ചോദ്യം ചെയ്യാനായി സുരക്ഷാ ഏജൻസികൾക്കും കൈമാറിയിട്ടുണ്ട്.
Summary: A 36-year-old American citizen, identified as Jordan Brown, was arrested by the Sashastra Seema Bal (SSB) while attempting to cross the India-Nepal border in Uttar Pradesh without valid travel documents. The individual, who claimed to be a former US Navy officer, had been residing in India since November 2025 after losing his passport in Thailand and is now facing legal action under the Immigration and Foreigners Act.
