ഷെങ്ഷൗ: ബിസിനസ്സിൽ വലിയ നഷ്ടം വരുത്തിയ ജീവനക്കാരനെ ശിക്ഷിക്കുന്നതിന് പകരം അദ്ദേഹത്തിന്റെ കടബാധ്യത എഴുതിത്തള്ളി മാതൃകയാവുകയാണ് ചൈനയിലെ ഒരു റസ്റ്റോറന്റ് ഉടമ ( Liang Zhengzhou restaurant fire). ഹെനാൻ പ്രവിശ്യയിലെ ഷെങ്ഷൗവിൽ ബർബിക്യൂ റസ്റ്റോറന്റ് നടത്തുന്ന ലിയാങ് എന്ന 45-കാരനാണ് തന്റെ ജീവനക്കാരനായ 27-കാരൻ ലിയുവിനോട് കാണിച്ച ഈ വിശാലമനസ്കതയിലൂടെ സമൂഹമാധ്യമങ്ങളിൽ താരമായിരിക്കുന്നത്.
കഴിഞ്ഞ ദിവസം ഷിഫ്റ്റ് മാറുന്നതിനിടെ പാചകക്കാരനായ ലിയു അടുപ്പിലെ തീ അണയ്ക്കാൻ മറന്നുപോയതാണ് വൻ തീപിടുത്തത്തിന് കാരണമായത്. റസ്റ്റോറന്റിന്റെ അടുക്കളയും സ്റ്റോർ റൂമും ഉൾപ്പെടെയുള്ള ഭാഗങ്ങൾ തീപിടുത്തത്തിൽ പൂർണ്ണമായും നശിച്ചു. ആർക്കും പരിക്കില്ലെങ്കിലും ബിസിനസിന് വലിയ സാമ്പത്തിക നഷ്ടമാണ് സംഭവിച്ചത്. തന്റെ അബദ്ധം മൂലം ഉണ്ടായ വലിയ സാമ്പത്തിക ബാധ്യതയിൽ മനംനൊന്ത ലിയു, നഷ്ടം നികത്താൻ തന്റെ ശമ്പളത്തിൽ നിന്ന് പ്രതിമാസം 3,000 യുവാൻ (ഏകദേശം 440 ഡോളർ) ഈടാക്കാമെന്ന് കാണിച്ച് ഉടമ ലിയാങ്ങിന് എഴുതി നൽകി.
എന്നാൽ, ഈ കടപ്പത്രം കണ്ട് ഉടമ ലിയാങ് അത് കീറിക്കളയുകയാണ് ചെയ്തത്. “നമുക്ക് ഒന്നിച്ച് മുന്നോട്ട് പോകാം, നീ ജോലി തുടരൂ,” എന്ന് പറഞ്ഞ് ലിയാങ് ലിയുവിനെ ചേർത്തുപിടിച്ചു. ഈ ചെറുപ്പക്കാരന്റെ ജീവിതം കടബാധ്യത കൊണ്ട് തകരാൻ താൻ ആഗ്രഹിക്കുന്നില്ലെന്നും, താൻ സ്വന്തമായി ആ നഷ്ടം ഏറ്റെടുക്കാൻ തയ്യാറാണെന്നും ലിയാങ് മാധ്യമങ്ങളോട് പ്രതികരിച്ചു.
ലിയാങ്ങിന്റെ ഈ തീരുമാനം വൈറലായതോടെ വലിയ പിന്തുണയാണ് റസ്റ്റോറന്റിലേക്ക് ഒഴുകിയെത്തുന്നത്. റസ്റ്റോറന്റ് അടച്ചിട്ട സമയത്തും ജീവനക്കാർക്ക് ശമ്പളം നൽകാൻ ലിയാങ് മടിച്ചില്ല. ലിയാങ്ങിന്റെ ഈ ‘മനുഷ്യത്വത്തിന് മുൻഗണന’ നൽകുന്ന ബിസിനസ് ശൈലി കണ്ട് റസ്റ്റോറന്റിന്റെ വാടക കുറയ്ക്കാൻ കെട്ടിട ഉടമയും, സഹായവുമായി ഫുഡ് ഡെലിവറി കമ്പനികളും മുന്നോട്ട് വന്നു. റസ്റ്റോറന്റ് വീണ്ടും തുറന്നതോടെ രാജ്യത്തിന്റെ വിവിധ ഭാഗങ്ങളിൽ നിന്ന് ആളുകൾ ഭക്ഷണം കഴിക്കാനും ഉടമയെ അഭിനന്ദിക്കാനും എത്തുകയാണ്.
ചൈനയിലെ പ്രശസ്തമായ പാംഡോങ്ലൈ റീട്ടെയിൽ ശൃംഖലയുടെ സ്ഥാപകൻ യു ഡോങ്ലായിയുടെ ആശയങ്ങളിൽ നിന്നാണ് താൻ പ്രചോദനം ഉൾക്കൊണ്ടതെന്ന് ലിയാങ് പറയുന്നു. ജീവനക്കാരെ സ്വന്തം കുടുംബത്തെപ്പോലെ കാണുന്ന ഈ ബിസിനസ് ശൈലി ഒടുവിൽ ലിയാങ്ങിനും വലിയ വിജയം നേടിക്കൊടുത്തു. ഒരു ബിസിനസ്സുകാരൻ എന്നതിലുപരി മികച്ചൊരു മനുഷ്യനായി ജീവിക്കാനാണ് താൻ ആഗ്രഹിക്കുന്നതെന്ന് ലിയാങ് പറഞ്ഞു.
Summary: A restaurant owner in Zhengzhou, China, has won nationwide praise for tearing up an IOU note from his chef, Liu, whose negligence caused a devastating fire at the eatery. Despite the heavy financial loss, the owner, Liang, chose to forgive the debt, stating he could not bear to see a young employee burdened by such a crisis. Following the incident, the restaurant has received an outpouring of support from the community, with locals and customers nationwide flocking to the reopened eatery to show their appreciation for the owner’s people-first business philosophy.
