പൂനെ: മഹാരാഷ്ട്രയിലെ ലോഹഗഡ് കോട്ടയിൽ വെച്ച് പൂനെ സ്വദേശിയായ യുവ വ്യവസായ പ്രമുഖൻ കേതൻ അഗർവാൾ (25) വീണ് മരിച്ച സംഭവത്തിൽ പുതിയ വെളിപ്പെടുത്തലുകൾ. കേസിൽ അറസ്റ്റിലായ കേതന്റെ പ്രതിശ്രുത വധു സിയ ഗോയൽ (20), കാമുകൻ ചേതൻ ചൗധരിയുമായി മാസങ്ങൾക്ക് മുൻപ് രഹസ്യമായി വിവാഹിതയായിരുന്നുവെന്നാണ് പുറത്തുവരുന്ന വിവരം.(Lohagad Fort Murder Case Siya Goyal Secret Marriage Chetan Chaudhary)
ഫെബ്രുവരിയിലായിരുന്നു കേതൻ അഗർവാളും സിയയും തമ്മിലുള്ള വിവാഹനിശ്ചയം കഴിഞ്ഞത്. തുടർന്ന് വരാനിരിക്കുന്ന നവംബറിൽ രാജസ്ഥാനിലെ ഉദയ്പൂരിൽ വെച്ച് പ്രൗഢഗംഭീരമായ വിവാഹം നടത്താൻ നിശ്ചയിച്ചിരിക്കെയാണ്, ജൂൺ 18-ന് ലോഹഗഡ് കോട്ടയിൽ വെച്ച് കേതൻ അഗർവാൾ ദുരൂഹസാഹചര്യത്തിൽ താഴ്ചയിലേക്ക് വീണ് മരിക്കുന്നത്. കേതനെ വിവാഹം കഴിക്കാൻ താല്പര്യമില്ലാതിരുന്ന സിയ, കാമുകൻ ചേതനുമായി ചേർന്ന് ആസൂത്രണം ചെയ്ത കൊലപാതകമായിരുന്നു ഇതെന്ന് പൂനെ റൂറൽ പോലീസ് നേരത്തെ കണ്ടെത്തിയിരുന്നു.
ഈ കൊലപാതകത്തിലേക്ക് നയിച്ച പ്രധാന കണ്ണികളിലേക്കാണ് ഇപ്പോൾ പോലീസ് എത്തിച്ചേർന്നിരിക്കുന്നത്. വിവാഹനിശ്ചയത്തിന് പിന്നാലെ, നാല് മാസം മുൻപ് സിയയും ചേതനും ഒരു ലോക്കൽ രജിസ്ട്രാർ ഓഫീസിൽ വെച്ച് സ്പെഷ്യൽ മാര്യേജ് ആക്ട് പ്രകാരം രഹസ്യമായി വിവാഹം കഴിച്ചിരുന്നുവെന്നാണ് വിവരം. ഇരുവരും വിവാഹമാലയണിഞ്ഞു നിൽക്കുന്ന ചിത്രങ്ങൾ ഒരു സ്വകാര്യ ഇൻസ്റ്റാഗ്രാം അക്കൗണ്ടിൽ നിന്നും ഡിലീറ്റ് ചെയ്തതായും കണ്ടെത്തിയിട്ടുണ്ട്. ഈ ചിത്രങ്ങൾ വീണ്ടെടുക്കാനുള്ള ശ്രമത്തിലാണ് പോലീസിന്റെ സാങ്കേതിക വിഭാഗം. കൂടാതെ ഇതിന് സാക്ഷികളായി ഒപ്പിട്ട സിയയുടെ രണ്ട് കോളേജ് സുഹൃത്തുക്കളെയും പോലീസ് ചോദ്യം ചെയ്തുവരികയാണ്.
നവംബറിലെ വിവാഹത്തിനായി പാസ്പോർട്ടും മറ്റ് ഔദ്യോഗിക രേഖകളും കേതന്റെ കുടുംബം സിയയോട് ആവശ്യപ്പെട്ടിരുന്നു. രേഖകൾ നൽകിയാൽ താൻ ചേതനെ രഹസ്യമായി വിവാഹം കഴിച്ച വിവരം പുറത്താകുമെന്ന ഭയത്തിലാണ് സിയ കൊലപാതകം വേഗത്തിലാക്കാൻ തീരുമാനിച്ചതെന്ന് അന്വേഷണസംഘം സംശയിക്കുന്നു. പരസ്യ നോട്ടീസ് ഒഴിവാക്കി രഹസ്യമായി വിവാഹ സർട്ടിഫിക്കറ്റ് സംഘടിപ്പിക്കാൻ പ്രതികൾ ആർക്കെങ്കിലും പണം നൽകിയിട്ടുണ്ടോ എന്നറിയാൻ ചേതന്റെ ബാങ്ക് അക്കൗണ്ടുകളും പോലീസ് പരിശോധിക്കുന്നുണ്ട്. ജൂൺ 18-ന് ലോഹഗഡ് കോട്ട സന്ദർശിക്കാനെത്തിയ കേതനെയും സിയയെയും ചേതൻ പിന്തുടരുകയും തുടർന്ന് ആസൂത്രിതമായി കേതനെ മലമുകളിൽ നിന്നും തള്ളിയിട്ട് കൊലപ്പെടുത്തുകയുമായിരുന്നു. നിലവിൽ സിയയും ചേതനും ജുഡീഷ്യൽ കസ്റ്റഡിയിലാണ്.
Story Summary
In a dramatic twist in the Pune Lohagad fort murder case, police suspect that 20-year-old accused Siya Goyal had secretly married her boyfriend Chetan Chaudhary before orchestrating the murder of her fiancé Ketan Agarwal. Investigators believe the murder plot was rushed after Agarwal’s family requested documents for their upcoming November wedding in Udaipur, which would have exposed the secret marriage. Both Goyal and Chaudhary are currently in judicial custody.
