കറാക്കസ്: വെനിസ്വേലയിൽ ഉണ്ടായ ഇരട്ട ഭൂകമ്പത്തിൽ ദുരിതമനുഭവിക്കുന്നവർക്ക് കൈത്താങ്ങുമായി ബ്രസീലിയൻ ഫുട്ബോൾ താരം നെയ്മർ ജൂനിയർ രംഗത്ത് ( Neymar Donation Venezuela). അടിയന്തര രക്ഷാപ്രവർത്തനങ്ങൾക്കും ദുരിതാശ്വാസത്തിനുമായി 250,000 ഡോളർ (ഏകദേശം രണ്ട് കോടിയിലധികം രൂപ) നെയ്മർ സംഭാവന ചെയ്തതായി വെനിസ്വേലൻ വാർത്താ ഏജൻസിയായ ‘എൽ സുമരിയോ’ റിപ്പോർട്ട് ചെയ്തു. ഭക്ഷണസാധനങ്ങൾ, ശുദ്ധജലം, മരുന്നുകൾ, താൽക്കാലിക പാർപ്പിട സൗകര്യങ്ങൾ എന്നിവ ലഭ്യമാക്കുന്നതിനായി ഈ തുക ഉപയോഗിക്കും.
ജൂൺ 24-ന് വെനിസ്വേലയിൽ ഉണ്ടായ 7.2, 7.5 തീവ്രതയുള്ള ഇരട്ട ഭൂകമ്പങ്ങളിൽ രാജ്യത്ത് വൻ നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. ഔദ്യോഗിക കണക്കുകൾ പ്രകാരം ഇതുവരെ 1,430-ലധികം ആളുകൾ കൊല്ലപ്പെടുകയും 3,200-ലധികം പേർക്ക് പരിക്കേൽക്കുകയും ചെയ്തു. ആയിരക്കണക്കിന് കുടുംബങ്ങൾ ഭവനരഹിതരായി. ല ഗ്വായറ, കാരക്കാസ് എന്നീ മേഖലകളിലാണ് ഭൂകമ്പം ഏറ്റവും കൂടുതൽ നാശം വിതച്ചത്. പലയിടത്തും ഇപ്പോഴും രക്ഷാപ്രവർത്തനം തുടരുകയാണ്. തുടർച്ചയായ തുടർചലനങ്ങളും ആവശ്യമായ യന്ത്രസാമഗ്രികളുടെ കുറവും രക്ഷാപ്രവർത്തനങ്ങൾക്ക് വെല്ലുവിളിയാകുന്നുണ്ട്.
“വെനിസ്വേലയിലെ ജനങ്ങൾക്കൊപ്പം എന്റെ ഹൃദയമുണ്ട്,” എന്ന് നെയ്മർ പ്രതികരിച്ചതായി മാധ്യമങ്ങൾ റിപ്പോർട്ട് ചെയ്തു. താൻ നൽകുന്ന സംഭാവന ബാധിക്കപ്പെട്ട കുടുംബങ്ങൾക്ക് ചെറിയൊരു ആശ്വാസമെങ്കിലും നൽകുമെന്നും അദ്ദേഹം പ്രത്യാശിച്ചു. നിലവിൽ ഫിഫ ലോകകപ്പിൽ ബ്രസീൽ ടീമിനൊപ്പം തന്റെ ഫിറ്റ്നസ് വീണ്ടെടുക്കുന്നതിലാണ് നെയ്മർ ശ്രദ്ധ കേന്ദ്രീകരിക്കുന്നത്. പരിക്കിനെത്തുടർന്ന് ആദ്യ രണ്ട് മത്സരങ്ങളിൽ പുറത്തിരുന്ന താരം, സ്കോട്ട്ലൻഡിനെതിരായ മത്സരത്തിൽ സബ്സ്റ്റിറ്റ്യൂട്ടായി കളത്തിലിറങ്ങിയിരുന്നു. ജപ്പാനെതിരായ നോക്കൗട്ട് മത്സരത്തിന് മുന്നോടിയായി നെയ്മറിന്റെ ഫിറ്റ്നസ് മെച്ചപ്പെട്ടതായി പരിശീലകൻ കാർലോ ആഞ്ചലോട്ടി സ്ഥിരീകരിച്ചു.
Summary: Brazilian football star Neymar Jr. has donated $250,000 to aid humanitarian relief efforts in Venezuela following devastating twin earthquakes (magnitudes 7.2 and 7.5) that struck the country on June 24, 2026. The disaster has claimed at least 1,430 lives and displaced thousands of families. Meanwhile, Neymar is currently in the US for the 2026 FIFA World Cup, where he is progressing well in his recovery from injury and is expected to play a larger role in Brazil’s upcoming Round of 32 clash against Japan.
