യുഎഇയിലെ പ്രവാസികൾക്കും വടക്കുകിഴക്കൻ ഇന്ത്യൻ സംസ്ഥാനങ്ങളിൽ നിന്നുള്ള യാത്രക്കാർക്കും വൻ യാത്രാസൗകര്യമൊരുക്കി എയർ ഇന്ത്യ എക്സ്പ്രസ് (Air India Express Dubai to Guwahati flight). ദുബായ്, അബുദാബി എന്നിവിടങ്ങളിൽ നിന്നും അസമിലെ ഗുവാഹത്തിയിലേക്ക് കമ്പനി പുതിയ നേരിട്ടുള്ള വിമാന സർവീസുകൾ പ്രഖ്യാപിച്ചു. ഇതോടെ, ഇന്ത്യയുടെ വടക്കുകിഴക്കൻ മേഖലയെയും പശ്ചിമേഷ്യയെയും തമ്മിൽ ബന്ധിപ്പിച്ച് നേരിട്ട് സർവീസ് നടത്തുന്ന ആദ്യ വിമാനക്കമ്പനിയെന്ന നേട്ടവും എയർ ഇന്ത്യ എക്സ്പ്രസ് സ്വന്തമാക്കി.
വരുന്ന ഓഗസ്റ്റ് നാല് മുതലാണ് ദുബായ് – ഗുവാഹത്തി സർവീസിന് തുടക്കമാകുക. അബുദാബി – ഗുവാഹത്തി സർവീസ് ഓഗസ്റ്റ് ഏഴിനും ആരംഭിക്കും.
വിമാന സമയ വിവരങ്ങൾ താഴെ പറയുന്ന പ്രകാരമാണ്:
ദുബായ് സർവീസ് (ചൊവ്വാഴ്ചകളിൽ): ഉച്ചയ്ക്ക് 12.25-ന് ഗുവാഹത്തിയിൽ നിന്ന് പുറപ്പെട്ട് ദുബായിലെത്തും. തിരിച്ച് വൈകിട്ട് 5.10-ന് ദുബായിൽ നിന്ന് ഗുവാഹത്തിയിലേക്ക് മടങ്ങും.
അബുദാബി സർവീസ് (വെള്ളിയാഴ്ചകളിൽ): രാവിലെ 11.30-ന് ഗുവാഹത്തിയിൽ നിന്ന് പുറപ്പെടുന്ന വിമാനം, വൈകിട്ട് 4.15-ന് അബുദാബിയിൽ നിന്ന് തിരികെ ഗുവാഹത്തിയിലേക്ക് തിരിക്കും.
യാത്രക്കാർക്ക് എയർ ഇന്ത്യ എക്സ്പ്രസിന്റെ ഔദ്യോഗിക വെബ്സൈറ്റ്, മൊബൈൽ ആപ്പ് എന്നിവ വഴിയും മറ്റ് പ്രമുഖ ബുക്കിംഗ് പോർട്ടലുകൾ വഴിയും ടിക്കറ്റുകൾ ലഭ്യമാണ്.
നിലവിൽ എയർ ഇന്ത്യ എക്സ്പ്രസിന്റെ പ്രധാന ഹബ്ബുകളിലൊന്നായ ഗുവാഹത്തിയിൽ നിന്ന് മാത്രം ആഴ്ചയിൽ 120 സർവീസുകൾ കമ്പനി നടത്തുന്നുണ്ട്. ഇതിന് പുറമെ വടക്കുകിഴക്കൻ നഗരങ്ങളായ ദിബ്രുഗഢ്, ദിമാപൂർ, ഇംഫാൽ, ഗുവാഹത്തി എന്നിവിടങ്ങളിൽ നിന്നായി ആഴ്ചയിൽ ആകെ 290 സർവീസുകളും എയർ ഇന്ത്യ എക്സ്പ്രസ് കൈകാര്യം ചെയ്യുന്നുണ്ട്.
വിമാനങ്ങളിൽ വടക്കുകിഴക്കൻ സംസ്കാരത്തിന്റെ ചായം
സർവീസുകൾക്ക് പുറമെ വടക്കുകിഴക്കൻ സംസ്ഥാനങ്ങളുടെ സാംസ്കാരിക പൈതൃകത്തിന് ആദരമർപ്പിച്ചാണ് എയർ ഇന്ത്യ എക്സ്പ്രസ് വിമാനങ്ങൾ ഡിസൈൻ ചെയ്തിരിക്കുന്നത്. വിമാനങ്ങളുടെ ടെയിൽ ആർട്ടിൽ (Tail Art) അസമിലെ ഗമോസ, ജാപി മോട്ടിഫുകൾ, നാഗാലാൻഡിന്റെ സുങ്കോടെപ്സു, മണിപ്പൂരിന്റെ അക്യോബി, മൊയ്രാങ് ഫീ, സഫീ ലാൻഫീ, അരുണാചൽ പ്രദേശിലെ ഇടു മിഷ്മി, മേഘാലയയുടെ ഖ്നെങ്, മിസോറാമിന്റെ പുവാൻചെ തുടങ്ങിയ പ്രശസ്തമായ പ്രാദേശിക കലാരൂപങ്ങളും നെയ്ത്തുശൈലികളും ഉൾപ്പെടുത്തിയിട്ടുണ്ട്.
Story Summary:
Air India Express has launched direct flight services connecting Dubai and Abu Dhabi to Guwahati, becoming the first airline to operate direct flights between Northeast India and the Gulf. The Dubai-Guwahati service will commence on August 4, followed by the Abu Dhabi-Guwahati service on August 7, 2026.
