ഇലക്ട്രിക്കൽ, ഓട്ടോമേഷൻ സാങ്കേതികവിദ്യകളിലൂടെ ഇന്ത്യയിലും വിദേശ വിപണികളിലുമായി 50 ജിഗാവാട്ടിലധികം സൗരോർജ്ജ ശേഷിക്ക് പിന്തുണ നൽകിയതായി ലോറിറ്റ്സ് നഡ്സൺ പ്രഖ്യാപിച്ചു (Lauritz Knudsen). ഏഴ് പതിറ്റാണ്ടിലേറെ പ്രവർത്തന പാരമ്പര്യമുള്ള കമ്പനിയുടെ ഈ നേട്ടം ഹരിത ഊർജ്ജ രംഗത്തെ സുപ്രധാന മുന്നേറ്റമായാണ് വിലയിരുത്തപ്പെടുന്നത്.
സൗരോർജ്ജ ഉൽപ്പാദനം വർധിപ്പിക്കുന്നതിൽ മാത്രം ഒതുങ്ങാതെ ശുദ്ധമായ ഊർജ്ജം കൂടുതൽ ആളുകളിലേക്ക് എത്തിക്കുന്നതിനാണ് കമ്പനി ശ്രദ്ധ കേന്ദ്രീകരിക്കുന്നത്. രാജ്യത്തെ വിവിധ സോളാർ പാർക്കുകൾക്ക് പുറമെ, കാർഷിക മേഖലയിലെ സോളാർ ജലസേചന പദ്ധതികൾക്കും വീടുകളിലെ സൗരോർജ്ജ ഉപയോഗം പ്രോത്സാഹിപ്പിക്കുന്ന പദ്ധതികൾക്കും കമ്പനിയുടെ സാങ്കേതികവിദ്യകൾ പിന്തുണ നൽകുന്നുണ്ട്.
ഇന്ത്യയിലെ പുനരുപയോഗ ഊർജ്ജ മേഖലയിൽ സൗരോർജ്ജത്തിന് വലിയ പങ്കാണുള്ളത്. നിലവിൽ രാജ്യത്തിന്റെ ആകെ പുനരുപയോഗ ഊർജ്ജ ശേഷിയിൽ 55 ശതമാനവും സൗരോർജ്ജത്തിൽ നിന്നാണെന്നും ആകെ സ്ഥാപിത സൗരോർജ്ജ ശേഷി 154 ജിഗാവാട്ട് പിന്നിട്ടതായും കമ്പനി ചൂണ്ടിക്കാട്ടുന്നു.
ഊർജ്ജ അടിസ്ഥാന സൗകര്യ വികസന രംഗത്ത് 70 വർഷത്തിലേറെ അനുഭവസമ്പത്തുള്ള ലോറിറ്റ്സ് നഡ്സൺ ഇതുവരെ 2,350-ലധികം സോളാർ പദ്ധതികൾക്ക് സാങ്കേതിക പിന്തുണ നൽകിയിട്ടുണ്ട്. 350-ലധികം ഇപിസി (EPC) പങ്കാളികളും 300-ലധികം ഡെവലപ്പർമാരും ഉൾപ്പെടുന്ന ശൃംഖലയുമായി കമ്പനി പ്രവർത്തിക്കുന്നു. കൂടാതെ, സോളാർ മേഖലയിലെ തദ്ദേശീയ ശേഷി വർധിപ്പിക്കുന്നതിനായി 300-ലധികം സിസ്റ്റം ഇന്റഗ്രേറ്റർമാർക്ക് പ്രത്യേക പരിശീലനവും നൽകിയിട്ടുണ്ട്.
യൂട്ടിലിറ്റി സ്കെയിൽ വൈദ്യുത പദ്ധതികൾ, വാണിജ്യ-വ്യവസായ മേഖല, ഗാർഹിക സൗരോർജ്ജ സംവിധാനങ്ങൾ എന്നിവയാണ് കമ്പനിയുടെ പ്രധാന പ്രവർത്തന മേഖലകൾ. സോളാർ പ്ലാന്റുകളുടെ സുരക്ഷയും കാര്യക്ഷമതയും വർധിപ്പിക്കാൻ സഹായിക്കുന്ന അഡ്വാൻസ്ഡ് എസി സൊല്യൂഷനുകൾ, ഡിസി സ്വിച്ച്ഗിയറുകൾ, സ്മാർട്ട് മീറ്ററിംഗ് സംവിധാനങ്ങൾ, ക്ലൗഡ് അധിഷ്ഠിത റിമോട്ട് മോണിറ്ററിംഗ് സാങ്കേതികവിദ്യകൾ എന്നിവയും കമ്പനി നൽകുന്നുണ്ട്.
2025-26 സാമ്പത്തിക വർഷത്തിൽ ഇന്ത്യയിലെ ആഭ്യന്തര സൗരോർജ്ജ ഉൽപ്പാദന രംഗം ശ്രദ്ധേയ വളർച്ച കൈവരിച്ച സാഹചര്യത്തിൽ, സോളാർ നിർമ്മാണ യൂണിറ്റുകൾക്ക് ആവശ്യമായ അത്യാധുനിക ഇലക്ട്രിക്കൽ അടിസ്ഥാനസൗകര്യങ്ങൾ ഒരുക്കുന്നതിലും കമ്പനി സജീവ പങ്കാളിത്തം വഹിച്ചിട്ടുണ്ടെന്ന് അധികൃതർ വ്യക്തമാക്കി.
നിലവിൽ 30-ലധികം രാജ്യങ്ങളിലേക്ക് ഉൽപ്പന്നങ്ങൾ കയറ്റുമതി ചെയ്യുന്ന ലോറിറ്റ്സ് നഡ്സണിന് ഇന്ത്യയിൽ തന്നെ ആഗോള നിലവാരത്തിലുള്ള നിരവധി നിർമ്മാണ കേന്ദ്രങ്ങളുണ്ട്.
Story Summary: Lauritz Knudsen has announced that its electrical and digital technologies now support more than 50 GW of solar energy capacity across India and international markets. The company has contributed to over 2,350 solar projects and continues to play a key role in advancing renewable energy infrastructure.
