ന്യൂഡൽഹി: ഇന്ത്യയിലെ തങ്ങളുടെ പ്രവർത്തനങ്ങൾ വിപുലീകരിക്കുന്നതിന്റെ ഭാഗമായി 48 ബില്യൺ ഡോളറിന്റെ വമ്പൻ നിക്ഷേപം പ്രഖ്യാപിച്ച് ആമസോൺ (Amazon India Investment). 2026 മുതൽ 2030 വരെയുള്ള അഞ്ച് വർഷ കാലയളവിലാണ് ഈ തുക നിക്ഷേപിക്കുക. പ്രധാനമന്ത്രി നരേന്ദ്ര മോദിയുമായി ന്യൂഡൽഹിയിൽ നടത്തിയ കൂടിക്കാഴ്ചയ്ക്ക് ശേഷമാണ് ആമസോൺ സി.ഇ.ഒ ആൻഡി ജാസ്സി ഈ നിർണ്ണായക പ്രഖ്യാപനം നടത്തിയത്. നേരത്തെ നിശ്ചയിച്ചിരുന്ന 35 ബില്യൺ ഡോളറിന്റെ നിക്ഷേപ പദ്ധതിയിൽ നിന്നും വർദ്ധിപ്പിച്ചാണ് ഈ പുതിയ തുക പ്രഖ്യാപിച്ചിരിക്കുന്നത്.
ഇന്ത്യൻ വിപണിയിലുള്ള വിശ്വാസവും വളർച്ചാ സാധ്യതയുമാണ് ഈ തീരുമാനത്തിന് പിന്നിലെന്ന് ആൻഡി ജാസ്സി വ്യക്തമാക്കി. എ.ഐ (ആർട്ടിഫിഷ്യൽ ഇന്റലിജൻസ്), ക്ലൗഡ് ഇൻഫ്രാസ്ട്രക്ചർ എന്നിവയ്ക്കായി മാത്രം 21 ബില്യൺ ഡോളറിലധികം തുക മാറ്റിവെക്കും. മുംബൈ, ഹൈദരാബാദ് എന്നിവിടങ്ങളിലെ ആമസോൺ വെബ് സർവീസസ് ഡാറ്റാ സെന്ററുകളുടെ ശേഷി വർദ്ധിപ്പിക്കാനും സ്റ്റാർട്ടപ്പുകൾക്കും മറ്റും അത്യാധുനിക എ.ഐ സേവനങ്ങൾ ലഭ്യമാക്കാനും ഇത് സഹായിക്കും. 2030-ഓടെ ഇന്ത്യയിൽ 3.8 ദശലക്ഷം തൊഴിലവസരങ്ങൾ സൃഷ്ടിക്കാനും, 80 ബില്യൺ ഡോളറിന്റെ ഇ-കൊമേഴ്സ് കയറ്റുമതി കൈവരിക്കാനും, 15 ദശലക്ഷം ചെറുകിട ബിസിനസുകൾക്ക് എ.ഐ സേവനങ്ങൾ എത്തിക്കാനും ആമസോൺ ലക്ഷ്യമിടുന്നു.
Summary: Amazon CEO Andy Jassy announced a record-breaking $48 billion investment in India between 2026 and 2030 following a meeting with Prime Minister Narendra Modi. This expanded commitment includes over $21 billion specifically dedicated to AI and cloud infrastructure, aiming to enhance AWS capacity in Mumbai and Hyderabad. By 2030, Amazon plans to support 3.8 million jobs, facilitate $80 billion in e-commerce exports, and empower 15 million small businesses with AI-driven digital tools, reinforcing its long-term partnership with India’s economic growth.
