ന്യൂഡൽഹി: ഇറാന്റെ പരമോന്നത നേതാവായിരുന്ന ആയത്തുല്ല അലി ഖാംനഈയുടെ ഖബറടക്ക ചടങ്ങിൽ പങ്കെടുക്കാൻ ഇന്ത്യൻ പ്രധാനമന്ത്രി നരേന്ദ്ര മോദിക്ക് ക്ഷണം ലഭിച്ചതായി നയതന്ത്ര വൃത്തങ്ങൾ സൂചിപ്പിക്കുന്നു (Narendra Modi). ഇറാൻ പ്രസിഡന്റ് മസൂദ് പെസഷ്കിയാനാണ് ഔദ്യോഗിക ക്ഷണം കൈമാറിയതെന്നാണ് വിവരം.
ജൂലൈ 5 മുതൽ 9 വരെ വിവിധ ഘട്ടങ്ങളിലായി ചടങ്ങുകൾ സംഘടിപ്പിക്കാനാണ് ഇറാൻ അധികൃതർ തീരുമാനിച്ചിരിക്കുന്നത്. എന്നാൽ ചടങ്ങിൽ പ്രധാനമന്ത്രി പങ്കെടുക്കുമോയെന്ന കാര്യത്തിൽ ഇന്ത്യയുടെ വിദേശകാര്യ മന്ത്രാലയമോ പ്രധാനമന്ത്രിയുടെ ഓഫീസോ ഇതുവരെ ഔദ്യോഗിക പ്രതികരണം നടത്തിയിട്ടില്ല.
മൂന്ന് പതിറ്റാണ്ടിലേറെക്കാലം ഇറാന്റെ പരമോന്നത നേതൃസ്ഥാനത്ത് പ്രവർത്തിച്ചിരുന്ന ഖാംനഈ, ഫെബ്രുവരി 28ന് ടെഹ്റാനെ ലക്ഷ്യമിട്ട് അമേരിക്കയും ഇസ്രായേലും നടത്തിയ വ്യോമാക്രമണത്തിനിടെയാണ് കൊല്ലപ്പെട്ടതെന്നാണ് റിപ്പോർട്ടുകൾ. സംഭവത്തിന് മാസങ്ങൾക്കുശേഷമാണ് ഔപചാരിക ഖബറടക്ക ചടങ്ങുകൾ നടക്കുന്നത്.
ജൂലൈ 5, 6, 7 തീയതികളിൽ ടെഹ്റാനും ഖോം നഗരവും കേന്ദ്രീകരിച്ചായിരിക്കും പ്രാരംഭ അനുസ്മരണ-മതചടങ്ങുകൾ നടക്കുക. തുടർന്ന് ജൂലൈ 9ന് മഷ്ഹദിൽ നടക്കുന്ന ചടങ്ങോടെയാണ് ഖബറടക്ക നടപടികൾ പൂർത്തിയാകുക.
ഇന്ത്യ-ഇറാൻ ബന്ധങ്ങളുടെ പശ്ചാത്തലത്തിൽ പ്രധാനമന്ത്രി മോദിയുടെ സാന്നിധ്യം സംബന്ധിച്ച തീരുമാനം നയതന്ത്ര തലത്തിൽ ശ്രദ്ധയോടെയാണ് വിലയിരുത്തപ്പെടുന്നത്.
Story Summary: Iran has reportedly invited Indian Prime Minister Narendra Modi to attend the funeral ceremonies of Supreme Leader Ayatollah Ali Khamenei. The ceremonies are scheduled from July 5 to 9, though India has not yet confirmed Modi’s participation.
