തിരുവനന്തപുരം: തലസ്ഥാനത്തെ നടുക്കി തിരക്കേറിയ ജംഗ്ഷനിൽ വെച്ച് സ്വകാര്യ ധനകാര്യ സ്ഥാപനത്തിന്റെ മാനേജറെ ഒരുകൂട്ടം ആളുകൾ ബലമായി തട്ടിക്കൊണ്ടുപോയതായി പരാതി (Bank manager abducted trivandrum). പൂവച്ചൽ ജംഗ്ഷനിൽ പ്രവർത്തിക്കുന്ന മുത്തൂറ്റ് ബാങ്ക് ശാഖാ മാനേജരും കണ്ടല സ്വദേശിയുമായ ഗിരീഷിനെയാണ് ആയുധധാരികളായ സംഘം തട്ടിക്കൊണ്ടുപോയത്. വ്യാഴാഴ്ച വൈകുന്നേരം ജോലി സമയം കഴിഞ്ഞ് വീട്ടിലേക്ക് പോകാനായി ഗിരീഷ് ഓഫീസിന് പുറത്തിറങ്ങിയ സമയത്താണ് നാടകീയമായ സംഭവങ്ങൾ അരങ്ങേറിയത്.
ഗിരീഷിന്റെ ബൈക്ക് പെട്ടെന്ന് കേടായതിനെ തുടർന്ന് ഓഫീസിലെ സഹപ്രവർത്തകന്റെ സഹായത്തോടെ ബൈക്ക് സ്റ്റാർട്ട് ചെയ്ത് കയറാൻ തുടങ്ങിയപ്പോഴാണ് പ്രതികൾ എത്തിയത്. ഈ സമയം അമിതവേഗതയിൽ പാഞ്ഞെത്തിയ ഒരു കാർ ഇവരുടെ ബൈക്കിന് തൊട്ടുമുന്നിലായി വെട്ടിത്തിരിച്ചു നിർത്തി വഴി തടസ്സപ്പെടുത്തി. തുടർന്ന് കാറിൽ നിന്നും മാരകായുധങ്ങളുമായി ഇറങ്ങിയ അഞ്ചുപേരും, തൊട്ടുപിന്നാലെ മറ്റ് രണ്ട് ബൈക്കുകളിലായി എത്തിയ രണ്ട് പേരും ചേർന്ന് ഗിരീഷിനെ വളയുകയും സഹപ്രവർത്തകനെ ഭീഷണിപ്പെടുത്തുകയുമായിരുന്നു.
തുടർന്ന് നാട്ടുകാർ നോക്കിനിൽക്കെ ഗിരീഷിനെ അക്രമിസംഘം ബലമായി കാറിനുള്ളിലേക്ക് തള്ളിക്കയറ്റി കാട്ടാക്കട ഭാഗത്തേക്ക് അതിവേഗം ഓടിച്ചുപോവുകയായിരുന്നു. അക്രമികൾ വന്ന ബൈക്കുകളും കാറിന് തൊട്ടുപിന്നാലെ അതിവേഗം പാഞ്ഞുപോയി. സംഭവസ്ഥലത്തുണ്ടായിരുന്ന സഹപ്രവർത്തകൻ ഉടനടി വിവരമറിയിച്ചതിനെ തുടർന്ന് കാട്ടാക്കട പോലീസ് സ്ഥലത്തെത്തി പ്രാഥമിക അന്വേഷണം ആരംഭിച്ചു. സാമ്പത്തിക ഇടപാടുകളാണോ തട്ടിക്കൊണ്ടുപോകലിന് പിന്നിലെന്ന് പോലീസ് സംശയിക്കുന്നുണ്ട്. പരിസരത്തെ സി.സി.ടി.വി (CCTV) ദൃശ്യങ്ങൾ കേന്ദ്രീകരിച്ച് പ്രതികൾക്കായി പോലീസ് വലവിരിച്ചു കഴിഞ്ഞു.
Story Summary: A private bank manager, Gireesh, was abducted by a 7-member gang from Poovachal Junction, Thiruvananthapuram. The incident occurred on Thursday evening when Gireesh, the manager of the Muthoot Bank branch, was leaving for home. As he was trying to start his bike, a car blocked his path, and the assailants forced him into the vehicle before speeding off towards Kattakada. Kattakada police have registered a case and initiated a search based on CCTV footage.
