തിരുവനന്തപുരം: തലസ്ഥാന ജില്ലയുടെ മലയോര മേഖലകളിൽ തുടർച്ചയായി പെയ്യുന്ന ശക്തമായ മഴയെ തുടർന്ന് നെയ്യാർ ഡാമിലെ (Neyyar Dam shutters opened,) ജലനിരപ്പ് ക്രമാതീതമായി ഉയരുന്നു. ജലനിരപ്പ് മൂന്നാം മുന്നറിയിപ്പ് നിലയായ റെഡ് അലർട്ടിലേക്ക് (Red Alert) അടുക്കുന്ന പശ്ചാത്തലത്തിൽ, മുൻകരുതലിന്റെ ഭാഗമായി ഡാമിന്റെ നാല് ഷട്ടറുകളും ഇന്ന് (ശനിയാഴ്ച) രാവിലെ 10 മണിക്ക് 20 സെന്റിമീറ്റർ വീതം ഉയർത്തി.
ജില്ലയിൽ കേന്ദ്ര കാലാവസ്ഥാ വകുപ്പിന്റെ മഴ മുന്നറിയിപ്പുകൾ നിലനിൽക്കുന്നതിനാലും ഡാമിന്റെ വൃഷ്ടിപ്രദേശങ്ങളിൽ നീരൊഴുക്ക് ശക്തമായതിനാലുമാണ് അടിയന്തിരമായി വെള്ളം പുറത്തുവിടാൻ അധികൃതർ തീരുമാനിച്ചത്. ഡാമിന്റെ ഷട്ടറുകൾ ഉയർത്തിയ സാഹചര്യത്തിൽ ഡാമിന് സമീപമുള്ള പ്രദേശങ്ങളിലെയും നെയ്യാർ നദിയുടെ ഇരുകരകളിലെയും താമസക്കാർ അതീവ ജാഗ്രത പാലിക്കണമെന്ന് തിരുവനന്തപുരം ജില്ലാ കളക്ടർ അനു കുമാരി അറിയിച്ചു.
ഷട്ടറുകൾ ഉയർത്തുന്നതോടെ നെയ്യാർ നദിയിലേക്കുള്ള ജലപ്രവാഹം ശക്തമായി വർദ്ധിക്കാനിടയുണ്ട്. അതിനാൽ നദിക്കരയിലുള്ളവരും താഴ്ന്ന പ്രദേശങ്ങളിൽ താമസിക്കുന്നവരും യാതൊരു കാരണവശാലും നദിയിൽ ഇറങ്ങരുതെന്നും പ്രത്യേക ശ്രദ്ധ പുലർത്തണമെന്നും ജില്ലാ ദുരന്തനിവാരണ അതോറിറ്റി നിർദ്ദേശിച്ചു. അടിയന്തിര സാഹചര്യങ്ങൾ നേരിടാൻ റവന്യൂ, ഫയർഫോഴ്സ് വിഭാഗങ്ങൾ സജ്ജമായിരിക്കാനും കളക്ടർ ഉത്തരവിട്ടിട്ടുണ്ട്.
Story Summary: The four shutters of the Neyyar Dam in Thiruvananthapuram were raised by 20 cm each today at 10:00 AM as the water level neared the red alert mark due to continuous heavy rainfall. District Collector Anu Kumari has issued a high alert for residents living near the dam and along the banks of the Neyyar River, warning them of increased water flow in low-lying areas.
