മെക്സിക്കോ സിറ്റി: ഫിഫ ലോകകപ്പ് 2026-ന്റെ ഉദ്ഘാടന മത്സരം ചരിത്രത്തിൽ ഇടംപിടിച്ചത് അസാധാരണമായ റെക്കോർഡോടെ. ആതിഥേയരായ മെക്സിക്കോയും ദക്ഷിണാഫ്രിക്കയും തമ്മിലുള്ള പോരാട്ടത്തിനിടെ മൂന്ന് താരങ്ങളാണ് ചുവപ്പ് കാർഡ് കണ്ട് പുറത്തായത് (Historic Red Cards FIFA). ഫിഫ ലോകകപ്പ് ചരിത്രത്തിൽ ഒരു ഉദ്ഘാടന മത്സരത്തിൽ മൂന്ന് ചുവപ്പ് കാർഡുകൾ പുറത്തെടുക്കുന്നത് ഇതാദ്യമായാണ്. എസ്റ്റാഡിയോ അസ്ടെക സ്റ്റേഡിയത്തിൽ നടന്ന മത്സരത്തിൽ ദക്ഷിണാഫ്രിക്കയെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തി മെക്സിക്കോ തങ്ങളുടെ ലോകകപ്പ് കാമ്പെയ്ന് ഉജ്ജ്വല തുടക്കം കുറിച്ചു.
മത്സരത്തിന്റെ തുടക്കം മുതൽ മെക്സിക്കോയുടെ ആധിപത്യമാണ് കണ്ടത്. ഒൻപതാം മിനിറ്റിൽ ജൂലിയൻ ക്വിനോണസിലൂടെ ആതിഥേയർ ആദ്യ ഗോൾ നേടി. ദക്ഷിണാഫ്രിക്കൻ പ്രതിരോധത്തിലെ പിഴവ് മുതലെടുത്തായിരുന്നു ക്വിനോണസിന്റെ ഗോൾ. തുടർന്ന് 67-ാം മിനിറ്റിൽ റൗൾ ജിമെനെസ് രണ്ടാമത്തെ ഗോൾ കൂടി അടിച്ചതോടെ മെക്സിക്കോ ലീഡ് ഉറപ്പിച്ചു. എന്നാൽ മത്സരത്തിന്റെ രണ്ടാം പകുതി അച്ചടക്കനടപടികൾക്കും സംഘർഷങ്ങൾക്കും സാക്ഷ്യം വഹിച്ചു.
49-ാം മിനിറ്റിൽ ദക്ഷിണാഫ്രിക്കൻ താരം സ്ഫെഫെലോ സിത്തോലെ ചുവപ്പ് കാർഡ് കണ്ട് പുറത്തായതോടെ ദക്ഷിണാഫ്രിക്ക പ്രതിസന്ധിയിലായി. പിന്നീട് 84-ാം മിനിറ്റിൽ മറ്റൊരു ദക്ഷിണാഫ്രിക്കൻ താരമായ തെംബ സ്വാനെയ്ക്കും ചുവപ്പ് കാർഡ് ലഭിച്ചതോടെ ടീം ഒൻപത് പേരായി ചുരുങ്ങി. മത്സരത്തിന്റെ അവസാന മിനിറ്റുകളിൽ മെക്സിക്കൻ പ്രതിരോധതാരം സീസർ മോണ്ടസും ചുവപ്പ് കാർഡ് കണ്ട് പുറത്തായി. ഒടുവിൽ ഒൻപത് പേരുമായി പൊരുതിയ ദക്ഷിണാഫ്രിക്കയെ പരാജയപ്പെടുത്തി മെക്സിക്കോ തങ്ങളുടെ ആദ്യ വിജയം ആഘോഷിച്ചു. എൺപതിനായിരത്തിലധികം കാണികളെ സാക്ഷിയാക്കി നടന്ന ഉദ്ഘാടന മത്സരം ഫുട്ബോൾ ലോകത്ത് വലിയ ചർച്ചയാവുകയാണ്.
Summary: Mexico secured a 2-0 victory over South Africa in the opening match of the 2026 FIFA World Cup at the iconic Estadio Azteca. The match made history as the first World Cup opener to feature three red cards, with two South African players and one Mexican player sent off during a high-intensity encounter.
