തിരുവനന്തപുരം: നിയമസഭാ തിരഞ്ഞെടുപ്പിലെ കനത്ത തോൽവിക്ക് പിന്നാലെ പാർട്ടിയിലും ഭരണത്തിലും സമഗ്രമായ തെറ്റുതിരുത്തൽ നടപടികളിലേക്ക് കടക്കാൻ സിപിഐഎം (CPIM Kerala State Committee). കടുത്ത രാഷ്ട്രീയ പ്രതിസന്ധികൾക്കിടയിലും ബംഗാളിന്റെ മാതൃകയിൽ കേരളത്തിൽ പ്രത്യേക പ്ലീനം വിളിക്കേണ്ടതില്ലെന്നാണ് നിലവിലെ തീരുമാനം. പകരം വരും മാസങ്ങളിൽ എല്ലാ തലങ്ങളിലുമുള്ള പാർട്ടി നേതാക്കളെയും പ്രവർത്തകരെയും പങ്കെടുപ്പിച്ചുകൊണ്ട് വിപുലീകൃത സംസ്ഥാന സമിതി വിളിച്ചുചേർക്കും. വരാനിരിക്കുന്ന ഓഗസ്റ്റ് മാസത്തിലാണ് വിപുലീകൃത സംസ്ഥാന സമിതി ചേരുകയെങ്കിലും ഇതിന്റെ കൃത്യമായ വേദിയും തീയതിയും പാർട്ടി പിന്നീട് തീരുമാനിക്കും. പ്രത്യേക പ്ലീനം വിളിച്ചുചേർക്കണമെന്ന് കേന്ദ്രകമ്മിറ്റിയിൽ ഉൾപ്പെടെ ശക്തമായ ആവശ്യങ്ങൾ ഉയർന്നിരുന്നെങ്കിലും സംസ്ഥാനത്തെ പ്രത്യേക രാഷ്ട്രീയ സാഹചര്യം കണക്കിലെടുത്ത് വിപുലീകൃത യോഗം മതിയെന്ന തീരുമാനത്തിലേക്ക് സംസ്ഥാന നേതൃത്വം എത്തുകയായിരുന്നു.
തിരഞ്ഞെടുപ്പ് തോൽവിയുടെ കാരണങ്ങളിൽ സംസ്ഥാനത്ത് ഭരണവിരുദ്ധ വികാരം ശക്തമായിരുന്നുവെന്ന് ഒടുവിൽ സിപിഐഎം ഔദ്യോഗികമായി സമ്മതിച്ചു. സംസ്ഥാന സമിതിയിൽ അവതരിപ്പിച്ച തിരഞ്ഞെടുപ്പ് അവലോകന റിപ്പോർട്ടിലാണ് സർക്കാരിന്റെ ചില ഭരണ നടപടികളോടും വിട്ടുവീഴ്ചകളോടും ജനങ്ങൾക്കിടയിൽ കടുത്ത എതിർപ്പുണ്ടായിരുന്നുവെന്ന് പാർട്ടി വിലയിരുത്തിയത്. ഇത് ജനങ്ങൾ കൂട്ടത്തോടെ ഇടതുപക്ഷത്തിന് എതിരായി വോട്ട് ചെയ്യാൻ കാരണമായി. ഒറ്റപ്പെട്ട നിലയിലുള്ള തിരുത്തലുകൾ കൊണ്ട് ഇനി ഫലമുണ്ടാകില്ലെന്നും പാർട്ടിയിലും ഭരണത്തിലും എല്ലാ തലങ്ങളിലും അടിയന്തരവും സമഗ്രവുമായ തിരുത്തൽ വേണമെന്നും റിപ്പോർട്ടിൽ വ്യക്തമാക്കുന്നു. സംസ്ഥാന സെക്രട്ടറിയേറ്റ് അവതരിപ്പിച്ച പ്രാഥമിക റിപ്പോർട്ടിൽ കടുത്ത തിരുത്തലുകളും കൂട്ടിച്ചേർക്കലുകളും വരുത്തിയാണ് സംസ്ഥാന സമിതി ഇത് അംഗീകരിച്ചത്.
മേഖലയിലെ വർഗ്ഗീയ വിരുദ്ധ നിലപാടുകൾ കൂടുതൽ ശക്തമാക്കാനും എല്ലാത്തരം വർഗ്ഗീയതയോടും ഇതുവരെ സ്വീകരിച്ച അഴകൊഴമ്പൻ സമീപനം പൂർണ്ണമായും അവസാനിപ്പിക്കാനും സംസ്ഥാന സമിതി തീരുമാനിച്ചിട്ടുണ്ട്. മുസ്ലിം ലീഗിന്റെ വർഗ്ഗീയ സമീപനങ്ങൾ കൃത്യമായി ജനങ്ങൾക്ക് മുന്നിൽ തുറന്നുകാട്ടും. ഒപ്പം എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെ പാർട്ടി ശക്തമായി തള്ളിപ്പറയും. യോഗത്തിൽ അവതരിപ്പിച്ച റിപ്പോർട്ടിലെ വെള്ളാപ്പള്ളിക്കെതിരായ പരാമർശങ്ങൾക്ക് കടുപ്പം പോരെന്ന വിമർശനം ഉയർന്നതിനെ തുടർന്ന് കൂടുതൽ കർശനമായ സമീപനം റിപ്പോർട്ടിൽ ഉൾപ്പെടുത്തിയിട്ടുണ്ട്. കൂടാതെ തളിപ്പറമ്പ്, പയ്യന്നൂർ മണ്ഡലങ്ങളിലെ സ്ഥാനാർത്ഥി നിർണ്ണയത്തിൽ സംഭവിച്ച ഗുരുതരമായ പാളിച്ചകളും പയ്യന്നൂരിൽ ആരോപണവിധേയനായ ടി.ഐ മധുസൂദനനെ വീണ്ടും പരിഗണിച്ചതിലെ വീഴ്ചയും അവലോകന റിപ്പോർട്ടിൽ പാർട്ടി അക്കമിട്ട് നിരത്തുന്നുണ്ട്.
Summary: In the wake of its recent Legislative Assembly election defeat, the CPIM Kerala state committee has decided to initiate extensive corrective measures across the party organizational framework and the government setup. Deviating from the Central Committee’s suggestion to hold a special plenum like West Bengal, the state leadership has opted to convene an extended State Committee meeting in August 2026 to deliberate on structural reforms.
