ടെഹ്റാൻ: ലബനനിലെ ഇസ്രയേൽ ആക്രമണങ്ങൾക്ക് മറുപടിയായി ഇസ്രയേലിനെ ലക്ഷ്യമാക്കി ഇറാൻ വൻ മിസൈൽ ആക്രമണം നടത്തി. ഇസ്രയേലിന്റെ വടക്കൻ മേഖലകളിലേക്ക് ഇറാൻ തൊടുത്ത മിസൈലുകൾ പ്രതിരോധ സംവിധാനങ്ങൾ ഉപയോഗിച്ച് തകർത്തതായി ഇസ്രായേൽ സൈന്യം അവകാശപ്പെട്ടു. എന്തുവിലകൊടുത്തും തിരിച്ചടിക്കുമെന്ന നിലപാടിലാണ് ഇസ്രായേൽ. എന്നാൽ ഇസ്രായേൽ പ്രത്യാക്രമണത്തിന് മുതിർന്നാൽ ആക്രമണം കൂടുതൽ തീവ്രമാകുമെന്ന് ഇറാനും മുന്നറിയിപ്പ് നൽകി.(Iran Israel Conflict, Middle East Tension Iran Israel Missile Strike)
ഇരുരാജ്യങ്ങളും തമ്മിലുള്ള സൈനിക നീക്കങ്ങൾ മേഖലയിൽ വലിയ ആശങ്കയാണ് പടർത്തുന്നത്. അമേരിക്കൻ സേന അതീവ ജാഗ്രതയിലാണ്. ഇറാൻ ആക്രമണത്തിന് മുതിർന്നാൽ തിരിച്ചടിക്കരുതെന്ന് യു എസ് പ്രസിഡന്റ് ഡൊണാൾഡ് ട്രംപ് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനോട് ആവശ്യപ്പെട്ടതായാണ് പുറത്തുവരുന്ന റിപ്പോർട്ടുകൾ. യു എസ് കേന്ദ്രങ്ങൾക്ക് നേരെ ആക്രമണം ഉണ്ടായേക്കാമെന്ന ഭീതിയിൽ ജോർദാനിലെ അമേരിക്കൻ എംബസി പൗരന്മാർക്ക് ജാഗ്രതാ നിർദേശം നൽകിയിട്ടുണ്ട്. വലിയൊരു യുദ്ധം ഒഴിവാക്കാൻ അന്താരാഷ്ട്ര തലത്തിൽ നയതന്ത്ര നീക്കങ്ങൾ സജീവമാണ്.
ബെയ്റൂട്ടിലെ ദഹിയേ കേന്ദ്രീകരിച്ച് ഇസ്രായേൽ നടത്തിയ വ്യോമാക്രമണമാണ് നിലവിലെ സംഘർഷങ്ങൾക്ക് തിരികൊളുത്തിയത്. ഹിസ്ബുള്ളയുടെ പ്രധാന കമാൻഡ് ആസ്ഥാനവും രഹസ്യ ഭൂഗർഭ ഓപ്പറേഷൻ റൂമും ലക്ഷ്യമിട്ടായിരുന്നു ആക്രമണം. ജനവാസ മേഖലയ്ക്ക് താഴെ പ്രവർത്തിച്ചിരുന്ന ഈ കേന്ദ്രം തകർത്തതായി ഇസ്രായേൽ സൈന്യം സ്ഥിരീകരിച്ചു. സ്ഫോടനത്തെത്തുടർന്ന് കെട്ടിടങ്ങൾ തകരുകയും പ്രദേശം പുകപടലങ്ങളാൽ നിറയുകയും ചെയ്തു. മേഖലയിൽ ഇപ്പോഴും അതിരൂക്ഷമായ യുദ്ധസാഹചര്യമാണ് നിലനിൽക്കുന്നത്.
Story Summary
Tensions in the Middle East have escalated following a retaliatory missile strike by Iran on Israel in response to Israeli airstrikes in Lebanon. As both nations exchange threats of further military action, global powers are engaged in urgent diplomatic efforts to prevent a full-scale regional war.
