തിരുവനന്തപുരം: സംസ്ഥാനത്ത് കാലവർഷം കനത്ത നാശനഷ്ടങ്ങൾ വിതച്ച് മുന്നേറുന്നു. ശക്തമായ മഴ തുടരുന്ന സാഹചര്യത്തിൽ വിവിധ ജില്ലകളിൽ കാലാവസ്ഥാ നിരീക്ഷണ കേന്ദ്രം ഓറഞ്ച്, യെല്ലോ അലർട്ടുകൾ പ്രഖ്യാപിച്ചു. തൃശ്ശൂർ മുതൽ കാസർകോട് വരെയുള്ള ജില്ലകളിൽ ഓറഞ്ച് അലർട്ടും, ഇടുക്കി മുതൽ തിരുവനന്തപുരം വരെയുള്ള ജില്ലകളിൽ യെല്ലോ അലർട്ടുമാണ് നിലവിലുള്ളത്. കേരള-ലക്ഷദ്വീപ് തീരങ്ങളിൽ മത്സ്യബന്ധനത്തിന് ഏർപ്പെടുത്തിയ വിലക്ക് തുടരും.(Monsoon Rains Cause Six Deaths And High Alert In Kerala)
കഴിഞ്ഞ ദിവസങ്ങളിലുണ്ടായ ശക്തമായ മഴയിലും കാറ്റിലും സംസ്ഥാനത്താകെ ആറ് പേരാണ് ദാരുണമായി മരണപ്പെട്ടത്. കാസർകോട് ആദൂരിൽ മഴയിൽ വീടിന്റെ മതിൽ ഇടിഞ്ഞുവീണ് രണ്ട് സഹോദരങ്ങൾ മരണപ്പെട്ടു. തൃശ്ശൂർ മണലൂരിൽ വീടിന് മുകളിൽ മരം വീണ് വിഷ്ണു എന്ന യുവാവ് മരിച്ചു. എറണാകുളം പട്ടിമറ്റത്ത് ചിറയിൽ കുളിക്കാനിറങ്ങിയ നബീൽ എന്ന വിദ്യാർത്ഥി മുങ്ങിമരിച്ചു. കോഴിക്കോട് കുറ്റ്യാടിപ്പുഴയിൽ ഒഴുക്കിൽപ്പെട്ട് രമ്യ, ഏഴ് വയസ്സുകാരനായ മകൻ ശിവാനന്ദ് എന്നിവർ മരണപ്പെട്ടു.
സംസ്ഥാനത്തിന്റെ വിവിധ ഭാഗങ്ങളിൽ വ്യാപകമായ നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. വരും ദിവസങ്ങളിലും ജാഗ്രത തുടരണമെന്ന് അധികൃതർ നിർദ്ദേശിച്ചു. താഴ്ന്ന പ്രദേശങ്ങളിൽ താമസിക്കുന്നവരും മലയോര മേഖലയിലുള്ളവരും അതീവ ജാഗ്രത പാലിക്കണമെന്നും സുരക്ഷാ നിർദ്ദേശങ്ങൾ കർശനമായി പാലിക്കണമെന്നും ദുരന്ത നിവാരണ അതോറിറ്റി മുന്നറിയിപ്പ് നൽകുന്നു.
Story Summary
Heavy monsoon rains continue to wreak havoc across Kerala, claiming six lives in various incidents, including drownings and structural collapses. The weather department has issued orange alerts for districts from Thrissur to Kasaragod and yellow alerts for the southern districts, while a fishing ban remains in effect along the coast.
