ഹവാന: ക്യൂബൻ പ്രസിഡന്റ് മിഗ്വേൽ ഡിയാസ്-കനലിനെതിരെ അമേരിക്ക പുതിയ ഉപരോധ നടപടികൾ പ്രഖ്യാപിച്ചു (US Sanctions Miguel Diaz Canel). കമ്യൂണിസ്റ്റ് ഭരണത്തിലുള്ള ക്യൂബയ്ക്കെതിരായ സമ്മർദ്ദം വർധിപ്പിക്കുന്നതിന്റെ ഭാഗമായാണ് ഈ നീക്കമെന്ന് അമേരിക്കൻ ട്രഷറി വകുപ്പ് അറിയിച്ചു. പ്രസിഡന്റിനൊപ്പം അദ്ദേഹത്തിന്റെ ഭാര്യ, മുൻ ക്യൂബൻ നേതാവ് റൗൾ കാസ്ട്രോയുടെ മകനും കൊച്ചുമകനും ഉൾപ്പെടെയുള്ളവരെയും ഉപരോധ പട്ടികയിൽ ഉൾപ്പെടുത്തിയിട്ടുണ്ട്. കഴിഞ്ഞ മാസം റൗൾ കാസ്ട്രോയ്ക്കെതിരെ അറസ്റ്റ് വാറണ്ട് പുറപ്പെടുവിച്ച അമേരിക്ക, ഇപ്പോൾ അദ്ദേഹത്തിന്റെ കുടുംബാംഗങ്ങൾക്കുമെതിരെ നടപടികൾ വ്യാപിപ്പിച്ചിരിക്കുകയാണ്.
ക്യൂബയുടെ സായുധ സേനാ മന്ത്രാലയം, സൈനിക വിഭാഗങ്ങൾ, കൂടാതെ ഭരണകൂട വിരുദ്ധ പ്രവർത്തനങ്ങൾ നിരീക്ഷിക്കുന്നതായി പറയപ്പെടുന്ന കമ്മിറ്റീസ് ഫോർ ദ ഡിഫൻസ് ഓഫ് ദ റെവല്യൂഷൻ എന്നീ സ്ഥാപനങ്ങൾക്കും ഉപരോധം ബാധകമാകും.
ക്യൂബയുടെ കമ്യൂണിസ്റ്റ് ഭരണകൂടം അമേരിക്കയുടെ ദേശീയ സുരക്ഷയ്ക്ക് ഭീഷണിയാണെന്നാണ് വാഷിങ്ടണിന്റെ നിലപാട്. ലാറ്റിൻ അമേരിക്കയിലെ ഇടതുപക്ഷ സർക്കാരുകളെ ദുർബലപ്പെടുത്താനുള്ള നീക്കങ്ങളുടെ ഭാഗമായാണ് ഈ നടപടികളെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. അതേസമയം, അമേരിക്കൻ പ്രസിഡന്റ് ഡൊണാൾഡ് ട്രംപ് ക്യൂബയ്ക്കെതിരായ കടുത്ത നിലപാട് വീണ്ടും ആവർത്തിച്ചു. ക്യൂബയുടെ സാമ്പത്തികവും ഊർജ മേഖലയുമായി ബന്ധപ്പെട്ട പ്രതിസന്ധികളെ ചൂണ്ടിക്കാട്ടിയ ട്രംപ്, രാജ്യം ഗുരുതര പ്രതിസന്ധിയിലൂടെയാണ് കടന്നുപോകുന്നതെന്ന് അഭിപ്രായപ്പെട്ടു.
ഇതിനിടെ, അമേരിക്കയുടെ നടപടി ക്യൂബയ്ക്കെതിരായ ഉപരോധവും സംഘർഷാന്തരീക്ഷവും കൂടുതൽ ശക്തമാക്കാനുള്ള ശ്രമമാണെന്ന് പ്രസിഡന്റ് ഡിയാസ്-കനൽ ആരോപിച്ചു. ക്യൂബൻ ജനങ്ങളെ ദോഷകരമായി ബാധിക്കുന്ന സമ്മർദ്ദ നയങ്ങളാണ് അമേരിക്ക പിന്തുടരുന്നതെന്നും അദ്ദേഹം സാമൂഹിക മാധ്യമങ്ങളിലൂടെ പ്രതികരിച്ചു.
ക്യൂബൻ വിദേശകാര്യ മന്ത്രി ബ്രൂണോ റോഡ്രിഗസും അമേരിക്കയുടെ നടപടിയെ ശക്തമായി വിമർശിച്ചു. രാജ്യത്തിന്റെ സ്വാതന്ത്ര്യത്തെയും പരമാധികാരത്തെയും ലക്ഷ്യമിട്ടുള്ള ഏത് നീക്കത്തെയും ക്യൂബൻ ജനത ഐക്യത്തോടെയും ദൃഢനിശ്ചയത്തോടെയും നേരിടുമെന്ന് അദ്ദേഹം വ്യക്തമാക്കി.
1962 മുതൽ അമേരിക്കൻ വ്യാപാര ഉപരോധം നേരിടുന്ന ക്യൂബ നിലവിൽ കടുത്ത സാമ്പത്തിക പ്രതിസന്ധിയിലാണ്. ഇന്ധനക്ഷാമം രൂക്ഷമായതിനെ തുടർന്ന് ദീർഘനേരത്തെ വൈദ്യുതി മുടക്കവും ജലക്ഷാമവും രാജ്യത്തിന്റെ പല ഭാഗങ്ങളിലും തുടരുകയാണ്. ഭക്ഷ്യവസ്തുക്കളുടെയും മരുന്നുകളുടെയും ലഭ്യതയും വലിയ വെല്ലുവിളിയായി മാറിയിട്ടുണ്ട്.
ഈ സാഹചര്യത്തിൽ മെക്സിക്കോയും ചൈനയും ഉൾപ്പെടെയുള്ള രാജ്യങ്ങളിൽ നിന്നുള്ള സഹായങ്ങളെയാണ് ക്യൂബ പ്രധാനമായും ആശ്രയിക്കുന്നത്. അമേരിക്കൻ ഉപരോധം കൂടുതൽ കടുപ്പിക്കുന്നതോടെ ക്യൂബയുടെ സാമ്പത്തികവും സാമൂഹികവുമായ പ്രതിസന്ധികൾ കൂടുതൽ രൂക്ഷമാകുമെന്നാണ് വിലയിരുത്തപ്പെടുന്നത്.
Summary: The United States has imposed new sanctions on Cuban President Miguel Diaz-Canel and several members of Cuba’s ruling establishment. The move marks an escalation in Washington’s pressure campaign against Cuba amid the island’s ongoing economic crisis, food shortages and power outages.
