തിരുവനന്തപുരം: നാലാഞ്ചിറയിൽ ഭാര്യ ഹസീനയെ ക്രൂരമായി കഴുത്തറത്ത് കൊലപ്പെടുത്തിയ ശേഷം ഒളിവിൽ പോയ ഭർത്താവ് സുരേഷിനെ (46) തമിഴ്നാട്ടിൽ മരിച്ച നിലയിൽ കണ്ടെത്തി (Nalanchira murder case). ചിദംബരം റെയിൽവേ ട്രാക്കിൽ ട്രെയിനിന് മുന്നിൽ ചാടി ആത്മഹത്യ ചെയ്ത നിലയിലാണ് മൃതദേഹം കണ്ടെത്തിയത്.
ബുധനാഴ്ച പുലർച്ചെ മകളുടെ കൺമുന്നിൽ വെച്ച് ഭാര്യയെ കൊലപ്പെടുത്തിയ ശേഷം കാറിൽ രക്ഷപ്പെട്ട സുരേഷിനായി പോലീസ് വ്യാപക തിരച്ചിൽ നടത്തിവരികയായിരുന്നു. സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ ഇയാളുടെ മൊബൈൽ ഫോൺ തിരുവനന്തപുരം കിള്ളിപ്പാലത്തുനിന്നും, സഞ്ചരിച്ചിരുന്ന കാർ ബാലരാമപുരത്തുനിന്നും ഉപേക്ഷിക്കപ്പെട്ട നിലയിൽ കണ്ടെത്തിയിരുന്നു. ഇതിന് ശേഷമായിരിക്കാം ഇയാൾ ട്രെയിൻ മാർഗ്ഗം തമിഴ്നാട്ടിലേക്ക് കടന്നതെന്നാണ് പോലീസ് നിഗമനം. ഒളിവിൽ പോകുന്നതിനിടെ മൂത്തമകളെ ഫോണിൽ വിളിച്ച് താൻ ആത്മഹത്യ ചെയ്യാൻ പോവുകയാണെന്ന് സുരേഷ് പറഞ്ഞിരുന്നതായി ബന്ധുക്കൾ വ്യക്തമാക്കിയിരുന്നു.
നാലാഞ്ചിറ മഠത്തുനടയിൽ തിരുപ്പതി ഭവനിൽ വാടകയ്ക്ക് താമസിക്കുന്ന ഹസീന (36) ആണ് ബുധനാഴ്ച പുലർച്ചെ 5.45-ഓടെ കൊല്ലപ്പെട്ടത്. ഹസീനയും സുരേഷും തമ്മിൽ ദീർഘനാളായി നിരന്തരം വഴക്കുണ്ടാകാറുണ്ടായിരുന്നു. കഴിഞ്ഞ ഒരാഴ്ചയായി ഹസീനയെ കാണാനില്ലെന്ന് കാട്ടി സുരേഷ് മണ്ണന്തല പോലീസിൽ പരാതി നൽകിയിരുന്നു. എന്നാൽ ചൊവ്വാഴ്ച തിരിച്ചെത്തിയ ഹസീന, താൻ സുഹൃത്തിന്റെ വീട്ടിലായിരുന്നുവെന്ന് പറഞ്ഞതോടെ ഇരുവരും തമ്മിൽ വീണ്ടും തർക്കമായി. തുടർന്ന് മണ്ണന്തല പോലീസ് ഇരുവിഭാഗത്തെയും സ്റ്റേഷനിൽ വിളിച്ചുവരുത്തി അനുനയിപ്പിച്ച് വിട്ടയച്ചെങ്കിലും വീട്ടിലെത്തിയ ശേഷവും വഴക്ക് തുടർന്നു. ഇതാണ് ഒടുവിൽ കൊലപാതകത്തിൽ കലാശിച്ചത്.
സുരേഷ് ഭാര്യയെ ക്രൂരമായി ആക്രമിക്കുന്നത് നേരിൽക്കണ്ട മൂത്തമകൾ അമൃതയാണ് ഉടൻ തന്നെ മണ്ണന്തല പോലീസിനെ ഫോണിൽ വിളിച്ച് വിവരമറിയിച്ചത്. കൃത്യം നടത്തിയ ശേഷം ചോരപ്പുരണ്ട കത്തി കുളിമുറിയിൽ കൊണ്ടുപോയി കഴുകി വെച്ച ശേഷമാണ് സുരേഷ് കാറിൽ കടന്നുകളഞ്ഞത്. ഹസീനയും സുരേഷും ഇവരുടെ നാല് മക്കളും ഒരു ബന്ധുവും അടങ്ങുന്ന കുടുംബം അഞ്ച് മാസം മുൻപാണ് നാലാഞ്ചിറയിലെ ഈ വീട്ടിൽ വാടകയ്ക്ക് താമസിക്കാൻ എത്തിയത്. മാതാപിതാക്കൾ രണ്ടുപേരും നഷ്ടപ്പെട്ടതോടെ ഈ നാല് മക്കളും ഇപ്പോൾ പൂർണ്ണമായും അനാഥരായ അവസ്ഥയിലാണ്.
Story Summary: Suresh, the accused in the murder of his wife Haseena at Nalanachira, was found dead on a railway track in Chidambaram, Tamil Nadu, after allegedly jumping in front of a train. Police revealed that after committing the crime in front of his daughter, Suresh abandoned his phone and car in Thiruvananthapuram before fleeing to Tamil Nadu.
