ചെന്നൈ: തമിഴ്നാട് സംസ്ഥാന ചലച്ചിത്ര പുരസ്കാരങ്ങൾ സ്റ്റാലിൻ സർക്കാർ പ്രഖ്യാപിച്ചു. 2016 മുതൽ 2022 വരെയുള്ള ഏഴ് വർഷത്തെ പുരസ്കാരങ്ങളാണ് ഒന്നിച്ച് പ്രഖ്യാപിച്ചിരിക്കുന്നത്. തമിഴ് സിനിമാ ലോകത്തെ ഈ വൻ പ്രഖ്യാപനത്തിൽ ഏറ്റവും ശ്രദ്ധേയമായത് മലയാള താരങ്ങളുടെ അപ്രമാദിത്വമാണ്. അടുത്ത മാസം 13-ന് ചെന്നൈയിൽ വെച്ച് പുരസ്കാരങ്ങൾ സമ്മാനിക്കും.(2016-22 Tamil Nadu State Film Awards announced together)
പ്രഖ്യാപിക്കപ്പെട്ട ഏഴ് വർഷത്തെ പുരസ്കാരങ്ങളിൽ അഞ്ച് വർഷവും മികച്ച നടിക്കുള്ള അവാർഡ് സ്വന്തമാക്കിയത് മലയാളികളാണ്. 2016-ൽ കീർത്തി സുരേഷ് (പാമ്പ് സട്ടൈ), 2017-ൽ നയൻതാര (അറം), 2019-ലും 2020-ലും മഞ്ജു വാര്യർ (അസുരൻ), 2021-ൽ ലിജോമോൾ ജോസ് (ജയ് ഭീം) എന്നിവരാണ് ഈ നേട്ടം കൈവരിച്ചത്. ഇവർക്ക് പുറമെ ഉർവശി (മികച്ച ഹാസ്യനടി – 2017), വൈക്കം വിജയലക്ഷ്മി (മികച്ച ഗായിക – 2016), വർഷ രഞ്ജിത്ത് (മികച്ച ഗായിക – 2020) എന്നിവരും മലയാളത്തിന്റെ അഭിമാനമായി പുരസ്കാര പട്ടികയിൽ ഇടംപിടിച്ചു.
2016 – 2018 കാലഘട്ടം 2016-ൽ ലോകേഷ് കനകരാജ് സംവിധാനം ചെയ്ത ‘മാനഗരം’ മികച്ച ചിത്രമായി തിരഞ്ഞെടുക്കപ്പെട്ടു. വിജയ് സേതുപതി മികച്ച നടനായും കീർത്തി സുരേഷ് മികച്ച നടിയായും തിരഞ്ഞെടുക്കപ്പെട്ടു. 2017-ൽ ഗോപി നൈനാർ സംവിധാനം ചെയ്ത ‘അറം’ ആണ് മികച്ച ചിത്രം. കാർത്തി മികച്ച നടനായും നയൻതാര മികച്ച നടിയായും പുരസ്കാരം നേടി. പുഷ്കർ-ഗായത്രി ജോഡിയാണ് ഈ വർഷത്തെ മികച്ച സംവിധായകർ. 2018-ൽ ‘പരിയേറും പെരുമാൾ’ മികച്ച ചിത്രമായപ്പോൾ ധനുഷും ജ്യോതികയും മികച്ച അഭിനേതാക്കളായി. മാരി സെൽവരാജ് ആണ് മികച്ച സംവിധായകൻ.
2019 – 2022 കാലഘട്ടം 2019-ലും 2020-ലും വെട്രിമാരൻ സംവിധാനം ചെയ്ത ‘അസുരൻ’ മികച്ച ചിത്രത്തിനുള്ള പുരസ്കാരം നേടി. പാർഥിപൻ (ഒത്ത സെരുപ്പ് സൈസ് 7) മികച്ച നടനായും മഞ്ജു വാര്യർ മികച്ച നടിയായും ഈ രണ്ട് വർഷങ്ങളിലും തിരഞ്ഞെടുക്കപ്പെട്ടു. പാർഥിപൻ തന്നെയാണ് ഈ വർഷങ്ങളിലെ മികച്ച സംവിധായകനും. 2021-ൽ ‘ജയ് ഭീം’ മികച്ച ചിത്രമായി തിരഞ്ഞെടുക്കപ്പെട്ടു. ആര്യ മികച്ച നടനായും ലിജോമോൾ ജോസ് മികച്ച നടിയായും ടി.ജെ. ജ്ഞാനവേൽ മികച്ച സംവിധായകനായും മാറി. 2022-ൽ ‘ഗാർഗി’ മികച്ച ചിത്രമായി. വിക്രം പ്രഭു മികച്ച നടനായും സായ് പല്ലവി മികച്ച നടിയായും ഗൗതം രാമചന്ദ്രൻ മികച്ച സംവിധായകനായും തിരഞ്ഞെടുക്കപ്പെട്ടു.
