അഹമ്മദാബാദ്: ഐപിഎൽ 2026 രണ്ടാം ക്വാളിഫയറിൽ ഗുജറാത്ത് ടൈറ്റൻസിനോട് പരാജയപ്പെട്ട് രാജസ്ഥാൻ റോയൽസ് പുറത്തായതിന് പിന്നാലെ, ടീം ക്യാപ്റ്റൻ റിയാൻ പരാഗ് നടത്തിയ പ്രതികരണത്തോട് വിയോജിപ്പ് പ്രകടിപ്പിച്ച് ഹെഡ് കോച്ച് കുമാർ സംഗക്കാര (Kumar Sangakkara on Riyan Parag Statement). ടീമിൽ പരിചയസമ്പത്ത് കുറഞ്ഞ യുവതാരങ്ങൾ കൂടുതൽ ഉണ്ടായിരുന്നതിനാൽ രാജസ്ഥാൻ റോയൽസ് ഇത്തവണ പ്ലേഓഫിൽ എത്തുമെന്ന് ആരും പ്രതീക്ഷിച്ചിരുന്നില്ലെന്ന പരാഗിന്റെ പ്രസ്താവനയാണ് സംഗക്കാര തള്ളിക്കളഞ്ഞത്.
ലീഗ് ഘട്ടത്തിലെ അവസാന മത്സരത്തിൽ ലഖ്നൗ സൂപ്പർ ജയന്റ്സിനെ പരാജയപ്പെടുത്തി നാലാം സ്ഥാനക്കാരായാണ് രാജസ്ഥാൻ പ്ലേഓഫിലേക്ക് യോഗ്യത നേടിയത്. തുടർന്ന് എലിമിനേറ്ററിൽ സൺറൈസേഴ്സ് ഹൈദരാബാദിനെ തകർത്താണ് ടീം ക്വാളിഫയർ രണ്ടിൽ എത്തിയത്. എന്നാൽ, പ്ലേഓഫ് യോഗ്യത തങ്ങൾ പോലും പ്രതീക്ഷിച്ചതല്ലെന്ന നായകന്റെ വാക്കുകളോട് തനിക്ക് ഒട്ടും യോജിക്കാൻ കഴിയില്ലെന്ന് ലങ്കൻ മുൻ ക്യാപ്റ്റൻ കൂടിയായ സംഗക്കാര വാർത്താസമ്മേളനത്തിൽ വ്യക്തമാക്കി.
കേവലം പ്രതിഭകളെ വളർത്തിയെടുക്കുക എന്ന ലക്ഷ്യം മാത്രമല്ല, ഐപിഎൽ കിരീടം നേടുക എന്ന കൃത്യമായ മാനസികാവസ്ഥയോടെയാണ് 2022 മുതൽ രാജസ്ഥാൻ റോയൽസ് താരങ്ങളെ ലേലത്തിൽ എടുക്കുന്നതെന്ന് സംഗക്കാര ഓർമ്മിപ്പിച്ചു. കളിക്കളത്തിൽ ഇറങ്ങി തൊട്ടടുത്ത നിമിഷം മുതൽ മത്സരങ്ങൾ ജയിപ്പിക്കാൻ ശേഷിയുള്ള താരങ്ങളെയാണ് മാനേജ്മെന്റ് ടീമിലെത്തിക്കുന്നത്. യുവതാരം വൈഭവ് സൂര്യവംശിയെ ആദ്യ ഇലവനിൽ ഉൾപ്പെടുത്തിയത് അവൻ മികച്ച പ്രകടനം പുറത്തെടുക്കാൻ പൂർണ്ണ പ്രാപ്തനാണെന്ന ബോധ്യമുള്ളതിനാലാണ്. ചില താരങ്ങൾക്ക് പരിചയക്കുറവുണ്ടെന്നത് ശരിയാണെങ്കിലും അവർ ടീമിലുള്ളത് കളി ജയിക്കാൻ വേണ്ടി മാത്രമാണെന്നും സംഗക്കാര കൂട്ടിച്ചേർത്തു. പ്രസ്താവനയിലെ വിയോജിപ്പുകൾക്കിടയിലും ക്യാപ്റ്റനെന്ന നിലയിൽ റിയാൻ പരാഗിന്റെ ആദ്യ സീസണിലെ മികച്ച നായകപാടവത്തെയും തീരുമാനങ്ങളെയും കോച്ച് അഭിനന്ദിക്കാനും മറന്നില്ല.
Summary: Rajasthan Royals head coach Kumar Sangakkara openly disagreed with captain Riyan Parag’s post-match comments suggesting the team was not expected to reach the IPL 2026 playoffs due to an inexperienced squad. Sangakkara emphasized that since 2022, the franchise’s philosophy shifted toward buying match-winning players capable of delivering immediate results rather than just focusing on development. Despite the tactical disagreement, the head coach highly praised Parag’s excellent leadership qualities during his first full season as the team’s skipper.
