ന്യൂഡൽഹി: രാജ്യസുരക്ഷ കൂടുതൽ ശക്തമാക്കുന്നതിന്റെ ഭാഗമായി ഇന്ത്യയുടെ അന്താരാഷ്ട്ര അതിർത്തികളിൽ നിന്ന് 15 കിലോമീറ്റർ ചുറ്റളവിലുള്ള മുഴുവൻ അനധികൃത നിർമ്മാണങ്ങളും അടിയന്തരമായി പൊളിച്ചുനീക്കാൻ ബന്ധപ്പെട്ട അധികാരികൾക്ക് കർശന നിർദ്ദേശം നൽകി കേന്ദ്ര ആഭ്യന്തര മന്ത്രി അമിത് ഷാ. അതിർത്തി സുരക്ഷയുമായി ബന്ധപ്പെട്ട തന്ത്രപ്രധാനമായ വിഷയങ്ങൾ ചർച്ച ചെയ്യുന്നതിനായി ചൊവ്വാഴ്ച രാജസ്ഥാനിലെ ബിക്കാനീറിൽ വിളിച്ചുചേർത്ത ഉന്നതതല സുരക്ഷാ അവലോകന യോഗത്തിലാണ് ആഭ്യന്തര മന്ത്രിയുടെ നിർണ്ണായക പ്രഖ്യാപനം.(Amit Shah Orders Demolition Illegal Constructions Near Borders Bikaner Security Meeting)
ഇന്ത്യ-പാകിസ്ഥാൻ അതിർത്തിയോട് ചേർന്നുള്ള രാജസ്ഥാനിലെ അതിർത്തി ജില്ലകളിലെ സുരക്ഷാ ക്രമീകരണങ്ങളും വെല്ലുവിളികളും യോഗത്തിൽ വിശദമായി വിലയിരുത്തി. രാജസ്ഥാൻ മുഖ്യമന്ത്രി ഭജൻലാൽ ശർമ്മ, മുതിർന്ന സംസ്ഥാന ഉദ്യോഗസ്ഥർ എന്നിവർക്ക് പുറമെ അതിർത്തി പങ്കിടുന്ന ബിക്കാനീർ, ജൈസാൽമീർ, ബാർമർ, ശ്രീ ഗംഗാനഗർ, ഫലോദി എന്നീ അഞ്ച് തന്ത്രപ്രധാന ജില്ലകളിലെ ജില്ലാ മജിസ്ട്രേറ്റുമാരും (DM) പോലീസ് സൂപ്രണ്ടുമാരും (SP) യോഗത്തിൽ പങ്കെടുത്തു.
അതിർത്തി കടന്നുള്ള പരമ്പരാഗത കള്ളക്കടത്ത് തടയുന്നതിനൊപ്പം, രാജ്യവിരുദ്ധ ശക്തികളുടെ സാമ്പത്തിക ശൃംഖല തകർക്കുക എന്ന ലക്ഷ്യത്തോടെ വിപുലമായ കർമ്മപദ്ധതിയാണ് ആഭ്യന്തര മന്ത്രാലയം മുന്നോട്ട് വെച്ചിരിക്കുന്നത്. അതിർത്തി മേഖലകളിൽ പ്രവർത്തിക്കുന്ന ബാങ്കുകൾ നടത്തുന്ന സാമ്പത്തിക ഇടപാടുകളുടെ നിയമപരവും സാമ്പത്തികവുമായ സുതാര്യത കർശനമായി ഉറപ്പാക്കണം. അതിർത്തി ജില്ലകളിലെ വൻകിട ബിസിനസ്സ് സ്ഥാപനങ്ങളുടെ ഫണ്ടിംഗ് സ്രോതസ്സുകൾ കൃത്യമായ ഇടവേളകളിൽ പരിശോധനയ്ക്ക് വിധേയമാക്കണം. അതിർത്തി ഗ്രാമങ്ങളിൽ വ്യാജ ആധാർ കാർഡുകൾ ഉപയോഗിച്ച് താമസിക്കുന്നവരെ കണ്ടെത്താൻ പ്രത്യേക ഡ്രൈവ് നടത്തണം. കള്ളപ്പണ ഇടപാടുകൾക്കായി ഉപയോഗിക്കുന്ന വ്യാജ ബാങ്ക് അക്കൗണ്ടുകളും ഷെൽ കമ്പനികളും ട്രാക്ക് ചെയ്യണം. അതിർത്തി കടന്നുള്ള മയക്കുമരുന്ന്, ആയുധ കള്ളക്കടത്തുകൾ പൂർണ്ണമായി നിയന്ത്രിക്കാൻ സുരക്ഷാ സേനകൾക്ക് കൂടുതൽ തദ്ദേശീയ പിന്തുണ ഉറപ്പാക്കണം.
രാജസ്ഥാൻ അതിർത്തി വഴി നടക്കുന്ന ഡ്രോൺ അധിഷ്ഠിത മയക്കുമരുന്ന്-ആയുധ കടത്തുകളെക്കുറിച്ച് യോഗത്തിൽ ഗൗരവമായ ചർച്ച നടന്നു. അതിർത്തി ജില്ലകളിൽ ഉണ്ടാകുന്ന കുറ്റകൃത്യങ്ങൾക്കും മയക്കുമരുന്ന് ഭീഷണിക്കും പിന്നിലെ യഥാർത്ഥ സ്രോതസ്സുകൾ, അവ കടത്തുന്ന രീതികൾ, ഇതിന് പിന്നിൽ പ്രവർത്തിക്കുന്ന അന്താരാഷ്ട്ര നെറ്റ്വർക്കുകൾ എന്നിവയെക്കുറിച്ച് വിശദമായ ശാസ്ത്രീയ പഠനം നടത്താൻ അതിർത്തി ജില്ലകളിലെ പോലീസ് മേധാവിമാർക്ക് നിർദ്ദേശം നൽകിയിട്ടുണ്ട്. ഈ സുരക്ഷാ പ്രശ്നങ്ങൾ ഭാവിയിൽ വീണ്ടും ഉണ്ടാകാതിരിക്കാൻ താൽക്കാലിക നടപടികൾക്ക് പകരം ശാശ്വത പരിഹാരങ്ങൾ വികസിപ്പിച്ചെടുക്കണമെന്ന് ആഭ്യന്തര മന്ത്രാലയം പുറത്തിറക്കിയ ഔദ്യോഗിക പ്രസ്താവനയിൽ വ്യക്തമാക്കുന്നു. തീരദേശ-അന്താരാഷ്ട്ര അതിർത്തികൾ കേന്ദ്രീകരിച്ച് കേന്ദ്ര ഗവൺമെന്റ് നടപ്പിലാക്കിവരുന്ന ‘സീറോ ടോളറൻസ്’ നയത്തിന്റെ ഭാഗമായാണ് പുതിയ നിയന്ത്രണങ്ങൾ.
Story Summary
Union Home Minister Amit Shah directed authorities to demolish all illegal constructions within a 15 km radius of India’s international borders. Chairing a high-level security review meeting in Bikaner on Tuesday, Shah assessed the security situation along the India-Pakistan border in Rajasthan, attended by Chief Minister Bhajan Lal Sharma and top officials from five border districts.
