കൊച്ചി: തന്റെ സന്തതസഹചാരിയും പ്രിയ സുഹൃത്തും ചലച്ചിത്ര നിർമ്മാതാവുമായ ആന്റണി പെരുമ്പാവൂരിന് ഹൃദയം നിറഞ്ഞ പിറന്നാൾ ആശംസകളുമായി മലയാളത്തിന്റെ പ്രിയനടൻ മോഹൻലാൽ (Mohanlal Antony Perumbavoor friendship). തന്റെ ഔദ്യോഗിക ഇൻസ്റ്റാഗ്രാം പേജിലൂടെ ഇരുവരും ഒന്നിച്ചുള്ള മനോഹരമായ ചിത്രം പങ്കുവെച്ചാണ് താരം ആശംസകൾ നേർന്നത്.
“പ്രിയപ്പെട്ട ആന്റണിക്ക് ജന്മദിനാശംസകൾ. സമാധാനവും നല്ല ആരോഗ്യവും സന്തോഷവും നിറഞ്ഞ ഒരു വർഷം ആശംസിക്കുന്നു. ജീവിതത്തിൽ ഒരുപാട് നല്ല നിമിഷങ്ങൾ സമ്മാനിക്കാൻ ഈ വർഷത്തിന് കഴിയട്ടെ,” എന്ന് മോഹൻലാൽ കുറിച്ചു.
ജന്മദിനത്തോടൊപ്പം തന്നെ ആന്റണി പെരുമ്പാവൂരിന്റെ വിവാഹവാർഷികവും ഇതേ ദിവസം ആണെന്ന പ്രത്യേകത കൂടിയുണ്ട്. ആന്റണിക്കും ഭാര്യ ശാന്തിക്കും ഹൃദ്യമായ ഭാഷയിലാണ് താരം വിവാഹവാർഷിക ആശംസകൾ നേർന്നത്.
“നിങ്ങൾക്കും ശാന്തിക്കും വിവാഹവാർഷിക ആശംസകൾ. ഒരുമിച്ച് കെട്ടിപ്പടുത്ത ജീവിതത്തെ കൃതജ്ഞതയോടെ ഓർക്കാനും, വരാനിരിക്കുന്ന മനോഹരമായ ജീവിതയാത്രയെ ഏറെ ആവേശത്തോടെ വരവേൽക്കാനും നിങ്ങൾക്ക് സാധിക്കട്ടെ,” മോഹൻലാൽ കൂട്ടിച്ചേർത്തു.
മോഹൻലാലിന്റെ സിനിമാ കരിയറിന്റെ തുടക്ക കാലം മുതൽ തന്നെ ആന്റണിയും അദ്ദേഹത്തോടൊപ്പമുണ്ട്. വർഷങ്ങൾക്ക് മുമ്പ് വെറും 22 ദിവസത്തേക്ക് ‘പട്ടണപ്രവേശം’ എന്ന സിനിമയുടെ ലൊക്കേഷനിൽ താൽക്കാലിക ഡ്രൈവറായി വന്നതാണ് ആൻ്റണി പെരുമ്പാവൂർ. പിന്നീട്, ‘മൂന്നാംമുറ’ എന്ന ചിത്രത്തിന്റെ ഷൂട്ടിങ് ലൊക്കേഷനിലെ വലിയ ആൾക്കൂട്ടത്തിനിടയിൽ വെച്ച് ആന്റണിയെ വീണ്ടും കണ്ടപ്പോൾ മോഹൻലാൽ അദ്ദേഹത്തെ തന്റെ പേഴ്സണൽ ഡ്രൈവറായി കൂടെ ക്ഷണിക്കുകയായിരുന്നു. പിൽക്കാലത്ത് അത് വെറുമൊരു ഔദ്യോഗിക ബന്ധത്തിനപ്പുറം മോഹൻലാലിൻറെ ഏറ്റവും അടുത്ത ആത്മമിത്രമായി മാറുന്നതിലേക്ക് വഴിമാറി.
ഇന്ന് മലയാള സിനിമയിലെ ഏറ്റവും വലിയ നിർമ്മാണ കമ്പനികളിലൊന്നായ ആശിര്വാദ് സിനിമാസിന്റെ (Aashirvad Cinemas) അമരക്കാരനാണ് ആന്റണി പെരുമ്പാവൂർ. മോഹൻലാലിന്റെ കരിയറിലെ വമ്പൻ ഹിറ്റുകളായ നരസിംഹം, രാവണപ്രഭു, നരൻ, ദൃശ്യം, ലൂസിഫർ എന്നു തുടങ്ങി മുപ്പത്തിയഞ്ചോളം ബിഗ് ബജറ്റ് ചിത്രങ്ങളുടെ നിർമ്മാതാവ് ആന്റണിയാണ്. കഴിഞ്ഞ 24 വർഷത്തോളമായി സിനിമാ നിർമ്മാണരംഗത്തെ പ്രമുഖ ശക്തിയായി ആശിർവാദ് സിനിമാസ് നിലകൊള്ളുന്നു. മോഹൻലാലിന്റെ പുതിയ ചിത്രങ്ങളുടെ അപ്ഡേറ്റുകൾക്കായി കാത്തിരിക്കുന്ന ആരാധകരും ഈ പോസ്റ്റിന് താഴെ ആശംസകളുമായി എത്തിയിട്ടുണ്ട്.
Story Summary: Actor Mohanlal wished his close friend and producer Antony Perumbavoor a happy birthday and wedding anniversary through an emotional Instagram post. The actor recalled their lifelong bond, which started on the sets of Pattana Pravesham and Moonnam Mura.
