തിരുവനന്തപുരം: പുതുതായി അധികാരമേറ്റ വി.ഡി. സതീശൻ യു.ഡി.എഫ് സർക്കാരിന് കീഴിൽ പുതുതായി രൂപീകരിച്ച വയോജന ക്ഷേമ വകുപ്പ് സി.എം.പി നേതാവും ഗതാഗത മന്ത്രിയുമായ സി.പി. ജോണിന് നൽകാൻ മുന്നണിയിൽ ധാരണയായി (CP John Elder Welfare Department). ഇതുസംബന്ധിച്ച ഔദ്യോഗിക പ്രഖ്യാപനം വരുംദിവസങ്ങളിൽ തന്നെയുണ്ടാകും. വി.ഡി. സതീശൻ മന്ത്രിസഭയുടെ വകുപ്പ് വിഭജന ചർച്ചകൾ പൂർത്തിയാക്കി ഗവർണർ നേരത്തെ വിജ്ഞാപനം ഇറക്കിയിരുന്നെങ്കിലും, വയോജനക്ഷേമ വകുപ്പ് ആര് കൈകാര്യം ചെയ്യുമെന്ന കാര്യത്തിൽ അന്തിമ തീരുമാനമായിരുന്നില്ല. ആദ്യ മന്ത്രിസഭായോഗത്തിലാണ് വയോജനങ്ങളുടെ ക്ഷേമത്തിനായി മാത്രമായി ഇത്തരമൊരു പുതിയ വകുപ്പ് രൂപീകരിക്കാൻ നയപരമായ തീരുമാനമെടുത്തത്. വകുപ്പ് വിഭജന ചർച്ചകളിൽ സഹകരണം, തുറമുഖം എന്നീ വകുപ്പുകളാണ് സി.എം.പി ആവശ്യപ്പെട്ടിരുന്നതെങ്കിലും വികസന കാഴ്ചപ്പാടുകളും ആസൂത്രണ ബോർഡ് മുൻ അംഗമെന്ന നിലയിലുള്ള ഭരണപരിചയവും കണക്കിലെടുത്ത് വയോജനക്ഷേമം കൂടി സി.പി. ജോണിനെ ഏൽപ്പിക്കാൻ യു.ഡി.എഫ് നേതൃത്വം തീരുമാനിക്കുകയായിരുന്നു.
പുതിയ വകുപ്പ് കൂടി ലഭിക്കുന്നതോടെ, ലോക്സഭാ തെരഞ്ഞെടുപ്പ് വേളയിൽ ‘ഇന്ദിരാ ഗ്യാരന്റി’ എന്ന പേരിൽ രാഹുൽ ഗാന്ധി പ്രഖ്യാപിച്ച അഞ്ചിന കർമ്മപദ്ധതികളിൽ ഏറ്റവും സുപ്രധാനമായ രണ്ട് പദ്ധതികൾ നടപ്പാക്കാനുള്ള വലിയ ചുമതലയാണ് സി.പി. ജോണിലേക്ക് വന്നുചേരുന്നത്. കെ.എസ്.ആർ.ടി.സി ബസുകളിൽ സ്ത്രീകൾക്ക് പ്രഖ്യാപിച്ച സൗജന്യ യാത്രാ പദ്ധതി നടപ്പാക്കേണ്ടത് നിലവിൽ ഗതാഗത മന്ത്രിയായ അദ്ദേഹത്തിന്റെ ചുമതലയാണ്; ജൂൺ 15 മുതലാണ് സംസ്ഥാനത്ത് വനിതകൾക്കായി ഈ സൗജന്യ യാത്ര ആരംഭിക്കുന്നത്. ഇതിന് പുറമെയാണ് വയോജനങ്ങളുടെ ആരോഗ്യ സംരക്ഷണം, സാമൂഹിക സുരക്ഷിതത്വം, കൃത്യമായ പ്രതിമാസ പെൻഷൻ വിതരണം, അവർ നേരിടുന്ന ഒറ്റപ്പെടലുകൾക്ക് ശാശ്വത പരിഹാരം കാണൽ എന്നിവ ലക്ഷ്യമിട്ട് രൂപീകരിച്ച വയോജനക്ഷേമ വകുപ്പിന്റെ നിയന്ത്രണവും അദ്ദേഹത്തിന് കൈവരുന്നത്. വയോധികരുടെ അവകാശങ്ങൾ സംരക്ഷിക്കുന്നതിലും അവർക്ക് കൃത്യമായ പരിചരണം ഉറപ്പാക്കുന്നതിലും ഈ പുതിയ വകുപ്പിന്റെ പ്രവർത്തനം നിർണ്ണായകമായിരിക്കുമെന്നാണ് വിലയിരുത്തൽ.
Summary: The newly formed Department of Well-being of Senior Citizens under the UDF government is likely to be allocated to CMP leader and Transport Minister C.P. John. With this additional portfolio, C.P. John will head two major initiatives under Rahul Gandhi’s five-point ‘Indira Guarantee,’ including the free KSRTC bus travel scheme for women starting June 15. The new department aims to focus on the health, social security, and timely pension distribution for the elderly, utilizing John’s extensive administrative experience as a former Planning Board member.
