ന്യൂഡൽഹി: രാജ്യത്ത് ഉഷ്ണതരംഗം അതിരൂക്ഷമായി തുടരുന്നതിനിടയിൽ, ഇന്ത്യയിലെ പ്രതിദിന വൈദ്യുതി ആവശ്യകത റെക്കോർഡുകൾ ഭേദിച്ച് കുതിക്കുന്നു (India Power Demand Record High). തുടർച്ചയായ നാലാം ദിവസമാണ് രാജ്യത്തെ വൈദ്യുതി ഉപഭോഗം എക്കാലത്തെയും ഉയർന്ന നിരക്കിലെത്തുന്നത്. മെയ് 21-ന് പകൽ സമയത്തെ ഏറ്റവും ഉയർന്ന വൈദ്യുതി ആവശ്യകത 270.82 ജിഗാവാട്ട് ആയി ഉയർന്നതായി കേന്ദ്ര ഊർജ്ജ മന്ത്രാലയം അറിയിച്ചു. ഈ വേനൽക്കാലത്ത് രേഖപ്പെടുത്തുന്ന ഏറ്റവും ഉയർന്ന നിരക്കാണിത്.
മെയ് 18-ന് 257.37 ജിഗാവാട്ട് ആയിരുന്ന വൈദ്യുതി ആവശ്യകത, മെയ് 19-ന് 260.45 ജിഗാവാട്ടായും മെയ് 20-ന് 265.44 ജിഗാവാട്ടായും തുടർച്ചയായി ഉയരുകയായിരുന്നു. സാധാരണയായി ഉച്ചയ്ക്ക് 2 മണിക്കും 4 മണിക്കും ഇടയിലാണ് രാജ്യത്ത് ഏറ്റവും ഉയർന്ന ഉപഭോഗം രേഖപ്പെടുത്തുന്നത്. കടുത്ത വേനൽ സാഹചര്യങ്ങളിലും വർദ്ധിച്ചുവരുന്ന വൈദ്യുതി ആവശ്യകത നിറവേറ്റാൻ സർക്കാർ പൂർണ്ണ സജ്ജമാണെന്ന് വ്യക്തമാക്കിയ മന്ത്രാലയം, പീക്ക് സമയങ്ങളിൽ വൈദ്യുതി പരമാവധി യുക്തിസഹമായി ഉപയോഗിക്കാനും അനാവശ്യ ഉപഭോഗം ഒഴിവാക്കാനും ജനങ്ങളോട് അഭ്യർത്ഥിച്ചു. ഇന്ത്യയിലെ പല സംസ്ഥാനങ്ങളും നിലവിൽ കടുത്ത ചൂടിലാണ്. ഉത്തർപ്രദേശിലെ ബന്ദയിൽ ഈ സീസണിലെ ഏറ്റവും ഉയർന്ന താപനിലയായ 48 ഡിഗ്രി സെൽഷ്യസ് രേഖപ്പെടുത്തി. ഡൽഹി, ഹരിയാന, പഞ്ചാബ്, രാജസ്ഥാൻ, മധ്യപ്രദേശ് തുടങ്ങിയ സംസ്ഥാനങ്ങളിൽ വരും ദിവസങ്ങളിലും ഉഷ്ണതരംഗം തുടരുമെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
Summary: India’s daytime peak power demand broke records for the fourth consecutive day, touching an all-time summer high of 270.82 GW on May 21 amid worsening heatwave conditions. According to the Union Ministry of Power, the peak demand steadily climbed from 257.37 GW on May 18 to over 270 GW, with maximum consumption consistently logged between 2 pm and 4 pm.
