മുംബൈ: ബോളിവുഡ് താരം രാജ് ബബ്ബറിന്റെ വ്യക്തിജീവിതവും അദ്ദേഹത്തിന്റെ പ്രണയബന്ധങ്ങളും എന്നും മാധ്യമങ്ങളിൽ ചർച്ചാവിഷയമാണ്. ഇപ്പോഴിതാ, രാജ് ബബ്ബറിന് നടി രേഖയുമായി പ്രണയമുണ്ടായിരുന്നോ എന്ന ഗോസിപ്പുകളോട് പ്രതികരിച്ച് രംഗത്തെത്തിയിരിക്കുകയാണ് മകൻ ആര്യ ബബ്ബർ (Raj Babbar Rekha Rumored Affair). മാധ്യമപ്രവർത്തകൻ വിക്കി ലൽവാനിയുമായുള്ള അഭിമുഖത്തിനിടയിലാണ് തന്റെ പിതാവിന്റെ ജീവിതത്തെക്കുറിച്ചും രേഖയുമായി ബന്ധപ്പെടുത്തിയുള്ള ചോദ്യങ്ങളോടും ആര്യ തുറന്ന നിലപാട് വ്യക്തമാക്കിയത്.
രേഖയുമായി രാജ് ബബ്ബറിന് പ്രണയമുണ്ടായിരുന്നോ എന്ന ചോദ്യത്തിന്, “അദ്ദേഹത്തിന് രേഖയോട് ആകർഷണം തോന്നിയിരുന്നോ എന്നാണ് ചോദിക്കുന്നതെങ്കിൽ—അവർ അത്രയും സുന്ദരിയാണ്, ആർക്കാണ് അവരോട് ആകർഷണം തോന്നാത്തത്? നിങ്ങൾക്ക് തോന്നില്ലേ? എനിക്ക് തോന്നും. അപ്പോൾ അദ്ദേഹത്തിന് അങ്ങനെ തോന്നിയിട്ടുണ്ടെങ്കിൽ അതിൽ എന്താണ് തെറ്റ്? അത് തികച്ചും സ്വാഭാവികമായ ഒരു മനുഷ്യസഹജമായ കാര്യമല്ലേ,” എന്നായിരുന്നു ആര്യയുടെ മറുപടി. ‘അഗർ തും നാ ഹോഥേ’, ‘ഝൂട്ടി’, ‘അമീരി ഗരീബി’, ‘ഇൻസാഫ് കി ആവാസ്’ തുടങ്ങി നിരവധി ചിത്രങ്ങളിൽ രാജ് ബബ്ബറും രേഖയും ഒന്നിച്ച് അഭിനയിച്ചിട്ടുണ്ട്.
തന്റെ പിതാവിന്റെ സിനിമാ ജീവിതത്തെക്കാളും നേട്ടങ്ങളെക്കാളും ആളുകൾ ഇപ്പോഴും അദ്ദേഹത്തിന്റെ പഴയ പ്രണയബന്ധങ്ങളെക്കുറിച്ച് സംസാരിക്കുന്നതിലുള്ള അതൃപ്തിയും ആര്യ പങ്കുവെച്ചു. തനിക്ക് നാലോ അഞ്ചോ വയസ്സുള്ളപ്പോൾ നടന്ന കാര്യങ്ങളാണിതെന്നും തങ്ങളുടെ കുടുംബം അതിൽ നിന്നെല്ലാം മുന്നോട്ട് പോയതുപോലെ മറ്റുള്ളവരും അത് മറക്കാൻ തയ്യാറാകണമെന്നും ആര്യ പറഞ്ഞു. ആദ്യ ഭാര്യ നാദിറ നിലനിൽക്കെത്തന്നെയാണ് രാജ് ബബ്ബർ സ്മിതാ പാട്ടീലിനെ വിവാഹം കഴിക്കുന്നത്. പ്രസവത്തെത്തുടർന്നുണ്ടായ ആരോഗ്യപ്രശ്നങ്ങൾ കാരണം 1986-ൽ സ്മിതാ പാട്ടീൽ അന്തരിച്ചതിന് ശേഷമാണ് രാജ് ബബ്ബർ വീണ്ടും നാദിറയ്ക്കും മക്കളായ ആര്യയ്ക്കും ജൂഹിക്കുമൊപ്പം ജുഹുവിലെ ബംഗ്ലാവിൽ താമസം തുടങ്ങിയത്. കഴിഞ്ഞ കാര്യങ്ങളെ വൈകാരിക ഭാരമായി കൊണ്ടുനടക്കേണ്ടതില്ലെന്നും കുടുംബം ആ പഴയ കാര്യങ്ങളോട് പൂർണ്ണമായി പൊരുത്തപ്പെട്ടു കഴിഞ്ഞതായും ആര്യ ബബ്ബർ കൂട്ടിച്ചേർത്തു.
Summary: Actor Arya Babbar recently addressed the long-standing rumors surrounding his father Raj Babbar’s personal life, including a rumored affair with veteran actress Rekha. In an interview with journalist Vickey Lalwani, Arya responded philosophically when asked if his father was attracted to Rekha, stating that she is incredibly beautiful and such attraction is naturally human. Reflecting on his childhood, Arya discussed his father’s high-profile relationship with the late Smita Patil and the family’s eventual reconciliation with his mother, Nadira, years after Smita’s tragic demise in 1986.
