ചെന്നൈ: ഐപിഎൽ 2026 സീസണിൽ ചെന്നൈ സൂപ്പർ കിംഗ്സ് നേരിടുന്ന കടുത്ത പ്രതിസന്ധികളിലും ക്യാപ്റ്റൻസി മാറ്റത്തിലും മാനേജ്മെന്റിനെതിരെയും എം.എസ്. ധോണിക്കെതിരെയും രൂക്ഷ വിമർശനവുമായി മുൻ ഇന്ത്യൻ താരം എസ്. ബദരീനാഥ് (MS Dhoni CSK Playoff Qualification). പരിക്കുകൾ അലട്ടുന്ന ധോണിയുടെ ഈ സീസണിലെ പങ്കാളിത്തത്തെക്കുറിച്ച് ടീം പുലർത്തുന്ന അനിശ്ചിതത്വത്തെ ബദരീനാഥ് ചോദ്യം ചെയ്തു. കണങ്കാലിലെയും തള്ളവിരലിലെയും പരിക്കുകൾ കാരണം ഈ വർഷം ഒരൊറ്റ മത്സരത്തിൽ പോലും ധോണി കളിച്ചിട്ടില്ല. എന്നാൽ ധോണി കളിക്കുമോ ഇല്ലയോ എന്ന തരത്തിലുള്ള വാർത്തകൾ പ്രചരിപ്പിക്കുന്നത് വെറും ബിസിനസ്സ് തന്ത്രമാണോ അതോ കാണികളിൽ താല്പര്യമുണ്ടാക്കാനാണോ എന്ന് അദ്ദേഹം ചോദിച്ചു.
ധോണിയുടെ പിൻഗാമിയായി ഋതുരാജ് ഗെയ്ക്വാദിനെ ക്യാപ്റ്റനാക്കിയ തീരുമാനത്തിന് പിന്നിൽ ധോണി ആയിരിക്കില്ലെന്നും ബദരീനാഥ് വെളിപ്പെടുത്തി. “ഋതുരാജിനെ ക്യാപ്റ്റനാക്കാൻ ധോണിയാണ് ആഗ്രഹിച്ചതെന്ന് പറയുന്നത് വിശ്വസിക്കാൻ കഴിയില്ല. ഇത് പൂർണ്ണമായും മാനേജ്മെന്റിന്റെ തീരുമാനമാണ്, ഇതിന്റെ ഉത്തരവാദിത്തം അവർ ഏറ്റെടുക്കണം. ധോണിക്ക് ഒരു നിർദ്ദേശം മാത്രമേ നൽകാൻ കഴിയൂ. ധോണിയുടെ സ്വഭാവം വെച്ച് നോക്കിയാൽ, അടുത്ത ക്യാപ്റ്റനായി അദ്ദേഹം രവീന്ദ്ര ജഡേജയെ മാത്രമേ നിർദ്ദേശിക്കൂ,” ബദരീനാഥ് പറഞ്ഞു. ഗെയ്ക്വാദിന്റെ നേതൃത്വത്തിൽ സിഎസ്കെയുടെ തന്ത്രങ്ങൾ പാളിയെന്നും ജഡേജയെയും സാം കറനെയും നൽകി സഞ്ജു സാംസണെ ട്രേഡിംഗിലൂടെ ടീമിലെത്തിച്ചതല്ലാതെ മറ്റ് ലേലങ്ങളോ പ്ലാനിംഗുകളോ ഒന്നും ക്ലബ്ബിന് ഗുണം ചെയ്തില്ലെന്നും അദ്ദേഹം കൂട്ടിച്ചേർത്തു. പ്ലേ ഓഫ് സാധ്യതകൾ മങ്ങിയ ചെന്നൈക്ക് ധോണിയുടെ അസാന്നിധ്യം വലിയ തിരിച്ചടിയാണ്.
Summary: Former CSK and Indian batter S Badrinath has strongly criticized Chennai Super Kings management over the handling of MS Dhoni’s fitness and the captaincy transition in IPL 2026. With Dhoni sidelined all season due to injuries, Badrinath questioned if the ongoing uncertainty was a marketing gimmick. He further dropped a bombshell stating that Ruturaj Gaikwad’s appointment as captain was likely a management decision rather than Dhoni’s personal choice, suggesting Dhoni would have preferred Ravindra Jadeja instead. He slammed CSK’s poor strategic planning in a disappointing season where their playoff qualification chances look bleak.
