ഭോപ്പാൽ: ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയ മോഡലും നടിയുമായ ട്വിഷാ ശർമ്മയുടെ മൃതദേഹം ദീർഘകാലം കേടുപാടുകൂടാതെ സൂക്ഷിക്കാൻ മൈനസ് 80 ഡിഗ്രി സെൽഷ്യസ് താപനിലയുള്ള കോൾഡ് സ്റ്റോറേജ് സൗകര്യം ആവശ്യമാണെന്ന് കോടതി (Twisha Sharma Death Case). നിലവിൽ ഭോപ്പാൽ എയിംസിലെ മോർച്ചറിയിൽ മൈനസ് 4 ഡിഗ്രി സെൽഷ്യസിലാണ് മൃതദേഹം സൂക്ഷിച്ചിരിക്കുന്നത്. എന്നാൽ മൃതദേഹം കൂടുതൽ കാലം ജീർണ്ണിക്കാതെ ഇരിക്കാൻ ഈ താപനില പര്യാപ്തമല്ലെന്നും ഭോപ്പാലിൽ എവിടെയും -80 ഡിഗ്രി സൗകര്യം ലഭ്യമല്ലെന്നും പ്രാദേശിക കോടതി നിരീക്ഷിച്ചു. മൃതദേഹം സുരക്ഷിതമായി സൂക്ഷിക്കാൻ മധ്യപ്രദേശിലെ മറ്റ് വലിയ നഗരങ്ങളിലോ മെട്രോ നഗരങ്ങളിലോ ഉള്ള ഉന്നത മെഡിക്കൽ സ്ഥാപനങ്ങളിൽ ഇത്തരം സംവിധാനമുണ്ടോ എന്ന് അടിയന്തരമായി അന്വേഷിച്ച് റിപ്പോർട്ട് നൽകാൻ കതാരാ ഹിൽസ് സ്റ്റേഷൻ ഹൗസ് ഓഫീസർക്ക് ജഡ്ജി നിർദ്ദേശം നൽകി.
വിവാഹം കഴിഞ്ഞ് അഞ്ചാം മാസമാണ് ട്വിഷയെ ഭോപ്പാലിലെ ഭർതൃഗൃഹത്തിൽ തൂങ്ങിമരിച്ച നിലയിൽ കണ്ടെത്തിയത്. മരണത്തിൽ ദുരൂഹതയുണ്ടെന്നും അന്വേഷണത്തിൽ വീഴ്ച സംഭവിച്ചെന്നും ആരോപിച്ച് രണ്ടാമതൊരു പോസ്റ്റ്മോർട്ടം നടത്തണമെന്ന് ട്വിഷായുടെ കുടുംബം ആവശ്യപ്പെട്ടിരുന്നെങ്കിലും കോടതി ഈ ആവശ്യം നിരസിച്ചു. ആദ്യ പോസ്റ്റ്മോർട്ടത്തിന്റെ വീഡിയോ റെക്കോർഡിംഗ് ലഭ്യമാണെന്നും എയിംസിലെ മെഡിക്കൽ സംഘത്തിനെതിരെ സംശയാസ്പദമായ തെളിവുകളില്ലെന്നും കോടതി വ്യക്തമാക്കി. അതേസമയം, നീതി ലഭിക്കുന്നതുവരെ മൃതദേഹം ഏറ്റുവാങ്ങില്ലെന്ന നിലപാടിലാണ് കുടുംബം. കേസിൽ പ്രതിയായ ട്വിഷായുടെ ഭർത്താവ് സമർത്ഥ് സിംഗ് നിലവിൽ ഒളിവിലാണ്. ഇയാളെക്കുറിച്ച് വിവരം നൽകുന്നവർക്ക് ഭോപ്പാൽ പോലീസ് 30,000 രൂപ പ്രതിഫലം പ്രഖ്യാപിച്ചിട്ടുണ്ട്.
Summary: A local court in Bhopal has noted that the body of model and actor Twisha Sharma requires a -80 degrees Celsius preservation facility to prevent decomposition, a technology currently unavailable in the city. Twisha’s body is presently kept at AIIMS Bhopal at -4 degrees Celsius, as her family refuses to perform the final rites until justice is served. While rejecting the family’s plea for a second autopsy citing lack of suspicious evidence against the medical team, the court ordered the police to search for ultra-low temperature storage facilities in other metropolitan medical institutions.
