ചെന്നൈ: ശ്രീലങ്കൻ ആഭ്യന്തരയുദ്ധത്തിന്റെ അവസാന ഘട്ടത്തിൽ പതിനായിരക്കണക്കിന് തമിഴ് വംശജർ കൂട്ടക്കൊല ചെയ്യപ്പെട്ടതിന്റെ ഓർമ്മ പുതുക്കുന്ന ‘മുള്ളിവൈക്കൽ സ്മരണാ ദിനത്തിൽ’ തമിഴ്നാട് മുഖ്യമന്ത്രിയും തമിഴക വെട്രി കഴകം നേതാവുമായ വിജയ് പങ്കുവെച്ച കുറിപ്പ് വലിയ രാഷ്ട്രീയ വിവാദത്തിന് തിരികൊളുത്തിയിരിക്കുകയാണ് ( Tamil Nadu Chief Minister Vijay Mullivaikkal Tribute). “മുള്ളിവൈക്കൽ ഓർമ്മകൾ ഹൃദയത്തിൽ ഏന്തും; കടൽ കടന്ന് ജീവിക്കുന്ന നമ്മുടെ തമിഴ് സഹോദരങ്ങളുടെ അവകാശങ്ങൾക്കായി എപ്പോഴും ഒപ്പം നിൽക്കും” എന്നായിരുന്നു വിജയുടെ എക്സ് പോസ്റ്റ്. എൽടിടിഇ (LTTE) മുൻ തലവൻ വി. പ്രഭാകരൻ കൊല്ലപ്പെട്ടതിന്റെ വാർഷിക ദിനത്തിൽ നടത്തിയ ഈ പരാമർശത്തെ മുൻനിർത്തി കോൺഗ്രസിനും പ്രതിപക്ഷ നേതാവ് രാഹുൽ ഗാന്ധിക്കുമെതിരെ കടുത്ത വിമർശനവുമായി ബിജെപി രംഗത്തെത്തി.
മുൻ പ്രധാനമന്ത്രി രാജീവ് ഗാന്ധിയുടെ വധത്തിന് കാരണക്കാരായ എൽടിടിഇയുടെ തലവനെയാണ് തമിഴ്നാട് മുഖ്യമന്ത്രി പരോക്ഷമായി പിന്തുണയ്ക്കുന്നതെന്നും, അധികാരം പങ്കിട്ടെടുക്കാൻ കോൺഗ്രസ് ഇതിന് മൗനാനുവാദം നൽകുകയാണെന്നും ബിജെപി ഐടി സെൽ മേധാവി അമിത് മാളവ്യ ആരോപിച്ചു. എന്നാൽ വിജയ് തന്റെ പോസ്റ്റിൽ പ്രഭാകരന്റെ പേര് പരാമർശിച്ചിട്ടില്ലെന്നും, യുദ്ധത്തിൽ ദാരുണമായി കൊല്ലപ്പെട്ട നിരപരാധികളായ തമിഴ് ജനതയോടുള്ള ഐക്യദാർഢ്യമാണ് പ്രഖ്യാപിച്ചതെന്നും ടിവികെ വൃത്തങ്ങൾ വ്യക്തമാക്കി. തമിഴ്നാട്ടിൽ വിജയുടെ ന്യൂനപക്ഷ സർക്കാരിനെ പിന്തുണയ്ക്കുന്ന കോൺഗ്രസിനെ ഈ വിഷയത്തിൽ പ്രതിരോധത്തിലാക്കാനാണ് ബിജെപിയുടെ നീക്കം. എൽടിടിഇ അനുകൂല നിലപാടുള്ള വിസികെ പാർട്ടിയുടെ പിന്തുണയോടെയാണ് നിലവിൽ വിജയ് സർക്കാർ അധികാരത്തിൽ തുടരുന്നത്.
Summary: A major political controversy has erupted after Tamil Nadu’s superstar-turned-Chief Minister, Vijay, posted a tribute on X commemorating Mullivaikkal Remembrance Day, dedicated to the tens of thousands of Tamil civilians killed during the final phase of the Sri Lankan Civil War in 2009. The BJP quickly launched an attack on Congress Leader of Opposition Rahul Gandhi, with IT cell chief Amit Malviya reminding him that the LTTE, founded by Velupillai Prabhakaran, was responsible for the assassination of his father and former Prime Minister Rajiv Gandhi.
