ഡിജിറ്റൽ സ്വർണ്ണ നിക്ഷേപകർക്ക് വൻ സുരക്ഷിതത്വവും എളുപ്പവും സമ്മാനിച്ചുകൊണ്ട് നാഷണൽ സ്റ്റോക്ക് എക്സ്ചേഞ്ചിൽ (NSE) ഇലക്ട്രോണിക് ഗോൾഡ് റെസീപ്റ്റ് (EGR) മുഖേനയുള്ള വ്യാപാരത്തിന് തുടക്കമായി (NSE Electronic Gold Receipt trading). ഇതുസംബന്ധിച്ച മുഴുവൻ ഔദ്യോഗിക നടപടിക്രമങ്ങളും പൂർത്തീകരിച്ചതായി എൻഎസ്ഇ അറിയിച്ചു. കഴിഞ്ഞ ശനിയാഴ്ച നടത്തിയ പരീക്ഷണ വ്യാപാരം (Mock Trading) വിജയകരമായതിനെ തുടർന്ന്, മെയ് 18 തിങ്കളാഴ്ച മുതൽ പൊതുജനങ്ങൾക്കായി ഔദ്യോഗിക വ്യാപാരം ആരംഭിച്ചു.
ഓഹരികളും (Stocks) ബോണ്ടുകളും വിപണിയിൽ വാങ്ങുകയും വിൽക്കുകയും ചെയ്യുന്നത് പോലെ തന്നെ ലളിതമായി ഇനി മുതൽ സ്വർണ്ണവും എൻഎസ്ഇ വഴി ഡിജിറ്റലായി ട്രേഡ് ചെയ്യാം എന്നതാണ് ഇതിന്റെ ഏറ്റവും വലിയ പ്രത്യേകത.
എന്താണ് ഇലക്ട്രോണിക് ഗോൾഡ് റെസീപ്റ്റ് (EGR)?
ഡിജിറ്റൽ രൂപത്തിൽ സ്വർണ്ണം നിക്ഷേപിച്ചതിന്റെ ഔദ്യോഗിക രേഖയാണ് ഇലക്ട്രോണിക് ഗോൾഡ് റെസീപ്റ്റ്. നിക്ഷേപകർ ഓൺലൈനായി വാങ്ങുന്ന സ്വർണ്ണത്തിന് തുല്യമായ യഥാർത്ഥ സ്വർണ്ണം (Physical Gold) സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയുടെ (SEBI) കർശന നിയന്ത്രണത്തിലുള്ള അതീവ സുരക്ഷിതമായ വോൾട്ടുകളിൽ (Vaults) സൂക്ഷിക്കുകയും അതിന് പകരമായി ഡിജിറ്റൽ റെസീപ്റ്റ് നൽകുകയും ചെയ്യുന്നു.
ഇതിന്റെ പ്രധാന നേട്ടങ്ങൾ
സ്വർണ്ണം സുരക്ഷിതമായി സൂക്ഷിക്കേണ്ട ഭയമോ, ബാങ്ക് ലോക്കർ വാടകയുടെ അധിക ചെലവുകളോ നിക്ഷേപകർക്ക് ഉണ്ടാകുന്നില്ല.
നിക്ഷേപകർക്ക് ആവശ്യമുള്ളപ്പോൾ ഈ ഡിജിറ്റൽ റെസീപ്റ്റ് തിരികെ സമർപ്പിച്ച് വോൾട്ടുകളിൽ നിന്ന് യഥാർത്ഥ സ്വർണ്ണമായി തന്നെ കൈപ്പറ്റാവുന്നതാണ്.
നിക്ഷേപകരുടെ സ്വർണ്ണം സൂക്ഷിക്കുന്നതിനായി സെബിയുടെ അംഗീകാരത്തോടെ നിലവിൽ മുംബൈ, അഹമ്മദാബാദ് എന്നിവിടങ്ങളിലാണ് പ്രധാന വാൾട്ടിങ് ആൻഡ് കളക്ഷൻ സെന്ററുകൾ പ്രവർത്തിക്കുന്നത്. ഇതിന് പുറമെ ഡൽഹി, കൊൽക്കത്ത, ചെന്നൈ, ബാംഗ്ലൂർ എന്നീ മെട്രോ നഗരങ്ങളിലും സെന്ററുകൾ സജ്ജമായിക്കഴിഞ്ഞു.
വരും ദിവസങ്ങളിൽ ഇലക്ട്രോണിക് ഗോൾഡ് റെസീപ്റ്റ് മുഖേനയുള്ള വ്യാപാരം വൻതോതിൽ വർദ്ധിക്കുമെന്നാണ് എൻഎസ്ഇയുടെ വിലയിരുത്തൽ. ഇത് കണക്കിലെടുത്ത് രാജ്യവ്യാപകമായി 120 പ്രധാന കേന്ദ്രങ്ങളിലേക്ക് വാൾട്ടിങ് ആൻഡ് കളക്ഷൻ സെന്ററുകളുടെ ശൃംഖല വിപുലീകരിക്കുമെന്നും എൻഎസ്ഇ മാനേജ്മെന്റ് വ്യക്തമാക്കി.
Story Summary : The National Stock Exchange (NSE) has officially launched trading in Electronic Gold Receipts (EGR) on May 18, following a successful mock trading session. EGR allows investors to trade gold digitally just like stocks, with matching physical gold securely stored in SEBI-regulated vaults across the country.
