ലണ്ടൻ: പ്രശസ്ത ഹോളിവുഡ് താരം കിം കർദാഷിയാന്റെ വസ്ത്ര ബ്രാൻഡായ ‘സ്കിംസ്’ വസ്ത്രങ്ങളുടെ ഷിപ്മെന്റിൽ ഒളിപ്പിച്ച് കോടികൾ വിലമതിക്കുന്ന മയക്കുമരുന്ന് കടത്താൻ ശ്രമിച്ച പോളിഷ് ട്രക്ക് ഡ്രൈവർക്ക് യു കെ കോടതി 13 വർഷവും ആറ് മാസവും തടവുശിക്ഷ വിധിച്ചു (Kim Kardashian Skims Cocaine Smuggling). ജാക്കൂബ് ജാൻ കൊങ്കൽ (40) എന്ന ഡ്രൈവറെയാണ് ചെംസ്ഫോർഡ് ക്രൗൺ കോടതി ശിക്ഷിച്ചത്. നെതർലാൻഡ്സിൽ നിന്ന് വസ്ത്രങ്ങളുമായി വന്ന ട്രക്കിൽ നിന്ന് 8.4 ദശലക്ഷത്തിലധികം ഡോളർ (ഏകദേശം 70 കോടിയിലധികം രൂപ) വിലവരുന്ന കൊക്കെയ്നാണ് യുകെ നാഷണൽ ക്രെയിം ഏജൻസി പിടികൂടിയത്.
കഴിഞ്ഞ വർഷം സെപ്റ്റംബറിലാണ് ഹോളണ്ടിൽ നിന്നുള്ള ഫെറി വഴി എസെക്സിലെ ഹാർവിച്ച് തുറമുഖത്ത് എത്തിയ കൊങ്കലിന്റെ ട്രക്ക് അതിർത്തിരക്ഷാ സേന തടഞ്ഞത്. തുടർന്ന് നടത്തിയ എക്സ്റേ പരിശോധനയിലാണ് വസ്ത്രങ്ങൾക്കിടയിൽ അതീവ രഹസ്യമായി സൂക്ഷിച്ചിരുന്ന മയക്കുമരുന്ന് കണ്ടെത്തിയത്. വസ്ത്രങ്ങൾ കയറ്റി അയച്ച കമ്പനിക്കോ അത് ഓർഡർ ചെയ്തവർക്കോ ഈ മയക്കുമരുന്ന് കടത്തുമായി യാതൊരു ബന്ധവുമില്ലെന്ന് അന്വേഷണത്തിൽ വ്യക്തമായി. എന്നാൽ, പ്രതി മയക്കുമരുന്ന് കടത്താനായി ട്രക്കിന്റെ പിൻഭാഗത്തെ വാതിലുകളിൽ പ്രത്യേകം രഹസ്യ അറകൾ നിർമ്മിച്ചിരുന്നു. യാത്രയ്ക്കിടയിൽ വണ്ടി നിർത്തിയാണ് ഇയാൾ 198 പൗണ്ട് (ഏകദേശം 90 കിലോഗ്രാം) തൂക്കം വരുന്ന 90 കൊക്കെയ്ൻ പാക്കറ്റുകൾ വണ്ടിയിൽ ഒളിപ്പിച്ചത്.
തുടക്കത്തിൽ തനിക്ക് മയക്കുമരുന്നിനെക്കുറിച്ച് ഒന്നും അറിയില്ലെന്ന് പറഞ്ഞ് ഒഴിഞ്ഞുമാറാൻ ശ്രമിച്ച കൊങ്കൽ, പിന്നീട് കുറ്റം സമ്മതിക്കുകയായിരുന്നു. 4,500 യൂറോയുടെ പ്രതിഫലം മോഹിച്ചാണ് താൻ ഈ കള്ളക്കടത്തിന് സമ്മതിച്ചതെന്ന് പ്രതി കോടതിയിൽ വെളിപ്പെടുത്തി. അന്താരാഷ്ട്ര തലത്തിൽ പ്രവർത്തിക്കുന്ന ക്രിമിനൽ സംഘങ്ങൾ ഇത്തരം സാധാരണ ഡ്രൈവർമാരെ സ്വാധീനിച്ചാണ് നിയമപരമായ ഷിപ്മെന്റുകളുടെ മറവിൽ വലിയ തോതിൽ മയക്കുമരുന്ന് കടത്തുന്നതെന്ന് നാഷണൽ ക്രെയിം ഏജൻസി വ്യക്തമാക്കി. പ്രതിയെ പിടികൂടിയതോടെ വൻ മയക്കുമരുന്ന് മാഫിയയുടെ വലിയൊരു വിതരണ ശൃംഖലയാണ് തകർത്തതെന്നും അധികൃതർ കൂട്ടിച്ചേർത്തു.
Summary: A Polish truck driver, Jakub Jan Konkel, has been sentenced to 13 years and six months in prison by a UK court for smuggling over $8.4 million worth of cocaine inside a legitimate shipment of clothing from Kim Kardashian’s “Skims” brand. The 40-year-old was intercepted by Border Force officers at the Port of Harwich in Essex after arriving on a ferry from the Netherlands. An X-ray examination of his modified vehicle revealed a hidden compartment in the rear trailer doors containing 198 pounds of Class A drugs.
