കൊല്ലം: കൊല്ലം കടയ്ക്കലിൽ യാത്രക്കാരുമായി ഓടിക്കൊണ്ടിരുന്ന സ്വകാര്യ ബസിന്റെ മുൻചക്രം (ടയർ) പെട്ടെന്ന് ഊരിത്തെറിച്ചു (Kollam Kadakkal private bus accident). കടയ്ക്കൽ – ചിതറ – കല്ലറ റൂട്ടിൽ സർവീസ് നടത്തുന്ന ‘പട്ടുറുമാൽ’ എന്ന ബസാണ് അപകടത്തിൽപ്പെട്ടത്. അപകടസമയത്ത് റോഡിൽ മറ്റ് വാഹനങ്ങളോ കാൽനടയാത്രക്കാരോ ഇല്ലാതിരുന്നതിനാലും ബസിന് അമിതവേഗത ഇല്ലാതിരുന്നതിനാലും വൻ ദുരന്തമാണ് തലനാരിഴയ്ക്ക് ഒഴിവായത്.
ചിതറയിൽ നിന്നും കല്ലറയിലേക്ക് യാത്രക്കാരുമായി പോവുകയായിരുന്ന ബസ് ‘കല്ലുവെട്ടാൻ കുഴി’ എന്ന സ്ഥലത്തിന് സമീപം എത്തിയപ്പോഴാണ് മുൻവശത്തെ ചക്രം പെട്ടെന്ന് അച്ചുതണ്ടിൽ നിന്നും വേർപെട്ട് റോഡിലേക്ക് ഊരിത്തെറിച്ചത്.
ബസിൽ നിന്നും അതിശക്തമായി മുന്നോട്ട് പാഞ്ഞ ചക്രം റോഡരികിലെ ഒരു വീടിന്റെ മതിലിൽ ഇടിച്ചാണ് നിന്നത്. ചക്രം വേർപെട്ടതോടെ ബസ് ഒരു വശത്തേക്ക് ചരിഞ്ഞുനിന്നു. ബസിനുള്ളിൽ ഈ സമയം നിരവധി യാത്രക്കാരുണ്ടായിരുന്നെങ്കിലും ആർക്കും തന്നെ പരിക്കുകളില്ലെന്നാണ് പ്രാഥമിക വിവരം. അപകടത്തിന്റെ നടുക്കുന്ന ദൃശ്യങ്ങൾ നിലവിൽ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. ഫിറ്റ്നസ് മാനദണ്ഡങ്ങൾ പാലിക്കാതെയാണോ സ്വകാര്യ ബസ് സർവീസ് നടത്തിയതെന്ന കാര്യത്തിൽ മോട്ടോർ വാഹന വകുപ്പ് അന്വേഷണം ആരംഭിച്ചിട്ടുണ്ട്.
Story Summary: A major accident was averted in Kadakkal, Kollam, after the front wheel of a moving private bus detached on the Kadakkal-Chithara-Kallara route. The bus named ‘Patturumal’ was carrying passengers when the incident occurred near Kalluvettankuzhi. Fortunately, no one was injured as there were no other vehicles or pedestrians on the road at that moment. The detached tyre rammed into a nearby compound wall.
