ബീജിങ്: യു.എസ് പ്രസിഡന്റ് ഡൊണാൾഡ് ട്രംപും ചൈനീസ് പ്രസിഡന്റ് ഷി ജിൻപിംഗും തമ്മിൽ ബീജിങ്ങിൽ നടത്തിയ കൂടിക്കാഴ്ചയ്ക്ക് പിന്നാലെ നിർണ്ണായക പ്രഖ്യാപനവുമായി വൈറ്റ് ഹൗസ് (US China Trade Agreement). അമേരിക്കയിൽ നിന്ന് പ്രതിവർഷം കുറഞ്ഞത് 17 ശതകോടി ഡോളർ മൂല്യമുള്ള കാർഷിക ഉൽപ്പന്നങ്ങൾ ചൈന വാങ്ങുമെന്ന് വൈറ്റ് ഹൗസ് വ്യക്തമാക്കി. 2028 വരെയുള്ള വർഷങ്ങളിലാണ് ചൈന ഈ ഇറക്കുമതി നടത്തുക. കഴിഞ്ഞ ഒക്ടോബറിൽ ദക്ഷിണ കൊറിയയിൽ വെച്ച് നടന്ന ഉച്ചകോടിയിൽ 87 ദശലക്ഷം മെട്രിക് ടൺ യു.എസ് സോയാബീൻ വാങ്ങാമെന്ന ചൈനയുടെ മുൻ വാഗ്ദാനത്തിന് പുറമെയാണിത്.
പുതിയ കരാർ പ്രകാരം 400-ലധികം ഉൽപ്പാദന കേന്ദ്രങ്ങൾക്ക് അനുമതി നൽകിക്കൊണ്ട് അമേരിക്കൻ ബീഫിനുള്ള വിപണി സാധ്യതകൾ ചൈന പുനഃസ്ഥാപിക്കും. കൂടാതെ യു.എസ് ഡിപ്പാർട്ട്മെന്റ് ഓഫ് അഗ്രികൾച്ചർ പക്ഷിപ്പനി വിമുക്തമായി പ്രഖ്യാപിച്ച സംസ്ഥാനങ്ങളിൽ നിന്നുള്ള കോഴിയിറച്ചി ഇറക്കുമതിയും ചൈന പുനരാരംഭിക്കും. ഇരുരാജ്യങ്ങളും തമ്മിലുള്ള വ്യാപാര-നിക്ഷേപങ്ങൾ നിയന്ത്രിക്കുന്നതിനായി ‘യു.എസ്-ചൈന ബോർഡ് ഓഫ് ട്രേഡ്’, ‘യു.എസ്-ചൈന ബോർഡ് ഓഫ് ഇൻവെസ്റ്റ്മെന്റ്’ എന്നീ രണ്ട് പുതിയ സമിതികൾ രൂപീകരിക്കാനും ട്രംപും ഷി ജിൻപിംഗും ധാരണയിലെത്തിയിട്ടുണ്ട്. എണ്ണവ്യാപാരത്തിന് തന്ത്രപ്രധാനമായ ഹോർമുസ് കടലിടുക്ക് തുറന്നുനൽകേണ്ടതിന്റെ ആവശ്യകതയും ഇറാൻ ആണവായുധങ്ങൾ കൈവശം വെക്കരുതെന്ന കാര്യവും ഇരുനേതാക്കളും ചർച്ച ചെയ്തു. അതേസമയം വൈറ്റ് ഹൗസിന്റെ ഈ പ്രഖ്യാപനത്തോട് ചൈനീസ് ഭരണകൂടം ഇതുവരെ ഔദ്യോഗികമായി പ്രതികരിച്ചിട്ടില്ല.
Summary: China will purchase “at least” $17bn worth of agricultural goods from the United States annually through 2028 following the summit between US President Donald Trump and Chinese leader Xi Jinping in Beijing. According to the White House, this deal is in addition to China’s previous commitment to buy 87 million metric tonnes of US soya beans. China will also restore market access for US beef and resume poultry imports. Additionally, both nations agreed to establish new trade and investment boards to manage bilateral relations, though Beijing has yet to officially comment on the announcement.
