ധർമ്മശാല: ഐ.പി.എല്ലിൽ പഞ്ചാബ് കിങ്സിനെതിരെയുള്ള മത്സരത്തിൽ അർദ്ധസെഞ്ച്വറി പ്രകടനത്തോടെ രണ്ട് വമ്പൻ ചരിത്രനേട്ടങ്ങൾ സ്വന്തമാക്കി റോയൽ ചലഞ്ചേഴ്സ് ബെംഗളൂരു താരം വിരാട് കോഹ്ലി (Virat Kohli IPL 2026 Records). മത്സരത്തിൽ 37 പന്തിൽ 58 റൺസ് നേടിയതോടെ ഐ.പി.എൽ ചരിത്രത്തിൽ ഒരു പ്രത്യേക ടീമിനെതിരെ ഏറ്റവും കൂടുതൽ റൺസ് നേടുന്ന താരമെന്ന സ്വന്തം റെക്കോർഡാണ് കോഹ്ലി തിരുത്തിയത്. പഞ്ചാബിനെതിരെ നിലവിൽ കോഹ്ലിക്ക് 1,215 റൺസായി. ചെന്നൈ സൂപ്പർ കിങ്സിനെതിരെ താൻ നേടിയ 1,174 റൺസിന്റെ റെക്കോർഡാണ് താരം മറികടന്നത്.
മത്സരത്തിൽ ദേവ്ദത്ത് പടിക്കൽ, വെങ്കിടേഷ് അയ്യർ എന്നിവരുമായി ചേർന്ന് രണ്ട് തവണ അൻപതിലധികം റൺസിന്റെ കൂട്ടുകെട്ടുണ്ടാക്കാനും കോഹ്ലിക്ക് സാധിച്ചു. ഇതോടെ പുരുഷ ട്വന്റി20 ക്രിക്കറ്റിൽ ഏറ്റവും കൂടുതൽ തവണ 50-ലധികം റൺസിന്റെ കൂട്ടുകെട്ടുകളിൽ പങ്കാളിയാകുന്ന താരമെന്ന ഇംഗ്ലണ്ട് ബാറ്റ്സ്മാൻ അലക്സ് ഹെയ്ൽസിന്റെ റെക്കോർഡിനൊപ്പവും കോഹ്ലി എത്തി. രണ്ടുപേരും 210 തവണയാണ് ഈ നേട്ടം കൈവരിച്ചിട്ടുള്ളത്. കോഹ്ലിയുടെ കരിയറിലെ 67-ാമത് ഐ.പി.എൽ അർദ്ധസെഞ്ച്വറിയായിരുന്നു ഇത്.
മത്സരത്തിൽ ആദ്യം ബാറ്റ് ചെയ്ത ആർ.സി.ബി നിശ്ചിത 20 ഓവറിൽ 4 വിക്കറ്റ് നഷ്ടത്തിൽ 222 റൺസെന്ന കൂറ്റൻ സ്കോറാണ് പടുത്തുയർത്തിയത്. 40 പന്തിൽ പുറത്താകാതെ 73 റൺസ് അടിച്ചുകൂട്ടിയ വെങ്കിടേഷ് അയ്യരുടെ തകർപ്പൻ പ്രകടനമാണ് ബെംഗളൂരുവിന് മികച്ച സ്കോർ സമ്മാനിച്ചത്. ദേവ്ദത്ത് പടിക്കൽ (25 പന്തിൽ 45), ടിം ഡേവിഡ് (12 പന്തിൽ 28) എന്നിവരും ആർ.സി.ബിക്കായി മികച്ച സംഭാവനകൾ നൽകി. പ്ലേ ഓഫ് യോഗ്യത ഉറപ്പാക്കാൻ പഞ്ചാബിന് ഈ മത്സരത്തിൽ വിജയം അനിവാര്യമാണ്. എന്നാൽ ഈ മത്സരത്തിൽ വിജയിച്ചാൽ ആർ.സി.ബിക്ക് പ്ലേ ഓഫ് ബർത്ത് ഉറപ്പാക്കാൻ സാധിക്കും.
Summary: Royal Challengers Bengaluru (RCB) star Virat Kohli achieved two major milestones during the IPL 2026 clash against Punjab Kings (PBKS) on Sunday. Scoring 58 off 37 balls, Kohli broke his own record for the most runs scored by a batsman against a single IPL franchise, reaching 1,215 runs against PBKS to surpass his previous tally of 1,174 runs against CSK. Additionally, by anchoring two 50-plus partnerships, he equaled England’s Alex Hales’ world record of 210 fifty-plus stands in men’s T20s. Powered by Venkatesh Iyer’s explosive 73* off 40 balls, RCB posted a formidable total of 222/4.
