ന്യൂഡൽഹി: ഉയർന്ന ശമ്പളമുള്ള വിദേശ ജോലി വാഗ്ദാനം ചെയ്ത് ഇന്ത്യക്കാരായ യുവാക്കളെ കംബോഡിയ, തായ്ലൻഡ് എന്നീ രാജ്യങ്ങളിലേക്ക് കടത്തി ‘സൈബർ അടിമകളാക്കി’ മാറ്റിയിരുന്ന അന്താരാഷ്ട്ര മനുഷ്യക്കടത്ത് സംഘത്തിന്റെ തലവൻ പിടിയിൽ (Cyber Slavery Gang Leader Arrested). മുൻ മർച്ചന്റ് നേവി ഉദ്യോഗസ്ഥനായ നാഗേഷ് കുമാർ എന്നയാളെയാണ് ഹിമാചൽ പ്രദേശിലെ പാലംപൂരിൽ നിന്ന് ആഗ്ര സൈബർ സെൽ വിഭാഗം അറസ്റ്റ് ചെയ്തത്. തട്ടിപ്പിനിരയായി വിദേശത്തെ സൈബർ തട്ടിപ്പ് കേന്ദ്രങ്ങളിൽ കുടുങ്ങിയ ചില യുവാക്കൾ നൽകിയ പരാതിയെത്തുടർന്ന് നടത്തിയ അന്വേഷണത്തിലാണ് ഞെട്ടിക്കുന്ന ഈ വിവരങ്ങൾ പുറത്തുവന്നത്.
വിദേശത്ത് മികച്ച ജോലി നൽകാമെന്ന് വിശ്വസിപ്പിച്ച് യുവാക്കളിൽ നിന്ന് ലക്ഷക്കണക്കിന് രൂപയാണ് ഈ സംഘം വാങ്ങിയിരുന്നത്. എന്നാൽ വിദേശത്ത് എത്തിയാലുടൻ ഇവരെ ബന്ദികളാക്കുകയും നിർബന്ധപൂർവ്വം സൈബർ തട്ടിപ്പുകൾക്കും ഓൺലൈൻ ക്രിമിനൽ പ്രവർത്തനങ്ങൾക്കും ഉപയോഗിക്കുകയുമായിരുന്നു പതിവ്. പ്രതിയിൽ നിന്ന് പിടിച്ചെടുത്ത മൊബൈൽ ഫോണിൽ നിന്ന് വിദേശത്തുള്ള, പ്രത്യേകിച്ച് ചൈനീസ് കമ്പനികളുമായുള്ള ഇടപാടുകളുടെ നിർണ്ണായക വിവരങ്ങൾ പൊലീസിന് ലഭിച്ചിട്ടുണ്ട്.
ഇതിന് മുൻപും ഈ സംഘത്തിലെ ചില പ്രതികളെ പോലീസ് അറസ്റ്റ് ചെയ്തിരുന്നു. സമാനമായ മറ്റൊരു കേസിൽ കംബോഡിയയിലേക്ക് മനുഷ്യക്കടത്ത് നടത്തിയ അഞ്ച് പ്രതികൾക്കെതിരെ ദേശീയ അന്വേഷണ ഏജൻസി കുറ്റപത്രം സമർപ്പിച്ചിരുന്നു. ഈ സംഘം യുവാക്കളുടെ പാസ്പോർട്ടുകൾ പിടിച്ചുവെച്ച്, കംബോഡിയയിലെ തട്ടിപ്പ് കമ്പനികളിൽ ജോലി ചെയ്യാൻ നിർബന്ധിക്കുകയും, എതിർക്കുന്നവർക്ക് ഇലക്ട്രിക് ഷോക്ക് ഉൾപ്പെടെയുള്ള ക്രൂരമായ ശാരീരിക-മാനസിക പീഡനങ്ങൾ നൽകുകയും ചെയ്തിരുന്നതായും അന്വേഷണസംഘം വ്യക്തമാക്കി.
Summary: An ex-merchant navy officer identified as Nagesh Kumar has been arrested for allegedly trafficking Indian youths to Cambodia and Thailand for “cyber-slavery” under the pretext of high-paying jobs abroad. The international racket was uncovered after several victimized youngsters escaped and filed a complaint with the Agra Cyber Cell. Once the victims arrived in these Asian nations, their passports were seized, and they were held hostage and forced into online scams. Meanwhile, the National Investigation Agency (NIA) has also chargesheeted five individuals in a similar Cambodia-based cyber-fraud syndicate.
