ന്യൂഡൽഹി: പശ്ചിമേഷ്യൻ മേഖലയിൽ കടുത്ത ഭൗമരാഷ്ട്രീയ സംഘർഷങ്ങൾ നിലനിൽക്കുന്ന പശ്ചാത്തലത്തിൽ, രാജ്യത്തിന്റെ ഊർജസുരക്ഷ കൂടുതൽ ഭദ്രമാക്കാൻ ലക്ഷ്യമിട്ട് ഇന്ത്യയും യുഎഇയും തമ്മിൽ സുപ്രധാന പ്രതിരോധ-ഊർജ കരാറുകൾ ധാരണയായി. പ്രധാനമന്ത്രി നരേന്ദ്ര മോദിയുടെ യുഎഇയിലേക്കുള്ള ഹ്രസ്വ സന്ദർശനമാണ് ഇരുരാജ്യങ്ങളും തമ്മിലുള്ള തന്ത്രപ്രധാനമായ ഈ പുതിയ പങ്കാളിത്തത്തിന് വഴിയൊരുക്കിയത്.(PM Modi UAE Visit Strategic Oil Reserves Agreements Signed Energy Security)
പ്രതിരോധം, നിക്ഷേപം, പുനരുപയോഗ ഊർജം തുടങ്ങിയ മേഖലകൾക്ക് പുറമെ ഇന്ത്യയുടെ തന്ത്രപ്രധാന പെട്രോളിയം കരുതൽ ശേഖരത്തിലേക്ക് 30 ദശലക്ഷം ബാരൽ അസംസ്കൃത എണ്ണ യുഎഇ നൽകുമെന്നതാണ് ഈ സന്ദർശനത്തിലെ ഏറ്റവും നിർണ്ണായകമായ തീരുമാനം. അബുദാബിയിൽ പ്രധാനമന്ത്രി നരേന്ദ്ര മോദിയും യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാനും തമ്മിൽ നടത്തിയ വിപുലമായ ഉഭയകക്ഷി ചർച്ചകൾക്കൊടുവിലാണ് കരാറുകൾക്ക് അന്തിമരൂപമായത്.
ഇന്ത്യയുടെ തന്ത്രപ്രധാന പെട്രോളിയം കരുതൽ ശേഖരത്തിൽ യുഎഇയുടെ പങ്കാളിത്തം 30 ദശലക്ഷം ബാരലായി ഉയർത്തുന്നതിനായി ‘ഇന്ത്യൻ സ്ട്രാറ്റജിക് പെട്രോളിയം റിസർവ്സ് ലിമിറ്റഡും’ ‘അബുദാബി നാഷണൽ ഓയിൽ കമ്പനിയും’ തമ്മിൽ ഒപ്പുവെച്ച ദീർഘകാല സഹകരണ കരാറിനെ ഇരുനേതാക്കളും സ്വാഗതം ചെയ്തതായി ഇന്ത്യൻ വിദേശകാര്യ മന്ത്രാലയം ഔദ്യോഗിക പ്രസ്താവനയിലൂടെ അറിയിച്ചു. ആഗോളതലത്തിൽ എണ്ണ വിതരണ ശൃംഖലകൾ വെല്ലുവിളി നേരിടുന്ന ഈ ഘട്ടത്തിൽ ഇന്ത്യക്ക് വലിയ തണലാകുന്നതാണ് ഈ പുതിയ കരാറുകൾ.
Story Summary
During Prime Minister Narendra Modi’s brief visit to the UAE, India and the UAE signed landmark agreements to significantly boost energy and defense cooperation. Under the strategic pact, Abu Dhabi National Oil Company will supply 30 million barrels of crude oil to India’s strategic petroleum reserves, ensuring India’s energy security amidst global supply chain uncertainties.
