ചെന്നൈ: ഐപിഎൽ 2026 സീസണിൽ ലഖ്നൗ സൂപ്പർ ജാന്റ്സിനോട് നേരിട്ട അപ്രതീക്ഷിത പരാജയത്തിന് പിന്നാലെ ചെന്നൈ സൂപ്പർ കിങ്സ് ക്യാപ്റ്റൻ ഋതുരാജ് ഗെയ്ക്വാദിനെതിരെ കടുത്ത വിമർശനവുമായി മുൻ ചെന്നൈ താരം സുബ്രഹ്മണ്യം ബദരീനാഥ് (Ruturaj Gaikwad Captaincy Criticism). പഞ്ചാബ് കിങ്സിന്റെ പരാജയത്തോടെ പോയിന്റ് പട്ടികയിൽ നാലാം സ്ഥാനത്തേക്ക് ഉയരാൻ ലഭിച്ച സുവർണ്ണാവസരമാണ് ചെന്നൈ ലഖ്നൗവിനോട് തോറ്റതോടെ നഷ്ടപ്പെടുത്തിയത്. ചെന്നൈ ഉയർത്തിയ 187 റൺസിന്റെ വിജയലക്ഷ്യം വെറും 16.4 ഓവറിൽ ലഖ്നൗ മറികടന്നു. ഈ പിച്ചിൽ സ്പിന്നർ അകീൽ ഹൊസൈനെ ടീമിൽ ഉൾപ്പെടുത്താതിരുന്ന ഋതുരാജിന്റെ തന്ത്രപരമായ പിഴവാണ് തോൽവിക്ക് കാരണമായതെന്നും, ടീം തിരഞ്ഞെടുപ്പിലെ ഇത്തരം തെറ്റുകൾ ഈ സീസണിൽ ചെന്നൈയുടെ പതിവായി മാറിയിരിക്കുകയാണെന്നും ബദരീനാഥ് എക്സ് പ്ലാറ്റ്ഫോമിൽ കുറിച്ചു.
ബാറ്റർമാർ മികച്ച പ്രകടനം നടത്തി 187 റൺസ് എടുത്തിട്ടും ബൗളിംഗ് നിരയുടെ മോശം പ്രകടനമാണ് തോൽവിക്ക് കാരണമായതെന്ന് മത്സരശേഷം ക്യാപ്റ്റൻ ഋതുരാജ് ഗെയ്ക്വാദ് പ്രതികരിച്ചു. ബാറ്റിംഗിന് ബുദ്ധിമുട്ടേറിയ പിച്ചിൽ 160-170 റൺസ് പ്രതീക്ഷിച്ച സ്ഥാനത്ത് 180-ലധികം റൺസ് നേടാൻ കഴിഞ്ഞതിൽ തൃപ്തിയുണ്ടെന്നും എന്നാൽ ലഖ്നൗ ബാറ്റർമാരുടെ അസാധാരണ പ്രകടനം കളി കൈവിട്ടുപോകാൻ കാരണമായെന്നും ഋതുരാജ് പറഞ്ഞു. പരാജയത്തിൽ പരിഭ്രാന്തരാകേണ്ടതില്ലെന്നും വരാനിരിക്കുന്ന അടുത്ത രണ്ട് മത്സരങ്ങളിലും വിജയിച്ച് പ്ലേഓഫ് യോഗ്യത നേടുക എന്ന ലളിതമായ കണക്കുകൂട്ടൽ മാത്രമാണ് ഇനി ടീമിന് മുന്നിലുള്ളതെന്നും അദ്ദേഹം കൂട്ടിച്ചേർത്തു.
Summary: Chennai Super Kings’ (CSK) three-game winning streak ended with a loss to Lucknow Super Giants (LSG) in IPL 2026, putting their playoff chances at risk. Following the defeat, former CSK batter Subramaniam Badrinath heavily criticized skipper Ruturaj Gaikwad for a ‘tactical blunder’ in team selection, specifically questioning the omission of spinner Akeal Hosein on that pitch. While Gaikwad defended the batting performance that reached 187/5 and blamed bowling execution, he urged the team to remain calm and focus on winning the remaining two matches.
