തിരുവനന്തപുരം: കഠിനമായ നെഞ്ചുവേദനയെയും ശ്വാസംമുട്ടലിനെയും തുടർന്ന് അത്യാഹിത വിഭാഗത്തിൽ പ്രവേശിപ്പിച്ച 53-കാരനായ കൊല്ലം സ്വദേശിയിൽ അപൂർവ്വവും സങ്കീർണ്ണവുമായ കീഹോൾ ബൈപ്പാസ് ശസ്ത്രക്രിയ വിജയകരമായി പൂർത്തിയാക്കി കിംസ്ഹെൽത്ത് (KIMSHEALTH). ഹൃദയമിടിപ്പ് നിലനിർത്തിക്കൊണ്ട്, ഹാർട്ട്-ലങ് മെഷീന്റെ സഹായമില്ലാതെയാണ് ഈ മിനിമലി ഇൻവേസീവ് ശസ്ത്രക്രിയ പൂർത്തിയാക്കിയത്.
ആൻജിയോഗ്രാം പരിശോധനയിൽ രോഗിയുടെ ഹൃദയത്തിലേക്കുള്ള പ്രധാന ധമനികളിലെല്ലാം ബ്ലോക്കുകൾ കണ്ടെത്തിയിരുന്നു. കഠിനമായ ജോലികളിലേക്ക് വേഗത്തിൽ മടങ്ങണമെന്ന രോഗിയുടെ ആവശ്യപ്രകാരമാണ് സാധാരണ ബൈപ്പാസിന് പകരം കീഹോൾ ശസ്ത്രക്രിയ തിരഞ്ഞെടുത്തത്.
നെഞ്ചിന്റെ മുൻഭാഗത്തെ അസ്ഥി മുറിക്കാതെ, വശങ്ങളിലെ ചെറിയ മുറിവുകളിലൂടെയാണ് ഈ ശസ്ത്രക്രിയ നടത്തിയത്. ഇടതുവശത്തു കൂടി നടത്തുന്ന ഇത്തരം ശസ്ത്രക്രിയകളിൽ വലതുവശത്തെ ധമനിയിലെ തടസ്സം നീക്കുന്നത് വലിയ വെല്ലുവിളിയാണ്. എന്നാൽ ഈ വെല്ലുവിളി മറികടന്ന് ഇടത് ധമനിയിലെ രണ്ടും വലത് ധമനിയിലെ ഒന്നും തടസ്സങ്ങൾ വിജയകരമായി ഡോക്ടർമാർ ബൈപ്പാസ് ചെയ്തു.
ഒമ്പത് മണിക്കൂർ നീണ്ടുനിന്ന ഈ സങ്കീർണ്ണ ശസ്ത്രക്രിയയ്ക്ക് കാർഡിയോതൊറാസിക് ആൻഡ് വാസ്കുലർ സർജറി വിഭാഗം കൺസൾട്ടന്റ് ഡോ. അതുൽ എബ്രഹാം നേതൃത്വം നൽകി. ഡോ. ദിനേഷ് ഡേവിഡ്, ഡോ. വിപിൻ ബി. നായർ, ഡോ. സുഭാഷ് എസ്., ഡോ. ഹരി ദേവ് ജെ.ജെ. എന്നിവരും ചികിത്സാ സംഘത്തിൽ പങ്കാളികളായി.
ആശുപത്രിയിൽ ഒരാഴ്ചത്തെ പരിചരണത്തിന് ശേഷം ഡിസ്ചാർജ് ചെയ്ത രോഗി മൂന്നാഴ്ചയ്ക്കുള്ളിൽ തന്നെ പൂർണ്ണ ആരോഗ്യവാനായി സാധാരണ ജീവിതത്തിലേക്ക് മടങ്ങി.
News Summary: Trivandrum KIMSHEALTH has successfully performed a complex, minimally invasive keyhole bypass surgery on a 53-year-old patient from Kollam. Admitted with severe chest pain, an angiogram revealed major arterial blocks. Overcoming the technical challenge of bypassing right-side arterial blocks through left-side incisions, the surgical team completed the nine-hour off-pump surgery without a heart-lung machine. Led by Dr. Atul Abraham, the team enabled a swift recovery, allowing the patient to return to normal activities within three weeks.
