ഇംഫാൽ: മണിപ്പൂരിലെ കാങ്പോക്പി ജില്ലയിൽ സഭാ നേതാക്കൾ സഞ്ചരിച്ചിരുന്ന വാഹനങ്ങൾക്ക് നേരെ അജ്ഞാത സംഘം നടത്തിയ വെടിവെപ്പിൽ മൂന്ന് വൈദികർ കൊല്ലപ്പെട്ടു. ബുധനാഴ്ച രാവിലെ ചുരാചന്ദ്പുരിൽ നടന്ന ബാപ്റ്റിസ്റ്റ് കൺവെൻഷനിൽ പങ്കെടുത്ത ശേഷം കാങ്പോക്പിയിലേക്ക് മടങ്ങുകയായിരുന്ന സംഘത്തിന് നേരെയാണ് ആക്രമണമുണ്ടായത്.(Three Church Leaders Killed In Manipur Ambush)
ചുരാചന്ദ്പുരിൽ നിന്ന് കാങ്പോക്പിയിലേക്ക് രണ്ട് വാഹനങ്ങളിലായി എട്ടുപേർ സഞ്ചരിക്കുകയായിരുന്നു. കാങ്പോക്പി ജില്ലയിലെ കോട്സിലിനും കോട്ലെൻ ഗ്രാമങ്ങൾക്കും ഇടയിലുള്ള പ്രദേശത്തുവെച്ച് സായുധ സംഘം വാഹനങ്ങൾക്ക് നേരെ യന്ത്രത്തോക്കുകൾ ഉപയോഗിച്ച് വെടിയുതിർക്കുകയായിരുന്നു. തദോ ബാപ്റ്റിസ്റ്റ് അസോസിയേഷൻ ഓഫ് ഇന്ത്യ (TBAI), യുണൈറ്റഡ് ബാപ്റ്റിസ്റ്റ് കൗൺസിൽ (UBC) അംഗങ്ങളായ വൈദികരാണ് ആക്രമണത്തിനിരയായത്.
റവ. ഡോ. വുംതാങ് സിത്ലൗ (TBAI പ്രസിഡന്റും മണിപ്പൂർ ബാപ്റ്റിസ്റ്റ് കൺവെൻഷൻ മുൻ ജനറൽ സെക്രട്ടറിയും), റവ. കൈഗൗലുൻ ലൗവുമ് (TBAI ഫിനാൻസ് സെക്രട്ടറി), പാസ്റ്റർ പാവോഗൗലെൻ സിത്ലൗ (TBAI സൂപ്രണ്ട് പാസ്റ്റർ) എന്നിവരാണ് കൊല്ലപ്പെട്ടത്. വെടിവെപ്പിൽ പരിക്കേറ്റ നാലുപേരെ ചികിത്സയ്ക്കായി ഇംഫാലിലെ ഷിജ ഹോസ്പിറ്റലിലേക്ക് മാറ്റിയിട്ടുണ്ട്. ഇവരുടെ ആരോഗ്യനില നിരീക്ഷിച്ച് വരികയാണ്. സംഭവത്തെ തുടർന്ന് മണിപ്പൂർ മുഖ്യമന്ത്രി വൈ. ഖേംചന്ദ് സിങ് ആശുപത്രിയിലെത്തി പരിക്കേറ്റവരെ സന്ദർശിക്കുകയും കുറ്റവാളികളെ എത്രയും വേഗം നിയമത്തിന് മുന്നിൽ കൊണ്ടുവരുമെന്ന് ഉറപ്പുനൽകുകയും ചെയ്തു. ആക്രമണത്തിൽ ഉൾപ്പെട്ടവരെ കണ്ടെത്താൻ സുരക്ഷാ സേന വ്യാപകമായ തെരച്ചിൽ നടത്തിവരികയാണ്.
ഈ കൊലപാതകത്തിൽ പ്രതിഷേധിച്ച് കുക്കി സംഘടനകൾ വിവിധ ജില്ലകളിൽ അനിശ്ചിതകാല ഹർത്താൽ പ്രഖ്യാപിച്ചു. മെയ്ത്തി സംഘടനയായ ‘അറംബായ് ടെംഗോൾ’ സംഭവത്തിൽ തങ്ങൾക്ക് പങ്കില്ലെന്ന് വ്യക്തമാക്കി രംഗത്തെത്തിയിട്ടുണ്ട്. സമാധാന ചർച്ചകളിൽ സജീവമായിരുന്ന വൈദികർക്കുനേരെയുണ്ടായ ഈ ആക്രമണം മേഖലയിൽ വലിയ പ്രതിഷേധത്തിനും ആശങ്കയ്ക്കും വഴിവെച്ചിരിക്കുകയാണ്.
Story Summary
In a tragic ambush on May 13, 2026, three tribal Baptist church leaders—Rev. Dr. Vumthang Sitlhou, Rev. Kaigoulun Lhouvum, and Pastor Paogoulen Sitlhou—were shot dead by unidentified gunmen in Manipur’s Kangpokpi district. The victims, who were returning from a peace conference in Churachandpur, were traveling in a convoy when the attack occurred, leaving four others injured. The incident has sparked widespread condemnation and led to indefinite shutdowns in several districts as tensions escalate in the state.
