ലണ്ടൻ: ബിബിസി സംപ്രേക്ഷണം ചെയ്യാതെ മാറ്റിവെച്ച ‘ഗസ: ഡോക്ടേഴ്സ് അണ്ടർ അറ്റാക്ക്’ എന്ന ഡോക്യുമെന്ററിക്ക് 2026-ലെ ബാഫ്റ്റ (BAFTA) പുരസ്കാരം. കറന്റ് അഫയേഴ്സ് വിഭാഗത്തിലാണ് ചിത്രം ഈ നേട്ടം കൈവരിച്ചത്. പുരസ്കാരം സ്വീകരിച്ചുകൊണ്ട് ചിത്രത്തിന്റെ അണിയറപ്രവർത്തകർ ബിബിസിക്കെതിരെ വേദിയിൽ രൂക്ഷമായ ഭാഷയിൽ സംസാരിച്ചത് വലിയ ശ്രദ്ധ നേടിയിരിക്കുകയാണ്. (Gaza Doctors Under Attack BBC Censorship Controversy)
“ഞങ്ങളെ നിശബ്ദരാക്കാനോ സെൻസർ ചെയ്യാനോ കഴിയില്ല” എന്ന് പുരസ്കാരം സ്വീകരിച്ചുകൊണ്ട് അവതാരകയും പത്രപ്രവർത്തകയുമായ രമിത നവായി പറഞ്ഞു. ബിബിസി പണം നൽകി നിർമ്മിച്ച അന്വേഷണ റിപ്പോർട്ടാണിതെന്നും എന്നാൽ അത് കാണിക്കാൻ അവർ വിസമ്മതിച്ചുവെന്നും അവർ കൂട്ടിച്ചേർത്തു. “നിങ്ങൾ ഞങ്ങളുടെ സിനിമ ഒഴിവാക്കി, ഇനി ബാഫ്റ്റ ചടങ്ങിലെ ഞങ്ങളുടെ ഈ ഭാഗം കൂടി ബിബിസി ഒഴിവാക്കുമോ?” എന്ന് എക്സിക്യൂട്ടീവ് പ്രൊഡ്യൂസർ ബെൻ ഡി പിയർ പരസ്യമായി ചോദിച്ചു. ഇസ്രായേൽ ജയിലുകളിൽ കഴിയുന്ന ഫലസ്തീൻ ആരോഗ്യപ്രവർത്തകർക്കാണ് അണിയറപ്രവർത്തകർ ഈ പുരസ്കാരം സമർപ്പിച്ചത്. ഗസയിൽ ഇതുവരെ 1,700-ലധികം ആരോഗ്യപ്രവർത്തകർ കൊല്ലപ്പെട്ടതായും അവർ ചൂണ്ടിക്കാട്ടി.
ആദ്യഘട്ടത്തിൽ ബിബിസിയാണ് ഈ ഡോക്യുമെന്ററി കമ്മീഷൻ ചെയ്തത്. എന്നാൽ, ചിത്രം ‘നിഷ്പക്ഷമല്ല’ എന്ന കാരണം പറഞ്ഞ് അവർ ഇത് സംപ്രേക്ഷണം ചെയ്തില്ല. തുടർന്ന് ചാനൽ 4 ഈ ചിത്രം ഏറ്റെടുക്കുകയും ജൂലൈയിൽ സംപ്രേക്ഷണം ചെയ്യുകയുമായിരുന്നു. ബാഫ്റ്റ ചടങ്ങ് സംപ്രേക്ഷണം ചെയ്ത ബിബിസി, പുരസ്കാര വേദിയിലെ വിമർശനത്തിന്റെ പല ഭാഗങ്ങളും വെട്ടിമാറ്റിയതായും റിപ്പോർട്ടുകളുണ്ട്. ഗസയിലെ തകർന്നടിഞ്ഞ ആരോഗ്യസംവിധാനത്തെക്കുറിച്ചും ഡോക്ടർമാർ നേരിടുന്ന വെല്ലുവിളികളെക്കുറിച്ചും വിവരിക്കുന്ന ഈ ഡോക്യുമെന്ററിക്ക് വലിയ സ്വീകാര്യതയാണ് ബാഫ്റ്റ വേദിയിൽ ലഭിച്ചത്.
Summary: The documentary “Gaza: Doctors Under Attack,” which the BBC refused to air citing impartiality concerns, won the BAFTA TV Award for Current Affairs. During their acceptance speeches, the filmmakers slammed the BBC for censorship and thanked Channel 4 for broadcasting the film. They dedicated the award to Palestinian medical workers who have been killed or detained during the conflict.
