ചെന്നൈ: ദിവസങ്ങൾ നീണ്ട രാഷ്ട്രീയ നാടകങ്ങൾക്കൊടുവിൽ തമിഴ്നാട്ടിൽ സർക്കാർ രൂപീകരണത്തിന് വഴിയൊരുങ്ങുന്നു. വിടുതലൈ ചിരുതൈഗൾ കക്ഷി (VCK) തമിഴക വെട്രി കഴകത്തിന് ഔദ്യോഗികമായി പിന്തുണ പ്രഖ്യാപിച്ചു (VCK Support Vijay). വിസികെ നേതാവ് തോൾ തിരുമാവളവൻ പിന്തുണക്കത്ത് ടിവികെ നേതാവ് ആദവ് അർജുനയ്ക്ക് കൈമാറി. ഇതോടെ വിജയ് തമിഴ്നാടിന്റെ അടുത്ത മുഖ്യമന്ത്രിയാകുമെന്ന് ആദവ് അർജുന മാധ്യമങ്ങളോട് പറഞ്ഞു.
രണ്ട് എംഎൽഎമാരുള്ള വിസികെ കൂടി പിന്തുണ പ്രഖ്യാപിച്ചതോടെ വിജയ് നയിക്കുന്ന സഖ്യത്തിന്റെ ആകെ അംഗസംഖ്യം 119 ആയി ഉയർന്നു. 234 അംഗ നിയമസഭയിൽ കേവലഭൂരിപക്ഷത്തിന് 118 സീറ്റുകളാണ് വേണ്ടത്.
നിലവിലെ കക്ഷിനില ഇപ്രകാരം:
ടിവികെ: 108
കോൺഗ്രസ്: 5
സിപിഐ: 2
സിപിഎം: 2
വിസികെ: 2
ആകെ: 119
സർക്കാർ രൂപീകരണ നീക്കങ്ങൾ സജീവമാകുന്നതിനിടെ തമിഴ്നാട് ഗവർണർ രാജേന്ദ്ര വിശ്വനാഥ് അർലേക്കർ ഇന്ന് വൈകിട്ട് 7.10-ന് ചെന്നൈയിൽ നിന്ന് തിരുവനന്തപുരത്തേക്ക് തിരിക്കും. ഗവർണർ യാത്ര തിരിക്കുന്നതിന് മുൻപ് വിജയ് അദ്ദേഹത്തെ കണ്ട് സർക്കാർ രൂപീകരണത്തിനുള്ള അവകാശവാദം ഉന്നയിക്കുമോ എന്നാണ് ഇപ്പോൾ രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.
അതിനിടെ, പുതിയതായി തിരഞ്ഞെടുക്കപ്പെട്ട എംഎൽഎമാരിൽ 126 പേർക്കെതിരെ ക്രിമിനൽ കേസുകൾ നിലവിലുണ്ടെന്ന് എഡിആർ (ADR) റിപ്പോർട്ട് പുറത്തുവിട്ടു. ഇതിൽ ഏറ്റവും കൂടുതൽ പേർ വിജയിയുടെ ടിവികെയിൽ നിന്നാണ് (41 എംഎൽഎമാർ).
Summary: The VCK has officially handed over its letter of support to Vijay’s TVK, bringing the total strength of the TVK-led alliance to 119 seats, surpassing the majority mark of 118. While TVK leader Aadhav Arjuna confirmed that Vijay would be the next CM, Governor Rajendra Vishwanath Arlekar is scheduled to fly to Thiruvananthapuram tonight at 7:10 PM.
