തിരുവനന്തപുരം: കോൺഗ്രസിനുള്ളിൽ മുഖ്യമന്ത്രി സ്ഥാനത്തിനായി പോര് മുറുകുന്നതിനിടെ കടുത്ത പരിഹാസവുമായി ബിജെപി നേതാവ് കെ. സുരേന്ദ്രൻ രംഗത്ത് (K Surendran Facebook post on Congress). കോൺഗ്രസിന്റെ കേന്ദ്ര നേതൃത്വത്തെ ‘ലോ കമാൻഡ്’ എന്ന് വിശേഷിപ്പിച്ച സുരേന്ദ്രൻ, കേരളത്തിലെ മുഖ്യമന്ത്രി ആരാകണമെന്ന് തീരുമാനിക്കുന്നത് പാണക്കാട് തങ്ങളായിരിക്കുമെന്ന് ഫേസ്ബുക്കിൽ കുറിച്ചു. കോൺഗ്രസ് നടത്തുന്ന ചർച്ചകളും നിരീക്ഷകരുടെ സന്ദർശനവും വെറും പ്രഹസനമാണെന്നും അദ്ദേഹം ആരോപിച്ചു.
“ഹൈക്കമാൻഡൊക്കെ വെറും ലോ കമാൻഡ്. നടപടിക്രമങ്ങളെല്ലാം പ്രഹസനം. മുഖ്യമന്ത്രിയെ ബഹുമാന്യനായ പാണക്കാട് തങ്ങളദ്ദേഹം തീരുമാനിക്കും. ഇനിയങ്ങോട്ട് അഞ്ചുവർഷവും ഇതു തന്നെ ഗതി. കാത്തിരുന്നു കാണാം…” – ഇതായിരുന്നു സുരേന്ദ്രന്റെ ഫേസ്ബുക്ക് പോസ്റ്റ്. ഭരണത്തിൽ മുസ്ലിം ലീഗിന്റെ അമിതമായ സ്വാധീനമുണ്ടാകുമെന്ന രാഷ്ട്രീയ ആരോപണമാണ് സുരേന്ദ്രൻ ഇതിലൂടെ ഉയർത്തുന്നത്.
അതേസമയം, കോൺഗ്രസ് പാളയത്തിൽ കെ.സി. വേണുഗോപാലിന് അനുകൂലമായ നീക്കങ്ങൾ ശക്തമാണ്. എംഎൽഎമാരുടെ കൂടിക്കാഴ്ചയിൽ 46 പേരുടെ പിന്തുണ കെ.സിക്ക് ലഭിച്ചതായാണ് റിപ്പോർട്ടുകൾ. രമേശ് ചെന്നിത്തലയ്ക്ക് എട്ട് പേരുടെയും വി.ഡി. സതീശന് ആറ് പേരുടെയും പിന്തുണ മാത്രമേ ലഭിച്ചിട്ടുള്ളൂ. ഇതിനിടെയാണ് യുഡിഎഫിലെ ഘടകകക്ഷിയായ മുസ്ലിം ലീഗിന്റെ നിലപാട് മുഖ്യമന്ത്രി നിർണ്ണയത്തിൽ നിർണ്ണായകമാകുമെന്ന സുരേന്ദ്രന്റെ പരിഹാസം. മുസ്ലിം ലീഗ് വി.ഡി. സതീശനെ പിന്തുണയ്ക്കുന്നു എന്ന വാർത്തകൾക്കിടയിലാണ് ബിജെപിയുടെ ഈ രാഷ്ട്രീയ നീക്കം.
Summary: BJP leader K. Surendran mocked the Congress party’s ongoing Chief Ministerial discussions in Kerala, labeling the High Command as “Low Command.” In a Facebook post, he claimed that the final decision regarding the CM would be made by Panakkad Thangal of the Muslim League, calling the Congress’s internal procedures a farce. Meanwhile, reports suggest K.C. Venugopal has secured the support of 46 MLAs, leading the race against V.D. Satheesan and Ramesh Chennithala.
