ചെന്നൈ: തമിഴ്നാട് നിയമസഭാ തിരഞ്ഞെടുപ്പ് ഫലത്തിന് പിന്നാലെ വിജയ്യുടെ നേതൃത്വത്തിലുള്ള ടി.വി.കെ (TVK) സർക്കാർ രൂപീകരണത്തിനായി തീവ്രശ്രമം നടത്തുന്നതിനിടെ, അദ്ദേഹത്തിന് അനുവദിച്ചിരുന്ന ഇസഡ്-പ്ലസ് (Z+) സുരക്ഷാ വാഹനവ്യൂഹം സംസ്ഥാന പോലീസ് പിൻവലിച്ചു (Vijay TVK Security). ഇന്നലെ അർദ്ധരാത്രിയോടെയാണ് മുഖ്യമന്ത്രിക്ക് സമാനമായ ഈ സുരക്ഷാ ക്രമീകരണങ്ങൾ മാറ്റിയത്. 108 സീറ്റുകൾ നേടിയ ടി.വി.കെ കേവല ഭൂരിപക്ഷമായ 118 തികയ്ക്കാനുള്ള നീക്കങ്ങൾ നടത്തുന്നതിനിടെയാണ് ഈ നടപടി.
സർക്കാർ രൂപീകരണത്തിന് അനുമതി തേടി വിജയ് ഗവർണർ രാജേന്ദ്ര വിശ്വനാഥ് ആർലേക്കറെ കണ്ടിരുന്നെങ്കിലും, ഭൂരിപക്ഷം തെളിയിച്ച ശേഷം മാത്രമേ സത്യപ്രതിജ്ഞ അനുവദിക്കൂ എന്ന കർശന നിലപാടിലാണ് ഗവർണർ. ഇതിന് പിന്നാലെയാണ് സുരക്ഷാ പ്രോട്ടോക്കോളുകളിൽ മാറ്റം വന്നത്.
തിരഞ്ഞെടുപ്പ് ഫലം വന്നതിന് പിന്നാലെ വിജയ്യുടെ വസതിയിലും പാർട്ടി ഓഫീസിലും സായുധ കമാൻഡോകൾ ഉൾപ്പെടെയുള്ള വിപുലമായ സുരക്ഷാ സംവിധാനങ്ങൾ ഏർപ്പെടുത്തിയിരുന്നു. ഡി.ഐ.ജി റാങ്കിലുള്ള ഉദ്യോഗസ്ഥനായിരുന്നു ഇതിന് മേൽനോട്ടം വഹിച്ചിരുന്നത്. എന്നാൽ, സുരക്ഷാ വാഹനവ്യൂഹവും പ്രോട്ടോക്കോളുകളും ഇപ്പോൾ ആവശ്യമില്ലെന്ന് ടി.വി.കെ നേതാക്കൾ അറിയിച്ചതിനാലാണ് പിൻവലിച്ചതെന്നാണ് പോലീസിന്റെ വിശദീകരണം.
അതേസമയം, കേന്ദ്രസർക്കാർ വിജയ്ക്ക് നൽകിയിട്ടുള്ള ‘വൈ’ (Y) കാറ്റഗറി സുരക്ഷ തുടരും. യാത്രകളിലും താമസസ്ഥലത്തും സി.ആർ.പി.എഫ് (CRPF) സായുധ ഗാർഡുകളുടെ സുരക്ഷ അദ്ദേഹത്തിന് ലഭിക്കും. പൊതുപരിപാടികളിലും മറ്റും പ്രാദേശിക പോലീസിന്റെ സേവനവും ലഭ്യമാകും. കേവല ഭൂരിപക്ഷം ഉറപ്പിക്കാൻ എഐഎഡിഎംകെ ഉൾപ്പെടെയുള്ള പാർട്ടികളുമായി ടി.വി.കെ ചർച്ചകൾ തുടരുന്നതിനിടെ സുരക്ഷ പിൻവലിച്ചത് രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്.
Story Summary: Following the political stalemate in Tamil Nadu, the state police withdrew the Z-plus security convoy previously assigned to TVK leader Vijay. While Governor Rajendra Arlekar insists on a proven majority before swearing-in, police clarified that the security reduction followed a request from TVK leadership, though his central Y-category security remains intact.
