തിരുവനന്തപുരം: സംസ്ഥാനത്ത് വലിയ രാഷ്ട്രീയ മാറ്റത്തിന് വഴിയൊരുക്കിക്കൊണ്ട് വി.ഡി. സതീശന്റെ നേതൃത്വത്തിലുള്ള പുതിയ യുഡിഎഫ് (UDF) സർക്കാർ നാളെ (തിങ്കളാഴ്ച) രാവിലെ 10 മണിക്ക് സത്യപ്രതിജ്ഞ ചെയ്ത് അധികാരമേൽക്കും (V D Satheesan swearing in ceremony Kerala). തിരുവനന്തപുരം സെൻട്രൽ സ്റ്റേഡിയത്തിൽ പ്രത്യേകം തയ്യാറാക്കിയ കൂറ്റൻ വേദിയിൽ നടക്കുന്ന ചടങ്ങിൽ ഗവർണർ രാജേന്ദ്ര ആർലേകർ പുതിയ മന്ത്രിസഭയ്ക്ക് സത്യവാചകം ചൊല്ലിക്കൊടുക്കും.
മന്ത്രിമാരുടെ അന്തിമ പട്ടിക വൈകീട്ട് രാജ്ഭവനിലെത്തി ഗവർണർക്ക് കൈമാറിയ ശേഷം, ക്ലിഫ് ഹൗസിൽ നടത്തിയ വാർത്താ സമ്മേളനത്തിലാണ് വി.ഡി. സതീശൻ 20 അംഗ മന്ത്രിസഭയെ ഔദ്യോഗികമായി പ്രഖ്യാപിച്ചത്.
വിവിഐപി നിരയോടെ തലസ്ഥാനം; അവസാനഘട്ട ഒരുക്കങ്ങൾ
ദേശീയ-സംസ്ഥാന രാഷ്ട്രീയത്തിലെ പ്രമുഖരുടെ വൻ നിരയാണ് നാളത്തെ സത്യപ്രതിജ്ഞാ ചടങ്ങിന് സാക്ഷ്യം വഹിക്കാൻ തിരുവനന്തപുരത്ത് എത്തുന്നത്. കോൺഗ്രസ് ദേശീയ നേതാക്കളായ രാഹുൽ ഗാന്ധി, പ്രിയങ്ക ഗാന്ധി എന്നിവർക്ക് പുറമെ കർണാടക മുഖ്യമന്ത്രി സിദ്ധരാമയ്യ, തെലങ്കാന മുഖ്യമന്ത്രി രേവന്ത് റെഡ്ഡി എന്നിവരും ചടങ്ങിൽ പങ്കെടുക്കും. സത്യപ്രതിജ്ഞ നടക്കുന്ന സെൻട്രൽ സ്റ്റേഡിയത്തിലെ പന്തലിന്റെയും വേദിയുടെയും അവസാനഘട്ട മിനുക്കുപണികൾ രാത്രി വൈകിയും പുരോഗമിക്കുകയാണ്.
‘ആർഭാടമില്ല, ജനങ്ങളെ ബുദ്ധിമുട്ടിക്കില്ല’; അകമ്പടി വാഹനങ്ങൾ വെട്ടിിച്ചുരുക്കി മുഖ്യമന്ത്രി
ഭരണമേൽക്കുന്നതിന് തൊട്ടുമുമ്പ് തന്നെ തന്റെ ലളിതമായ ഭരണശൈലി വ്യക്തമാക്കുന്ന മാതൃകാപരമായ നിലപാടാണ് വി.ഡി. സതീശൻ പ്രഖ്യാപിച്ചിരിക്കുന്നത്.
സാധാരണയായി മുഖ്യമന്ത്രിമാർക്ക് ലഭിക്കാറുള്ള മുപ്പതോളം വരുന്ന വൻ പോലീസ് അകമ്പടി വാഹനവ്യൂഹം (Escort/Pilot) താൻ പൂർണ്ണമായും ഒഴിവാക്കുമെന്ന് അദ്ദേഹം അറിയിച്ചു. തനിക്ക് ഇസഡ് പ്ലസ് (Z+) കാറ്റഗറി സുരക്ഷയുണ്ടെങ്കിലും, വലിയ വാഹനവ്യൂഹം സൈറൺ മുഴക്കി റോഡിലിറങ്ങുന്നത് സാധാരണക്കാരായ ജനങ്ങളിൽ കടുത്ത നിരാശയും ദേഷ്യവും ഉണ്ടാക്കുമെന്നും അതുകൊണ്ട് ജനങ്ങളെ ബുദ്ധിമുട്ടിക്കാത്ത ലളിതമായ സുരക്ഷാ രീതിയായിരിക്കും താൻ പിന്തുടരുകയെന്നും അദ്ദേഹം വ്യക്തമാക്കി.
നീണ്ട ചർച്ചകൾക്കും അനിശ്ചിതത്വങ്ങൾക്കും ഒടുവിലാണ് മന്ത്രിമാരുടെ കാര്യത്തിൽ തീരുമാനമായത്. ഒട്ടേറെ തർക്കങ്ങൾക്കും സമ്മർദ്ദങ്ങൾക്കും ഇടയിലും അതിവേഗം സമവായത്തിലെത്തി മന്ത്രിസഭയെ പ്രഖ്യാപിക്കാൻ കഴിഞ്ഞത് പുതിയ സർക്കാരിന്റെ വലിയ ആത്മവിശ്വാസമാണ് കാണിക്കുന്നതെന്നും സതീശൻ വാർത്താ സമ്മേളനത്തിൽ കൂട്ടിച്ചേർത്തു.
അതേസമയം, നിയുക്ത യുഡിഎഫ് മന്ത്രിസഭയിലെ മന്ത്രിമാരെയും അവരുടെ ഘടനയും നിയുക്ത മുഖ്യമന്ത്രി വി.ഡി. സതീശൻ ഔദ്യോഗികമായി പ്രഖ്യാപിച്ചു (UDF ministers list Kerala). രാജ്ഭവനിലെത്തി ഗവർണർ രാജേന്ദ്ര ആർലേകറിന് മന്ത്രിമാരുടെ അന്തിമ പട്ടിക കൈമാറിയ ശേഷം തിരുവനന്തപുരത്ത് നടത്തിയ വാർത്താ സമ്മേളനത്തിലാണ് അദ്ദേഹം വിവരങ്ങൾ പുറത്തുവിട്ടത്. വിവിധ കക്ഷികൾക്കുള്ള പ്രാതിനിധ്യവും രണ്ടര വർഷത്തെ കാലാവധി പങ്കിടലും ഉൾപ്പെടെയുള്ള വിപുലമായ പട്ടികയാണ് പ്രഖ്യാപിച്ചിരിക്കുന്നത്.
കോൺഗ്രസ് മന്ത്രിമാർ (INC):
കോൺഗ്രസിൽ നിന്ന് പത്ത് മന്ത്രിമാരാണ് ആദ്യ ഘട്ടത്തിൽ സത്യപ്രതിജ്ഞ ചെയ്യുക. രണ്ടര വർഷത്തിന് ശേഷം ഒരു മന്ത്രി കൂടി പദവിയിലെത്തും.
രമേശ് ചെന്നിത്തല
കെ. മുരളീധരൻ
എ.പി. അനിൽ കുമാർ
ബിന്ദു കൃഷ്ണ
സണ്ണി ജോസഫ്
പി.സി. വിഷ്ണുനാഥ്
റോജി എം. ജോൺ
ടി. സിദ്ദിഖ്
കെ.എ. തുളസി
ഒ.ജെ. ജനീഷ് (രണ്ടര വർഷത്തിന് ശേഷം വയനാട്ടിൽ നിന്നുള്ള ഐ.സി. ബാലകൃഷ്ണൻ കൂടി മന്ത്രിസഭയിലെത്തും).
മുസ്ലിം ലീഗ് മന്ത്രിമാർ (IUML):
മുസ്ലിം ലീഗിന് ആദ്യ ഘട്ടത്തിൽ അഞ്ച് മന്ത്രിസ്ഥാനങ്ങളാണ് ലഭിച്ചിട്ടുള്ളത്.
പി.കെ. കുഞ്ഞാലിക്കുട്ടി
പി.കെ. ബഷീർ
എൻ. ഷംസുദ്ദീൻ
കെ.എം. ഷാജി
വി.ഇ. അബ്ദുൾ ഗഫൂർ (മലബാർ മേഖലയ്ക്കും കോഴിക്കോട് ജില്ലയ്ക്കും കൂടുതൽ പ്രാതിനിധ്യം ഉറപ്പാക്കാൻ രണ്ടര വർഷത്തിന് ശേഷം പാറക്കൽ അബ്ദുള്ള മന്ത്രിയാകും).
മറ്റ് ഘടകകക്ഷി മന്ത്രിമാർ:
കേരള കോൺഗ്രസ് (ജോസഫ്): മോൻസ് ജോസഫ്
ആർഎസ്പി (RSP): ഷിബു ബേബി ജോൺ
സിഎംപി (CMP): സി.പി. ജോൺ
മന്ത്രിസ്ഥാനം പങ്കിടലും മറ്റ് പദവികളും:
മന്ത്രിസ്ഥാനം പങ്കിടൽ: കേരള കോൺഗ്രസ് ജേക്കബ് ഗ്രൂപ്പിലെ അനൂപ് ജേക്കബും, കെഡിപി (KDP) നേതാവ് മാണി സി. കാപ്പനും മന്ത്രിസ്ഥാനം രണ്ടര വർഷം വീതം പങ്കിടും.
സ്പീക്കർ: തിരുവഞ്ചൂർ രാധാകൃഷ്ണൻ
ഡെപ്യൂട്ടി സ്പീക്കർ: ഷാനിമോൾ ഉസ്മാൻ
ചീഫ് വിപ്പ്: അപു ജോസഫ് (കേരള കോൺഗ്രസ്)
