തിരുവനന്തപുരം: കേരളത്തിൽ വരും മണിക്കൂറുകളിൽ വ്യാപകമായ മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ് (Kerala Weather Update). മഴ ശക്തമാകുന്ന സാഹചര്യത്തിൽ പത്തനംതിട്ട, കോട്ടയം, ഇടുക്കി, എറണാകുളം എന്നീ നാല് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചു. ശക്തമായ മഴയോടൊപ്പം ഇടിമിന്നലിനും കാറ്റിനും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
മന്നാർ കടലിടുക്കിനും സമീപ പ്രദേശങ്ങൾക്കും മുകളിലായി നിലകൊള്ളുന്ന ചക്രവാതച്ചുഴി (Cyclonic Circulation) ആണ് നിലവിലെ മഴയ്ക്ക് കാരണം. ഇതിന്റെ സ്വാധീനഫലമായി മധ്യ-തെക്കൻ കേരളത്തിൽ വരും ദിവസങ്ങളിലും മഴ തുടരാനാണ് സാധ്യത. വേനൽമഴ സജീവമായതോടെ സംസ്ഥാനത്ത് കഴിഞ്ഞ ദിവസങ്ങളിൽ അനുഭവപ്പെട്ട കടുത്ത ചൂടിന് നേരിയ ശമനമുണ്ടാകും.
കഴിഞ്ഞ ബുധനാഴ്ച കൊല്ലം ജില്ലയിലെ പുനലൂരിലാണ് സംസ്ഥാനത്തെ ഏറ്റവും ഉയർന്ന താപനില (37.5 ഡിഗ്രി സെൽഷ്യസ്) രേഖപ്പെടുത്തിയത്. എന്നാൽ വൈകുന്നേരത്തോടെ പെയ്ത മഴ ചൂട് കുറയാൻ സഹായിച്ചു. ഈ വർഷം വേനൽമഴ വൈകിയാണ് എത്തിയതെങ്കിലും വരും ദിവസങ്ങളിൽ കൂടുതൽ മഴ ലഭിക്കുമെന്നാണ് പ്രതീക്ഷ. ഏപ്രിൽ അവസാന വാരത്തോടെയാണ് ഇത്തവണ കേരളത്തിൽ വേനൽമഴ സജീവമായത്.
Story Summary: Widespread summer rains are expected in Kerala due to a cyclonic circulation over the Gulf of Mannar, with yellow alerts issued for Pathanamthitta, Kottayam, Idukki, and Ernakulam districts. The weather department predicts heavy rain accompanied by lightning and gusty winds, providing much-needed relief from the intense heat.
