തിരുവനന്തപുരം: കേരളത്തിൽ അഞ്ചു പതിറ്റാണ്ടായി നിലനിന്നിരുന്ന രാഷ്ട്രീയ സമവാക്യങ്ങളെ കാറ്റിൽ പറത്തിക്കൊണ്ട് യുഡിഎഫ് മിന്നുന്ന വിജയം സ്വന്തമാക്കി (Kerala Election Results 2026). വി.ഡി. സതീശന്റെ നേതൃത്വത്തിൽ ‘സെഞ്ചുറി’ തികച്ചു ഭരണം പിടിക്കുമെന്ന പ്രവചനം യാഥാർഥ്യമായപ്പോൾ, എൽഡിഎഫ് കേവലം 35 സീറ്റുകളിലൊതുങ്ങി. യുഡിഎഫ് തരംഗത്തിനിടയിലും മൂന്ന് സീറ്റുകൾ നേടിയ ബിജെപി സംസ്ഥാനത്ത് നിർണ്ണായക സാന്നിധ്യമായി മാറി. ചാത്തന്നൂർ , നേമം, കഴക്കൂട്ടം മാണ്ടാലങ്ങളിൽ ബിജെപി വിജയിച്ചു.
സിപിഎമ്മിന്റെ ഉരുക്കുകോട്ടകളായ പയ്യന്നൂർ, തളിപ്പറമ്പ്, ഉദുമ, തൃക്കരിപ്പൂർ മണ്ഡലങ്ങൾ തകർന്നു വീണു. വി. ശിവൻകുട്ടി, പി. രാജീവ്, എം.ബി. രാജേഷ്, വീണാ ജോർജ്, റോഷി അഗസ്റ്റിൻ, ആർ. ബിന്ദു ഉൾപ്പെടെ 12 മന്ത്രിമാരാണ് പരാജയപ്പെട്ടത്. മുഖ്യമന്ത്രി പിണറായി വിജയനും കെ.എൻ. ബാലഗോപാലും മുഹമ്മദ് റിയാസും അടക്കം ഏഴ് മന്ത്രിമാർക്ക് മാത്രമാണ് വിജയിക്കാനായത്.
കോൺഗ്രസ് 64 സീറ്റുകൾ നേടി മികച്ച പ്രകടനം കാഴ്ചവെച്ചു. മുസ്ലിം ലീഗ് 22 സീറ്റുകളോടെ ചരിത്ര വിജയമാഘോഷിച്ചു. ഫാത്തിമ തഹിലിയയുടെ വിജയത്തിലൂടെ ലീഗിന് ആദ്യമായി സഭയിൽ വനിതാ പ്രാതിനിധ്യമായി. സിപിഎമ്മിനോട് ഇടഞ്ഞ ജി. സുധാകരൻ (അമ്പലപ്പുഴ), വി. കുഞ്ഞികൃഷ്ണൻ (പയ്യന്നൂർ), ടി.കെ. ഗോവിന്ദൻ മാസ്റ്റർ (തളിപ്പറമ്പ്) എന്നിവർ യുഡിഎഫ് പിന്തുണയോടെ ജയിച്ചു കയറിയത് ഇടതുപക്ഷത്തിന് വലിയ ആഘാതമായി.
| മുന്നണി | 2021 (സീറ്റുകൾ) | 2026 (സീറ്റുകൾ) |
| യുഡിഎഫ് (UDF) | 41 | 103 |
| എൽഡിഎഫ് (LDF) | 99 | 35 |
| എൻഡിഎ (NDA) | 0 | 3 |
ബിജെപിയുടെ ചരിത്ര മുന്നേറ്റം:
നേമം തിരിച്ചുപിടിച്ച ബിജെപി, ചരിത്രത്തിലാദ്യമായി ചാത്തന്നൂരിലും കഴക്കൂട്ടത്തും താമര വിരിയിച്ചു. രാജീവ് ചന്ദ്രശേഖർ (നേമം), ബി.ബി. ഗോപകുമാർ (ചാത്തന്നൂർ) എന്നിവരുടെ വിജയങ്ങൾ ബിജെപിക്ക് കേരളത്തിൽ പുതിയ ഊർജ്ജം നൽകുന്നു.
ജില്ലകളിലെ പ്രകടനം:
ഇടുക്കി, കോട്ടയം, എറണാകുളം, മലപ്പുറം, വയനാട് ജില്ലകളിൽ എൽഡിഎഫ് പൂർണ്ണമായും തുടച്ചുനീക്കപ്പെട്ടു. കോഴിക്കോട് ജില്ലയിൽ 13-ൽ 12 സീറ്റുകളും പിടിച്ചടക്കി യുഡിഎഫ് സർവ്വാധിപത്യം സ്ഥാപിച്ചു. തൃക്കരിപ്പൂരിൽ സന്ദീപ് വാര്യർ നേടിയ വിജയവും രാഷ്ട്രീയ കേരളം അമ്പരപ്പോടെയാണ് വീക്ഷിച്ചത്.
Story Summary: The 2026 Kerala Assembly Election results show a massive UDF wave, securing 103 seats and unseating the LDF. Significant upsets include the defeat of 12 ministers and the fall of CPM strongholds like Payyanur. The BJP made history by winning 3 seats, including Nemom, Chathannoor, and Kazhakoottam.
