ഹത്രാസ്: കാമുകനൊപ്പം ജീവിക്കണമെന്ന ആവശ്യവുമായി വിവാഹിതയായ യുവതി മൊബൈൽ ടവറിന് മുകളിൽ കയറി പരിഭ്രാന്തി പരത്തി. ഉത്തർപ്രദേശിലെ ഹത്രാസിൽ ചൊവ്വാഴ്ച ഉച്ചയോടെയായിരുന്നു സംഭവം. മൂന്ന് മണിക്കൂറോളം നീണ്ട നാടകീയ രംഗങ്ങൾക്കൊടുവിൽ പോലീസും അഗ്നിശമന സേനയും ചേർന്നാണ് യുവതിയെ താഴെയിറക്കിയത്.(Married UP Woman Climbs Mobile Tower, Says Wants To Be With Her Lover)
സാസ്നി പോലീസ് സ്റ്റേഷൻ പരിധിയിലെ ലുത്സാൻ റോഡിലുള്ള മൊബൈൽ ടവറിലാണ് മുപ്പതുകാരിയായ പൂജ കയറിയത്. ടവറിന് മുകളിൽ യുവതിയെ കണ്ടതോടെ നാട്ടുകാരും പോലീസും പരിഭ്രാന്തരായി. ഏകദേശം രണ്ട് വർഷം മുൻപായിരുന്നു പൂജയുടെ വിവാഹം. ഭർത്താവിന്റെ വീട്ടിൽ നിന്നും ചൊവ്വാഴ്ച ഉച്ചയ്ക്ക് ഇറങ്ങിയ യുവതി, വഴിമധ്യേ കാണപ്പെട്ട ടവറിൽ കയറുകയായിരുന്നു.
സംഭവസ്ഥലത്തെത്തിയ സാസ്നി സ്റ്റേഷൻ ഹൗസ് ഓഫീസർ വിപിൻ ചൗധരിയും സംഘവും യുവതിയെ താഴെയിറക്കാൻ മണിക്കൂറുകളോളം ശ്രമിച്ചെങ്കിലും അവർ വഴങ്ങിയില്ല. കഠിനമായ വേനൽച്ചൂടിനെ പോലും അവഗണിച്ചായിരുന്നു യുവതിയുടെ പ്രതിഷേധം. ഒടുവിൽ പോലീസിന്റെയും ഫയർഫോഴ്സിന്റെയും നിരന്തരമായ കൗൺസിലിംഗിനും അനുനയ നീക്കങ്ങൾക്കും ശേഷമാണ് ഇവർ താഴെയിറങ്ങാൻ തയ്യാറായതെന്ന് അധികൃതർ അറിയിച്ചു.
തന്റെ വിവാഹജീവിതത്തിൽ അതൃപ്തയാണെന്നും അയൽഗ്രാമത്തിലുള്ള മറ്റൊരു യുവാവിനൊപ്പം ജീവിക്കാനാണ് താൻ ആഗ്രഹിക്കുന്നതെന്നും പ്രാഥമിക അന്വേഷണത്തിൽ യുവതി പോലീസിനോട് വെളിപ്പെടുത്തി. മൂന്ന് മണിക്കൂറോളം നാടിനെ മുൾമുനയിൽ നിർത്തിയ സംഭവത്തിന് ശേഷം യുവതിയെ സുരക്ഷിതമായി താഴെയിറക്കി ബന്ധുക്കൾക്കൊപ്പം വിട്ടയച്ചു.
