തിരുവനന്തപുരം: സംസ്ഥാനത്തെ ചൂട് റെക്കോർഡ് നിലവാരത്തിലേക്ക് ഉയരുന്ന സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് റവന്യൂ മന്ത്രി കെ. രാജൻ (K Rajan Revenue Minister). മുഖ്യമന്ത്രിയുടെ അധ്യക്ഷതയിൽ ചേർന്ന ഉന്നതതല അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. അടുത്ത രണ്ട് ദിവസം കൂടി കഠിനമായ ചൂട് തുടരുമെന്നാണ് മുന്നറിയിപ്പ്.
അനാവശ്യമായ പകൽ യാത്രകൾ പൂർണ്ണമായും ഒഴിവാക്കണം. സർക്കാർ നൽകുന്ന പ്രോട്ടോക്കോൾ അനുസരിച്ച്, ഒരു ലോക്ക്ഡൗണിന്റെ മാനസികാവസ്ഥയിൽ വീടിനുള്ളിൽ തന്നെ തുടരാൻ കഴിയുന്നവർ അങ്ങനെ ചെയ്യണമെന്ന് മന്ത്രി അഭ്യർത്ഥിച്ചു.ചൂട് കൂടുമ്പോൾ തീപിടുത്തത്തിനുള്ള സാധ്യത വർധിക്കുന്നു. കൂടാതെ, ഇഴജന്തുക്കൾ പുറത്തിറങ്ങുന്നത് മൂലമുള്ള പാമ്പുകടി കേസുകളും കൂടാൻ സാധ്യതയുള്ളതിനാൽ വീടും പരിസരവും പരിശോധിക്കുമ്പോൾ ജാഗ്രത വേണം.
തദ്ദേശ സ്ഥാപനങ്ങളുടെ നേതൃത്വത്തിൽ തണ്ണീർ പന്തലുകൾ ഒരുക്കുന്നതും കുടിവെള്ള വിതരണം സുഗമമാക്കുന്നതും സർക്കാർ വിലയിരുത്തി. നിർദ്ദേശങ്ങൾ പാലിക്കാത്തവർക്കെതിരെ കർശന നടപടിയുണ്ടാകുമെന്നും മന്ത്രി അറിയിച്ചു.
താപനില ഉയരുന്ന സാഹചര്യത്തിൽ തൊഴിൽ സമയത്തിൽ വരുത്തിയ മാറ്റം കർശനമായി പാലിക്കപ്പെടുന്നുണ്ടെന്ന് ഉറപ്പുവരുത്തുമെന്നും മന്ത്രി കൂട്ടിച്ചേർത്തു.
Story Summary: Revenue Minister K. Rajan has urged the public to stay vigilant as the heatwave continues in Kerala. Speaking after a high-level review meeting, he advised people to avoid unnecessary travel and stay indoors, comparing the caution required to a “lockdown mindset.” He also warned about fire hazards and increased snakebite incidents during the extreme heat.
