ചെന്നൈ: തമിഴ്നാട്ടിലെ തേനി ജില്ലയിലുള്ള കമ്പത്ത് പടക്കനിർമ്മാണശാലയിലുണ്ടായ ശക്തമായ സ്ഫോടനത്തിൽ രണ്ട് മരണം (Cumbum Fireworks Blast). തേനി കുംഭനഗരത്തിലെ ലക്ഷ്മി പടക്കനിർമ്മാണശാലയിലാണ് ശനിയാഴ്ച രാവിലെ അപകടമുണ്ടായത്. സ്ഫോടനത്തിന്റെ ആഘാതത്തിൽ ഫാക്ടറി കെട്ടിടം പൂർണ്ണമായും തകർന്നു. തിരഞ്ഞെടുപ്പ് അവധിക്ക് ശേഷം ശനിയാഴ്ച രാവിലെ പടക്കനിർമ്മാണശാല തുറക്കാനെത്തിയപ്പോഴാണ് അപകടമുണ്ടായത്.
അസംസ്കൃത വസ്തുക്കൾ സൂക്ഷിച്ചിരുന്ന ഗോഡൗണിന്റെ ഷട്ടർ തുറക്കുന്നതിനിടെ അപ്രതീക്ഷിതമായി പൊട്ടിത്തെറി സംഭവിക്കുകയായിരുന്നു. ഷട്ടർ തുറക്കാൻ എത്തിയ നാല് തൊഴിലാളികളിൽ രണ്ട് പേർ സംഭവസ്ഥലത്ത് വെച്ച് തന്നെ മരിച്ചു. പരിക്കേറ്റ മറ്റ് രണ്ട് പേരെ ഉടൻ തന്നെ തേനി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇവരുടെ നില ഗുരുതരമാണെന്നാണ് റിപ്പോർട്ടുകൾ.
കഴിഞ്ഞ രണ്ട് ദിവസമായി അടഞ്ഞുകിടന്ന ഫാക്ടറിക്കുള്ളിൽ അമിതമായ ചൂട് മൂലം വാതകം കെട്ടിക്കിടന്നതാകാം അല്ലെങ്കിൽ ഷട്ടർ തുറന്നപ്പോൾ ഉണ്ടായ ചെറിയ സ്പാർക്ക് (Spark) വെടിമരുന്നിന് തീപിടിക്കാൻ കാരണമായതാകാം എന്നാണ് പ്രാഥമിക നിഗമനം. രണ്ട് വർഷം മുൻപാണ് ഈ സ്ഥാപനം പ്രവർത്തനം ആരംഭിച്ചത്.
കേരളത്തിലെ മുണ്ടത്തിക്കോടുണ്ടായ വെടിക്കെട്ട് അപകടത്തിന്റെ നടുക്കം വിട്ടുമാറും മുൻപാണ് കേരള-തമിഴ്നാട് അതിർത്തി മേഖലയിൽ വീണ്ടും സമാനമായ ദുരന്തം ആവർത്തിച്ചിരിക്കുന്നത്. സംഭവത്തിൽ തേനി പോലീസ് കേസെടുത്ത് അന്വേഷണം ആരംഭിച്ചു.
Story Summary: Two workers were killed and two others injured in a massive explosion at Lakshmi Fireworks factory in Cumbum, Theni district. The incident occurred on Saturday morning when workers tried to open the warehouse shutter after a two-day holiday. Preliminary reports suggest excessive heat or a spark while opening the shutter caused the blast, which completely destroyed the building.
