പത്തനംതിട്ട: ശബരിമല സന്നിധാനത്തിന് മുകളിൽ അനുമതിയില്ലാതെ കോസ്റ്റ്ഗാർഡ് ഹെലികോപ്റ്റർ പറന്നത് ഗുരുതരമായ സുരക്ഷാ വീഴ്ചയാണെന്ന് എഡിജിപി എസ്. ശ്രീജിത്തിന്റെ റിപ്പോർട്ട് (Coast Guard Security Breach Sabarimala). വ്യാഴാഴ്ച രാവിലെ 11 മണിയോടെയാണ് സന്നിധാനത്തെ അതീവ സുരക്ഷാ മേഖലയിൽ കോസ്റ്റ്ഗാർഡിന്റെ ‘ചേതക്’ ഹെലികോപ്റ്റർ താഴ്ന്നു പറന്നത്. സംഭവത്തിൽ കോസ്റ്റ്ഗാർഡ് നൽകിയ വിശദീകരണം തൃപ്തികരമല്ലെന്നും റിപ്പോർട്ടിൽ വ്യക്തമാക്കുന്നു.
സന്നിധാനത്തെ കൊടിമരത്തിന് തൊട്ടുമുകളിലൂടെയും സോപാനത്തിന് അടുത്തുകൂടിയും വളരെ വേഗത കുറച്ചാണ് ഹെലികോപ്റ്റർ സഞ്ചരിച്ചത്. ശബരിമല മുതൽ നിലയ്ക്കൽ വരെ അതീവ സുരക്ഷാ മേഖലയായിരിക്കെ, ഇത്രയും താഴ്ന്ന് ഹെലികോപ്റ്റർ പറക്കുന്നത് ആദ്യ സംഭവമാണെന്ന് പോലീസ് വിലയിരുത്തുന്നു. ഹെലികോപ്റ്ററിൽ ഉണ്ടായിരുന്നവർ ക്ഷേത്രത്തിന്റെ ചിത്രങ്ങൾ പകർത്തിയതായി സംശയമുണ്ട്. ഇക്കാര്യത്തിൽ കൂടുതൽ വ്യക്തതയ്ക്കായി എയർ കൺട്രോൾ റൂമിൽ നിന്നും വിവരം തേടും. മോശം കാലാവസ്ഥയെത്തുടർന്ന് ദിശ മാറി സഞ്ചരിച്ചതാണെന്നും റഡാർ സംവിധാനത്തിന് പകരം ജിപിഎസ് ഉപയോഗിച്ചാണ് സഞ്ചരിക്കുന്നതെന്നുമാണ് കോസ്റ്റ്ഗാർഡ് നൽകിയ വിശദീകരണം. എന്നാൽ ഇത് പോലീസ് തള്ളി.
സംഭവത്തിൽ വിശദമായ അന്വേഷണം നടത്താൻ പത്തനംതിട്ട ജില്ലാ പോലീസ് മേധാവിയെ ചുമതലപ്പെടുത്തി. ഹൈക്കോടതി നിയോഗിച്ച സ്പെഷ്യൽ കമ്മീഷണറുടെ നിർദ്ദേശപ്രകാരമാണ് എഡിജിപി റിപ്പോർട്ട് സമർപ്പിച്ചത്. വിശ്വാസികളുടെയും ക്ഷേത്രത്തിന്റെയും സുരക്ഷയെ ബാധിക്കുന്ന ഇത്തരം നടപടികളിൽ വരുംദിവസങ്ങളിൽ കൂടുതൽ നടപടികൾ ഉണ്ടായേക്കും.
Summary: ADGP S. Sreejith’s report labels the unauthorized flight of a Coast Guard helicopter over the Sabarimala Sannidhanam as a serious security breach. The helicopter reportedly flew very low near the temple’s flagmast and sanctum, potentially taking photographs. Rejecting the Coast Guard’s explanation of a weather-related diversion, the ADGP has ordered a detailed probe by the Pathanamthitta SP.
