തിരുവനന്തപുരം: എൽ.ഡി.എഫ് സർക്കാരിന്റെ കാലത്ത് മുഖ്യമന്ത്രിയുടെ ദുരിതാശ്വാസ നിധിയിൽ (CMDRF) നിന്നും 262 കോടി രൂപ വകമാറ്റി ചെലവഴിച്ചുവെന്ന രീതിയിൽ പുറത്തുവരുന്ന വാർത്തകൾ തികച്ചും വസ്തുതാവിരുദ്ധമാണെന്ന് പ്രതിപക്ഷ നേതാവ് പിണറായി വിജയൻ (Pinarayi Vijayan statement CMDRF fund diversion). ദുരിതാശ്വാസ നിധിയുടെ വിശ്വാസ്യത തകർക്കാനും എൽ.ഡി.എഫ് ഭരണകാലത്ത് എന്തോ അരുതാത്തത് സംഭവിച്ചുവെന്ന് വരുത്തിത്തീർക്കാനുമുള്ള ബോധപൂർവ്വമായ ശ്രമങ്ങളാണ് ഇപ്പോൾ നടക്കുന്നതെന്നും അദ്ദേഹം പ്രസ്താവനയിലൂടെ കുറ്റപ്പെടുത്തി. 2024-25 സാമ്പത്തിക വർഷത്തെ സംസ്ഥാന സമ്പദ് വ്യവസ്ഥയെക്കുറിച്ചുള്ള കൺട്രോളർ ആൻഡ് ഓഡിറ്റർ ജനറലിന്റെ (C&AG) പുതിയ ഓഡിറ്റ് റിപ്പോർട്ടിനെ മറയാക്കിയാണ് ഈ വ്യാജപ്രചാരണമെന്ന് അദ്ദേഹം ചൂണ്ടിക്കാട്ടി.
സി.ആൻഡ്.എ.ജി റിപ്പോർട്ടിലെ നിഗമനങ്ങളിൽ, സ്റ്റേറ്റ് ട്രഷറി സേവിംഗ്സ് ബാങ്കിൽ (STSB) കിടന്നിരുന്ന തുകകൾ സാമ്പത്തിക വർഷാവസാനം സംസ്ഥാനത്തിന്റെ സഞ്ചിത നിധിയിലേക്ക് (Consolidated Fund) തിരിച്ചെടുത്തതുമായി ബന്ധപ്പെട്ട് പരാമർശിക്കുന്ന ഭാഗമാണ് വിവാദങ്ങൾക്ക് ആധാരം. എന്നാൽ, റിപ്പോർട്ടിന്റെ 139-ാം പേജിൽ തന്നെ ഇതിന്റെ കൃത്യമായ യാഥാർത്ഥ്യം വിശദീകരിക്കുന്നുണ്ടെന്ന് പിണറായി വിജയൻ വ്യക്തമാക്കി. 2024-25 വർഷത്തിൽ അഞ്ച് എസ്ടിഎസ്ബി അക്കൗണ്ടുകളിൽ വിനിയോഗിക്കപ്പെടാതെ കിടന്നിരുന്ന മുഖ്യമന്ത്രിയുടെ ദുരിതാശ്വാസ നിധിയുമായി ബന്ധപ്പെട്ട 262.06 കോടിയുടെ പൊതുസംഭാവനകൾ സംസ്ഥാനത്തിന്റെ സഞ്ചിത നിധിയിലേക്ക് താൽക്കാലികമായി തിരിച്ചെടുത്തത് ക്രമരഹിതമാണ് എന്നാണ് ഓഡിറ്റ് റിപ്പോർട്ടിൽ പറയുന്നത്.
എന്നാൽ, ഇതേ ഭാഗത്ത് തന്നെ സംസ്ഥാന സർക്കാർ നൽകിയ വ്യക്തമായ മറുപടിയും സി.ആൻഡ്.എ.ജി രേഖപ്പെടുത്തിയിട്ടുണ്ട്. സാമ്പത്തിക വർഷാവസാനം ട്രഷറി അക്കൗണ്ടുകളിൽ വിനിയോഗിക്കാതെ കിടക്കുന്ന തുകകൾ പൊതു കണക്കിന്റെ (Public Account) വലിപ്പം ക്രമീകരിക്കാൻ വേണ്ടി എല്ലാ വർഷവും സഞ്ചിത നിധിയിലേക്ക് മാറ്റാറുണ്ടെന്ന് സർക്കാർ 2026 ജനുവരിയിൽ ഓഡിറ്റിന് മറുപടി നൽകിയിരുന്നു. ഇങ്ങനെ താൽക്കാലികമായി മാറ്റിയ ഫണ്ടുകൾ പുതിയ സാമ്പത്തിക വർഷത്തിന്റെ ആദ്യവാരത്തിൽ തന്നെ (ഏപ്രിൽ ആദ്യവാരം) യാതൊരു കുറവും കൂടാതെ അതാത് എസ്ടിഎസ്ബി അക്കൗണ്ടുകളിലേക്ക് തന്നെ തിരികെ അലോക്കേറ്റ് ചെയ്ത് നൽകിയിട്ടുണ്ടെന്ന വസ്തുത ഓഡിറ്റ് ടീം തന്നെ കണ്ടെത്തി സ്ഥിരീകരിച്ചിട്ടുള്ളതാണെന്നും അദ്ദേഹം ഓർമ്മിപ്പിച്ചു.
ഓരോ സാമ്പത്തിക വർഷാവസാനവും മാർച്ച് 31-ന് സർക്കാർ വകുപ്പുകൾ, പൊതുമേഖലാ സ്ഥാപനങ്ങൾ, ഗ്രാന്റ്-ഇൻ-എയ്ഡ് സ്ഥാപനങ്ങൾ തുടങ്ങിയവയുടെ ട്രഷറി അക്കൗണ്ടുകളിൽ ചെലവാകാതെ കിടക്കുന്ന തുക കൺസോളിഡേറ്റഡ് ഫണ്ടിലേക്ക് മാറ്റുന്നത് സംസ്ഥാന സർക്കാർ സ്വീകരിച്ചുപോരുന്ന തികച്ചും സുതാര്യവും സാങ്കേതികവുമായ ഒരു ധനകാര്യ ക്രമീകരണം മാത്രമാണ്. ഈ തുക പുതിയ സാമ്പത്തിക വർഷാരംഭത്തിൽ തന്നെ കാലതാമസമില്ലാതെ പഴയപടി ട്രഷറി അക്കൗണ്ടിലേക്ക് ക്രെഡിറ്റ് ചെയ്യാറുമുണ്ട്. ഇതിൽ യാതൊരുവിധ സാമ്പത്തിക ദുരൂഹതയോ വകമാറ്റലോ ഇല്ല. ദുരിതാശ്വാസ നിധിയിലെ പണം പൂർണ്ണമായും സുരക്ഷിതമാണ്. അത് മറ്റേതെങ്കിലും ആവശ്യത്തിനായി വിനിയോഗിച്ചിട്ടില്ലെന്നും അദ്ദേഹം കൂട്ടിച്ചേർത്തു.
ഉന്നത ധനകാര്യ ഉദ്യോഗസ്ഥർ തൃപ്തികരമായ വിശദീകരണം നൽകിയിട്ടും നിർഭാഗ്യവശാൽ അക്കൗണ്ടന്റ് ജനറൽ ഈ സാങ്കേതിക വശങ്ങളെ ശരിയായി ഉൾക്കൊള്ളാൻ തയ്യാറായിട്ടില്ല. സി.ആൻഡ്.എ.ജി റിപ്പോർട്ടിൽ ഈ തുക മാറ്റിയ പ്രക്രിയ ‘ക്രമരഹിതമാണ്’ എന്ന് മാത്രമാണ് രേഖപ്പെടുത്തിയിട്ടുള്ളത്. അവിടെ ഒരുവിധത്തിലുള്ള സാമ്പത്തിക ദുരുപയോഗമോ അഴിമതിയോ സംസ്ഥാനത്തിന് പണം നഷ്ടപ്പെട്ടതായോ ആരോപിച്ചിട്ടില്ല. ഈ യാഥാർത്ഥ്യങ്ങൾ നിലനിൽക്കെ, പ്രതിപക്ഷത്തെയും എൽ.ഡി.എഫിനെയും രാഷ്ട്രീയമായി അധിക്ഷേപിക്കാൻ വേണ്ടി മാധ്യമങ്ങൾ നടത്തുന്ന ഈ ബോധപൂർവ്വമായ ശ്രമങ്ങളെ ജനങ്ങൾ തിരിച്ചറിയണമെന്നും പിണറായി വിജയൻ ആവശ്യപ്പെട്ടു.
Story Summary: Leader of Opposition Pinarayi Vijayan refuted media reports alleging that ₹262 crores from the Chief Minister’s Distress Relief Fund (CMDRF) was diverted during the LDF regime. Commenting on the 2024-25 C&AG audit report, he stated that moving unutilized funds from STSB accounts to the Consolidated Fund at the end of the financial year (March 31) is a transparent, routine accounting procedure. The report itself notes that the ₹262.06 crores was re-allocated back to the respective CMDRF accounts in the very first week of the next financial year. He emphasized that the funds are completely secure and no financial loss or misuse occurred.
