ലോകത്തിലെ ഏറ്റവും വലിയ ജലപോരാട്ടം മരണക്കളമായി; തായ്‌ലൻഡിലെ സോങ്ക്രാൻ ആഘോഷങ്ങളിൽ മരണം 200 കടന്നു | Thailand Songkran Festival Accidents

ബാങ്കോക്ക്: തായ്‌ലൻഡിലെ പരമ്പരാഗത പുതുവത്സരാഘോഷമായ സോങ്ക്രാൻ ഇത്തവണ രക്തരൂക്ഷിതമായി. ലോകത്തിലെ ഏറ്റവും വലിയ ജലപോരാട്ടം എന്ന് വിശേഷിപ്പിക്കപ്പെടുന്ന ഈ ആഘോഷത്തിന്റെ ആദ്യ നാളുകളിൽ തന്നെ 216 മരണങ്ങൾ റിപ്പോർട്ട് ചെയ്തു (Thailand Songkran Festival Accidents). ‘ഏഴ് അപകടകരമായ ദിവസങ്ങൾ’ എന്ന് വിളിക്കപ്പെടുന്ന ഈ ഉത്സവ കാലയളവിൽ ഇതുവരെ 951-ലധികം വാഹനാപകടങ്ങളും നൂറുകണക്കിന് പരിക്കുകളുമാണ് രേഖപ്പെടുത്തിയിട്ടുള്ളത്. പുതുവത്സരം പ്രമാണിച്ച് ബാങ്കോക്ക് പോലുള്ള പ്രധാന നഗരങ്ങളിൽ നിന്ന് ലക്ഷക്കണക്കിന് ആളുകൾ തങ്ങളുടെ ഗ്രാമങ്ങളിലേക്ക് യാത്ര ചെയ്യുന്നതാണ് അപകടങ്ങൾ വർദ്ധിക്കാൻ പ്രധാന കാരണം.

അമിതവേഗതയും മദ്യപിച്ച് വാഹനമോടിക്കുന്നതുമാണ് മരണസംഖ്യ ഉയരാനുള്ള പ്രധാന കാരണങ്ങളായി അധികൃതർ ചൂണ്ടിക്കാട്ടുന്നത്. റിപ്പോർട്ടുകൾ പ്രകാരം 42 ശതമാനം അപകടങ്ങളും അമിതവേഗത മൂലവും 27.4 ശതമാനം മദ്യപിച്ചുള്ള ഡ്രൈവിംഗ് മൂലവുമാണ് സംഭവിച്ചിരിക്കുന്നത്. ഹെൽമറ്റ് ധരിക്കാത്തതും സുരക്ഷാ മാനദണ്ഡങ്ങൾ പാലിക്കാത്തതും സ്ഥിതി വഷളാക്കുന്നു. വൈകുന്നേരം 3 മണി മുതൽ 6 മണി വരെയുള്ള സമയത്താണ് ഏറ്റവും കൂടുതൽ അപകടങ്ങൾ നടക്കുന്നത്. കർശനമായ നിയമങ്ങളും സുരക്ഷാ ക്യാമ്പയിനുകളും സർക്കാർ നടപ്പിലാക്കുന്നുണ്ടെങ്കിലും ആഘോഷത്തിമിർപ്പിൽ നിയമങ്ങൾ ലംഘിക്കപ്പെടുന്നത് തുടരുകയാണ്.

സംസ്‌കൃത പദമായ ‘സംക്രാന്തി’യിൽ നിന്നാണ് സോങ്ക്രാൻ എന്ന പേര് വന്നത്. ഇന്ത്യയിലെ മകരസംക്രാന്തിക്കും ഉത്തരായനത്തിനും സമാനമായ വേരുകളാണ് ഈ ഉത്സവത്തിനുള്ളത്. കഴിഞ്ഞ വർഷത്തെ അശുദ്ധികൾ കഴുകിക്കളഞ്ഞ് പുതിയ വർഷത്തെ സ്വീകരിക്കുന്നതിന്റെ പ്രതീകമായാണ് വെള്ളം ഉപയോഗിച്ചുള്ള ഈ ആഘോഷം നടത്തുന്നത്. ഇത്തവണ അഞ്ച് ലക്ഷത്തോളം അന്താരാഷ്ട്ര വിനോദസഞ്ചാരികൾ ഈ ഉത്സവത്തിനെത്തുമെന്നും ഏകദേശം 30.4 ബില്യൺ ബാറ്റ് (940 ദശലക്ഷം ഡോളർ) വരുമാനം ലഭിക്കുമെന്നുമാണ് തായ്‌ലൻഡ് സർക്കാർ പ്രതീക്ഷിക്കുന്നത്.

Summary: The traditional Thai New Year festival, Songkran, known as the world’s largest water fight, has seen a tragic rise in fatalities this year, with the death toll reaching 216. During the “seven dangerous days” of the festival, more than 951 accidents and hundreds of injuries have been reported. Speeding (42%) and drunk driving (27.4%) are the leading causes of these road tragedies as millions travel across provinces. Despite government safety campaigns, risky behaviors like not wearing helmets continue to drive the carnage. The festival, which shares its Sanskrit roots with India’s Sankranti, symbolizes purification through water but has turned deadly due to road safety violations.